LIZULIZA 15

Muhiga gwa saba

(Lev. 25:1-7)

1“Mulimalirika liavuli muhiga gwa saba mutavanzi amagovi ga mabese ga vandu vaveeye nago mba. 2Genyekaa mukore ndi: Vuli mundu wegobiza mabesa ku amwavo anoho Muisiraeli wache kuduuka amulekele ligovi zana; vatageriza kuvugura mabesa yago mba; Yahova mwene umali kulandiza livanza lia Magovi. 3Munyala kuvaanza magovi ginyu gavageni vaveeye nago, navuzwa mutavugula cha avandu vinyu vaveeye nacho mba.

4“Yahova Nyasaye winyu alamugasiza ligali mukivala cha amuhezaa kuva miandu jinyu. Sihalavaho nu mulala ku avandu vinyu uva mudaka mba. 5Niiva mulahulira Yahova Nyasaye winyu, kandi nimugumira vulahi vindu viosi viamulagaa kalunu. 6Yahova Nyasaye winyu alamugasiza, kuli amali kumusuuviriza. Mulegobiza amabesa ku zihiiri zinyingi, navuzwa munyi aveene simulegoba amabesa kutura kuvo mba. Mulamiiha zihiiri zinyingi, navuzwa sihaveeye ho ni hiiri kali ndala iyamiiha munyi mba.

7“Niiva lilala ku madaala gi kivala cha Yahova Nyasaye winyu amuhezaa liveeye nu mundu wa Isiraeli wache winyu oveeye mudaka, ahene yaho mutava aviimani kandi mutasuula kumukonya mba. 8Mu vogono yivwo, muve avahaani kandi mumwegobizi choosi kuli lienya lilie liveeye. 9Mutasuula kumwegobiza kindu kigira muhiga gwa magovi gasamifwa goveeye ahimbi mba. Mutaleka zing'anagani zindamanu kuli yizi zingili mu zing'anagani zienyu mba. Niiva musuraa kumwegobiza, alalira ku Yahova kigira munyi, na munyi mulanyoleka ni lihiolo. 10Muhaane kuye nuvuhaani vwosi vugira vwimani, na Yahova alamugasiza mu vindu viosi via mukora. 11Valava ho kazozo vandu va Isiraeli vadaka kandi avaveeye nilienya, kulwayago mulagaa muve avahaani ligali kuvo.

Livoholorwa lia avatugwa

(Kut. 21:1-11)

12“Niiva mundu wa Isiraeli wache winyu, musaza anoho mukali alaza umwene ku munyi kuli mutugwa, kuduuka mumuvoholore inyima wu kumutumikira ku mihiga sita. Lwu muhiga gwa saba gutanga kuduuka mumuvoholore. 13Lwa mumuvoholola atule ku munyi mutaleka azie makono ameere mba. 14Mumuhe nu vuhaani vwosi kutura ku via Yahova amli kumugasiza navio; chayo cha magondi, viamo viu vuswage kandi iwaini. 15Mwizurizi ndi munyi mwaali avatugwa mu kivala cha Egebeti, na Yahova Nyasaye winyu yamuvoholora. Kunangwa, yicho nicho kigira muheezaa lilago yili kalunu.

16“Navuzwa niiva mutugwa winyu alamuvolera, Sinyenyaa muleke mba, kigira yamuyanza, harara na vandu vizinyumba zienyu, kandi kigira aveeye ni liiva lilahi komenya nimunyi, 17aheene yaho mulamuhila ha kiliango chi inyumba yinyu na mulavugula isindani enene na mufuduli intunga yu gutu gwigwe kuduuka yingiri mu furemu yi kiliango, naye alagwa mutumikiri winyu wi kikali. 18Mutalola vudamanu lwa muvoholora mutugwa winyu mba, kigira yamutumiiyi ku mihiga sita ku inusu yi mitungu ju mutumikiri utungwa. Yahova Nyasaye winyu alamugasiza mu vindu viosi via mukora.

Mitugu jukutanga kwivulwa

19“Muviikiri Yahova, Nyasaye winyu halovega mitugu jiukutanga kwivulwa josi jive chayo chicho chi zing'ombe kandi cha magondi. Mutaviika mutugu musaza gwukutanga kwivulwa gwi zing'ombe ku miyinzi mba, kandi mutakalaga uvwoya vwu mutugu musaza gwukutanga kwivulwa gwi chayo cha magondi mba. 20Vuli muhiga, munyi harara na vandu vizinyumba zienyu mulaviliira imbiri wa Yahova havundu hukusigamira aha Yahova alitovola. 21Navuzwa niiva koveeye ni kindu kidamanu ni zinyama yizio, niziva zialema, anoho zimboku anoho ziveeye no volema vundi vudamanu, mutazihaana ku Yahova Nyasaye winyu mba. 22Zinyama kuli yizio munyala kuziliila mu madaala. Vombi avaveeye valahi kandi vadamanu kolondekana ni miruka jidiini vanyara kulia, kuli chakaveeye kisusu anoho embongo. 23Navuzwa mutanwa amasahi mba, kuduuka mugasunduli ichova kuli amazi.

Currently Selected:

LIZULIZA 15: LOGOOLI

Highlight

Copy

Compare