LIZULIZA 19

Madaala guvuhaliru

(Liv. 35:9-34; Jos. 20:1-9)

1“Inyima wa Yahova Nyasaye winyu amala kudiviza avandu vi kivala cha amuhezaa kandi lwa mumala kuvakunga, madaala nizinyumba ziavo nukwidikilayo, 2maku muviiki halovega amadara gavaga agaveeye hagati mu kivala cha Yahova, Nyasaye winyu, amuhezaa kukivugula. 3Mulagumbakila zinzira kandi mugavulanyie kivala zana cha Yahova Nyasaye winyu amuhezaa mu vidonye vivaga, kunangwa mundu woosi uwiita mundu wundi anyala kwilukira mugo.

4“Yili nilio lilago kolondekana nu mundu witaa wundi, ma yirukiri yo kohonyia livamwoyo niiva mundu aliita mutende weve vugira kumanya, uwa yavula kudunyira maziambiri; anyala kwilukira mu lilala ku madaala yago kandi ave nimirembe. 5Kuli mundu anyala kuzia mu mulitu harara numutende weve kotema musaala, kandi lwa ava naaginga imbaazi yeeye kotema musaala, ma imbaazi esomoke mu muhini ma iduyi mutende weve kandi imwite, munau oyo anyala kwilukira mu lilala ku madaala gavaga yaga ma ahonyie livamwoyo lilie. 6Kigira mwiko uvanzaa kisaalia cha masahi alamulonda muvutima vonene, ma amugumiri niiva logendo loveeye lutambi, nokumwita, kali niiva siaduukanaa yiitwi. Kigira yita mundu utaveeye musigu weve kutura kale. 7Yiki nicho kigira mulagaa mwetovolere aveene amadara gavaga guvuhaliru.

8“Lwa Yahova Nyasaye winyu avambalaliza zinzako zie kivala chienyu kuli yisuhira avaguuga vinyu, na amuhe kivala choosi cha yavasuuviriza, 9Maku mulatovola madaala gandi gavaga. Alamuha kivala yiki niiva mukora vindu viosi via mulagaa kalunu kandi niiva mulayaanza Yahova Nyasaye winyu kandi mumenye kazozo kolondekana na amigizu geege. 10Mukore ndio kunangwa avandu vataveeye nimbala vavuli kwitwa, kandi kunangwa muvuli kuva ni lihiolo liu kuvita mu kivala cha Yahova Nyasaye winyu amuhezaa.

11“Niiva mundu yita musigu mutende weve, ku limuseetera, maku yirukiri mu lilala ku madaala guvuhaliru yaga, 12Mumakuva kuli yaga aviimiliri vi lidaala lilie kuduuka vamwiranyie kutura mu lidaala liuvuhaliru, nokumbika mu makono guwenyaa kuvaanza kisaalia cha masahi, kunangwa aduuki kwitwa. 13Mutamuveri mba. Mutulizi mulumindi uyu mu kivala cha Isiraeli, kunangwa vuduuki kuva vulahi ku munyi.

Zinzako zia kale

14“Mutatulizi vinazogi vie zinzako zia vatende vienyu iviaviikwa kale mu kivala cha Yahova Nyasaye winyu muheezaa mba.

Avalolekizi va Giligali

15“Mulolekizi mulala vuzwa siadukira ku likalagirwa liu mundu oveeye nilihiolo mba. Avaloli vaviri anoho vavaga kuduuka vadinyirizi lilolekiza likuva kumanyia ndi mundu ahioye. 16Niiva mundu mulala agerizaa kusaliriza wundi mu limugina kigira uvudamanu, 17vombi kuduuka vazie havundu harara hukusigamira Yahova ma vakalagirwi na vasaalisi na vakalagi vaveeye ku miyinzi ing'inga yene yeyo. 18Avakalagi valamuteveleriza ligali, kandi niiva muloli oyo umali kugina mundu wa Isiraeli wache, 19hene yaho kuduuka anyoore amageri ga oyo uyaliiywi yaali anyoore. Munzira yiyi, mulatuliza uvudamanu yivu kutura hagati hinyu. 20Maku avandu vatigaye vosi valahulira gamali kwekoleka, na valava nuvuti, na sihalavaho nu mundu okola kindu kidamanu kuli yiki kandi mba. 21Mu makuva kuli yaga, mutamanyia livererera mba. Amageri galava, livamwoyo ku livamwoyo, emoni ku emoni, liinu ku liinu, mukono ku mukono kandi kerenge ku kerenge.

Currently Selected:

LIZULIZA 19: LOGOOLI

Highlight

Copy

Compare