LIZULIZA 13

1“Niiva muporofeti, anoho mulooti wa maloto, anyoleka hagati hinyu nokumusuuviriza kelolekizu anoho chokogenyia, 2kandi niiva kelolekizu anoho chokogenyia yicho kelekoleka, mavoole: Gendi kolonde avanyasaye vandi, avanyasaye va munyi mwavura kumanya, kandi “Gendi kuvasigamiri” 3mutahuliriza amakuva gu muporofeti oyo, anoho mulooti oyo mba. Yahova Nyasaye winyu atumikiraa mundu oyo kugeriza munyi, kumanya niiva muyanzaa Yahova nu mwoyo gwinyu gwosi kandi na roho jinyu josi. 4Mulonde Yahova kandi muhaane luyali kuye. Mumuhuliri kandi mulindi malago geege; mumusigamiri kandi muve avasuuvirifu kuye. 5Muporofeti oyo anoho mulooti oyo kuduuka yiitwi, kigira yilwaza liebaala ku Yahova Nyasaye winyu, uwamuleta kutura mu kivala cha Egebeti wamwaali vatugwa. Vandu kuli yava vadamanu, kandi vageriza kumutuliza kunzira ya Yahova Nyasaye winyu yamulaga mulonde ku. Kuduuka viitwi kunangwa mutulize uvudamanu voveeye hagati hinyu.

6“Kali amwavo woovo anoho mwana muyaayi anoho mukaana woovo anoho mukali wa wayanza, anoho mulina woovo wa ahimbi ligali alakogonya musigamiri vanyasaye vandi mu vwivisu, avanyasaye vamunyi anoho vaguuga vinyu vavura kusigamira, 7avanyasaye va avandu vamukumbiriza, nivava ni vamenyi ahimbi anoho ihale; kutura ku lovega lulala lwi kivala zana kuduuka kulundi. 8Mutaleka amugonye kuduuka muvugiliri mba; kandi mutamuhuliriza kali hakuzu mba. Mutamumanyia zimbavasi anoho liverererwa mba kandi mutamukinga mba. 9Kuduuka mumwiti. Muve wukutanga kulasa kuye ligina; maku muleke avandu vandi navo valase ku amagina. 10Mulamulasa magina kuduuka akuze! Yageriza kumwimilira muturi ku Yahova Nyasaye winyu, uwamuhonyia kutura Egebeti, uwa mwaali avatugwa. 11Maku avandu vosi va Isiraeli valahulira agekoleka; na valatia ligali, kandi sihalava ho numulala hagati hinyu uwilana kokora kindu kidamanu kuli yiki kandi mba.

12“Lwa muva nimumenyi mu madaala ga Yahova Nyasaye winyu amuha, munyala kuhulira 13ndi avandu valala vadamanu vi ihiiri yinyu vamali kuhila halovega avandu vi lidaala liavo kusigamira avanyasaye va mwavura kusigamira maziambiri. 14Niiva mulahulira amakuva gu lugano yilu mutevelerize, vulahi ligali. Niiva gaveeye agiligali ndi kindu kidamanu yiyi kimali kwekoleka hagati hinyu, 15kuduuka mwiti avandu vosi avamenyi mu lidaala yilio. Mudivizi lidaala yilio viombi avandu harara nimitugu jaavo. 16Muleete harara miandu josi ja avandu vamenyi mu lidaala yilio na muvivungizi hagati hi lidaala zana. Maku mulasaamba lidaala liosi harara ni vindu viosi viveeye mulio kuli kihanwa ku Yahova Nyasaye winyu. Kuduuka lilekwe mang'anye mihiga ni mihiga, kandi litumbakwa vuhia mba. 17Kilala ku vindu viakalagirwa kudivizwa vitanyoleka ku mu makono ginyu mba, ma kandi Yahova agirung'ana kutura mu vutima vwivwe vululu; alamuveera zimbavasi, kandi alamukola muve avandu vanyingi kuli yasuuviriza avaguuga vinyu, 18niiva muhulira malago geege goosi aga Inzi mali kuhaana ku munyi kalunu, kandi ni mukora aga yenya.

Currently Selected:

LIZULIZA 13: LOGOOLI

Highlight

Copy

Compare