AMOSI 5
5
Lilangwa kwiganira
1Muhulirizi ku lwimbu lwange lwi lisioma O, munyi avandu va Isiraeli: 2“Mukaana mugima, Isiraeli umali kugwa, kandi sialavuka! Ogooni hasi kumalova, nu mundu sialamukonya kuvuka mba.”
3Yahova avoora,
“Lidaala linene mu Isiraeli litumaa avasikari elefu indala,
navuzwa avasikari imia indala viirana;
kandi lidaala linene litumaa vasikari imia indala,
navuzwa avasikari likomi veng'ine viirana.”
4Yahova avoora ku vandu va Isiraeli, “Mwilane ku inzi na mulahona. 5Navuzwa mutenya Bezeli, kandi mutazia Giligali anoho mutazia Beerisheba; kigira lidaala lia Giligali lilazia lihaminywe na Bezeli lilatigala iliele.”
6Mwenye Yahova, na mulahono. Nimutenya Yahova, aliika hasi ku vandu va Isiraeli kuli muliru. Na muliru gulasamba vandu va Bezeli, nu mundu kali mulala sialagusiminya mba. 7Munyi mudivi avagirung'anyia uvulungi kugwa uvudamanu, avagadaa avandu kutura ku vulungi vwavo.
8Yahova yalomba zing'ereng'ani:
Pleiadesi na Orini.
Agringanyia kisundi kuva umbasu,
na umbasu kuva uvudiku.
Alanganga amazi kutura mu zinyanza,
nu kugazuka ku kivala.
Lieta lilie liveeye Yahova.
9Aleetaa lidiviza ku avizingulu kandi ku zimbinga ziavo.
10Munyi mudunyiraa uyu ogodekeraa uvutali vulungi mu vuyaalo kandi muvihiliraa oyo ovola agiligali. 11Kunangwa mumali kudambiza avadaka nu kuvanura vuswage vwavo. Kigira yaga, simulamenya mu zinyumba zindahi zia magina gavazwa zia mwumbaka, kandi simulanwa iwaini kutura ku mizabibu milahi ja mwasimika mba. 12Kigira inzi manyi kuli mahiolo ginyu gaveeye manyingi kandi manyi kuli uvwoni vwinyu voveeye vonene ligali. Munyi mudambiza avalungi nukuvugula viambeti; mwigaliranga avadaka vavuli konyoora likalaga lirungi liavo mu viyaalo. 13Kunangwa oveeye mugeri alakilingana ing'inga kuli yiyi, kigira eveeye ing'inga indamanu ligali!
14Munyi mwegombe kokora uvulungi, na mutenya kokora uvudamanu mba, ku muduuki kuva mwoyo. Nandio Yahova Nyasaye Wanyala Viosi wa mahe alava harara ni munyi kuli mumali kovora. 15Mudunyili uvudamanu, na muyanze agaveeye malungi, na mulole ndi likalaga lirungi likoleywe mu viyaalo. Hawundi Yahova Nyasaye Wanyala Viosi alaveera avandu veve Isiraeli zimbavasi avatigara mwoyo.
16Kunangwa Yahova Nyasaye Wanyala Viosi avoora, “Lilavaho lilira ni lisioma lie liverera mu zinzira zia madaala manene, kali avalimi valalangwa kuzia kusiomera avakuzu na avaveeye nelimanya liokusioma. 17Halakave ho ni lisioma mu milimi ji mizabibu. Yaga goosi galekoleka kigira nziza kuhaana amageri ku munyi.” Yahova umali kovora. 18O, vayaayi, kivi keveeye ku munyi avegombaa liduka lie lidiku lia Yahova! Kigira ki mwenyanga lidiku lia Yahova? Lilakave lidiku lie kisundi vugira uvulavu ku munyi. 19Lilakave kuli mundu wiruka isimba, ma yagana ni iduba! Noho kuli mundu wingiraa munyumba yeeye ma adiira mukono gwigwe ku lidigi, navuzwa enzoka imuluma! 20Yahova lilaleeta kisundi, na uvulavu sivulavaho mba. Lilakave lidiku lie kisundi ligali vugira vong'ereng'anu.
21Yahova avoora, “Ndunyiraa amasavo ginyu gi idini. Sinyanzizaa na mavugano ginyu gizidini mba. 22Lwa muletaa ku inzi vihaanwa vienyu viokusambwa, kandi vihaanwa vienyu viu vuswage, sindavivugilira mba; kali sindavugilira vihaanwa vienyu vie mirembe vie zinyama zinolu mba. 23Mulekere liyoga lie zinyimbu zienyu; kigira sinyenyaa kuhuliriza mioyojiovukana vwinyu mba. 24Mu vogono vwi vindu yivio muleke likalaga lirungi lidoloke kuli mugera gwa mazi, na uvulungi kuli mugera munene gwa mazi agalivula kukama.
25“O, munyi avandu va Isiraeli, mwandetera vihaanwa ni visiuviliru lwa ndamwimilira ku mihiga arubaini mwigendanyama. 26Navuzwa mumali kusigamira vifananyi via Sakuzi, umunyasaye munene, kandi. Kaivani, umunyasaye we eng'ereng'ani, avamwelombera munyi aveene. 27Kunangwa, ndakamuhili mu vuhambe mu kivala keveeye engereka wi lidaala linene lia Damasiko.” Yahova wi lieta lilie liveeye Nyasaye Wuvunyali avoora.
©Bible Society of Kenya, 2019