LIZULIZA 17

1“Mutitira Yahova Nyasaye winyu visiuviliru vie zing'ombe anoho magondi, agaveeye nimbala yoosi mba kigira Yahova adunyiraa vindu yivi.

2“Niiva mulahulira ndi mu lidaala lilala ku madaala ginyu, mundu mulala umali kokora vwoni ku Nyasaye nukuvunanyia lilagana lilie 3ku lisigamira nukutumikira avanyasaye vandi, anoho liuva anoho mweli anoho zing'ereng'ani vindu via Nyasaye yasura, 4Niiva uhulira amakuva gu lugano yilu, mutevelerizi ligali, niiva amakuva yago gaveeye agiligali, na galolekizwi ndi kindu chu kuvihuliriza yiki chayekoleka mu Isiraeli, 5maku mulahila mundu oyo ichova wi lidaala na alaswe na magina kuduuka akuzi. 6Anyala kwitwa vuzwa niiva avaloli vaviri anoho vavaga valavoora giligali kuye. Sialitiva niiva muloli aveeye mulala yeng'ine mba. 7Avaloli valava vukutanga kulasa kuye magina, maku avandu vandi valonde ku. Munzira yiyi mulatuliza uvudamanu yivu hagati winyu.

8“Ganyala kuva ndi viyaalo vilala vinyala kuva vidinyu kukalagwa na avakalagi va kazozo, kuli viyaalo viu vulungi vwi miandu anoho lisalirizwa liu muviri, anoho viyaalo yivio ivilondekana niliavukanyia hagati hi liruminda nukwita vugira kusaavira. Lwa gekoleka, zia havundu harara hukusigamira yaho ahatovolwa na Yahova Nyasaye winyu, 9zia ku vasaalisi avaveeye vi ihiiri ya Levi, kandi ku mukalagi uva naveeye ku miyinzi ing'inga yeyo uvateeve navo, valakumanyia kuli ukalaga. 10Maku okole kolondekana ni likalaga lia havundu ha Yahova alitovola. Ohenze vulahi okole vindu viosi via vakwigiza. 11Okole kolondekana ni lilaga lia vakwigiza kandi namakalago ga vakuha. Utagirung'ana halovega kutura ku aga vakovolera mba, 12mundu uhing'ana nukuvula kuhulira musaalisi anoho mukalagi oveeye ku miyinzi ing'inga yene yeyo, kuduuka yiitwi. Na ndio mulatuliza uvudamanu yivu mu Isiraeli. 13Maku avandu vosi valahulira inguvu yiyi kandi valatia, kandi mundu wundi woosi sialaluvilira kokora kindu kuli yiki kandi mba.

Amigizu ku mwamihi

14“Inyima wa muva nimwakavugula kivala cha Yahova Nyasaye winyu amuhezaa kandi lwa muva nimwakakivugula, mumenye mucho kandi ma muvoore, gendi kuviiki mwami kukwamiiha kuli zihiiri zindi izia kukumbiriza. 15Muve nagiligali ndi mundu wa mutovola kuva Mwamihi winyu ni wa Yahova Nyasaye winyu amali kotovola. Kuduuka ave mulala kutura hagati ha avandu vinyu vene. Mutovoli mugeni kuva mwami utaveeye mundu wa Isiraeli mba. 16Mwami atava ni zibarasi zinyingi zie liihi lilie mba, kandi atatuma avandu Egebeti kuzia kugura zibarasi zimeedeke mba, kigira Yahova umali kovora ndi avandu veve vatirana yo kandi mba. 17Mwami atava na vakali avanyingi mba, kigira yiki kilamukola atuli ku Yahova kandi ateekola kuva mutugi ni feza kandi izahabu inyingi mba.

18“Lwagwa mwami, gamudukira ave ni kitabu cha Malago ga Nyasaye, kandi amigizu kutura mu kitabu chukutanga, kilindwa na vasaalisi vihiiri ya Levi. 19Kuduuka aviiki kitabu yiki ahimbi naye kazozo, kandi asome kutura mucho madiku gi livamwoyo lilie liosi; kunangwa aduuki kwiga kuhaana luyali ku Yahova Nyasaye weve, kandi ahuliri nu vusuuvirifu vwosi vindu viosi ivialagwa mucho. 20Yaga galamukola avuli kuganangana ndi aveeye mulahi ligali kuvita vandu vandi va Isiraeli mba, kandi kutura ku livula kuhulira malago ga yahova munzira yoosi. Maku alamiiha ku mihiga minyingi, kandi visukululwi vivie vilamiiha Isiraeli mihiga ni mihiga.

Currently Selected:

LIZULIZA 17: LOGOOLI

Highlight

Copy

Compare