AMOSI 3
3
1Munyi avandu va Isiraeli, muhuliri makuva ga Yahova amali kovora ku munyi ihiiri yoosi yatura mu kivala cha Egebeti; 2“Kuzihiiri ziosi ziokulirova, munyi nivo mweng'ine avadamanya nukuvalinda. Yiki nicho kekolaa uvwoni vwinyu kuva vudamanu ligali. Yiki nicho kigira muhe amageri malulu ligali.”
Miyinzi ju muporofeti
3Avandu vaviri vanyara kogenda harara nivatavungirani?
4Isimba inyala kuhuuma mu mulitu nitaloli inyama?
Isimba esoleri inyala kuhuuma muluhangaywa lwayo nitagumiyi ikindu?
5Linyonyi linyala kugwa mu mutego nigitategeywi?
Mutego gunyala kutiguka vugira kutigulwa?
6Kisiriva chu vulwani kinyala kukubwa mu lidaala linene vugira kokora avandu vatie?
Kivi kinyala kuduuka mu Lidaala linene ni kitaleteywi na Yahova?
7Ligali Yahova Nyasaye sialakola kindu vugira kuvulira avatumwa, avaporofeti veve agaviswa.
8Lwi Isimba ihuuma, nivwaha unyala kuvula kutia?
Lwa Yahova Nyasaye amali kovora, nivwaha unyala kuvula kuporofeta makuva geege?
Lidiva lia Samaria
9Mwilwaze ku zimbinga zio vwami mu kivala cha vandu va Siria, na ku zimbinga zio vwami mu kivala cha Egebeti, na muvoore: “Muvugane harara ku vigulu via Samaria na mulole ligoyana linene ni lidambizwa liayavo avaaveeye hagati havio.”
10Yahova avoora, “Avandu yava sivakora agaveeye amalahi mba, avaviika ivindu via vanura nukwivila avandu mu zinyumba ziavo. 11Kulwayago, musigu alakumberiza kivala kiavo, nu kogehiza zinguru ziavo, nu kwononyia zimbinga ziavo nukulanya zinyumba ziavo.”
12Yahova avoora, “Kuli umwayi ahonyia vilenge viviri anoho ugutu gwi ligondi kutura mu munwa gwi Isimba, kandi ndio avakeekeke ku vandu va Samaria valahonywa, avandu avasedemaa ku zindeve zie mido. 13Muhuliri kalunu, ma mwiganihizi visukululwi via Yakobo.” Yahova Nyasaye Wanyala Viosi avoora. 14“Ku lidiku lia mbana amageri ku vandu va Isiraeli kigira uvwoni vwavo, ndononyia uvwali vwa Bezeli. Zikona ziosi ziavuli uvwali zilavunagwa nu kugwa hasi. 15Ndononyia zinyumba ing'inga yu vukindu ni ing'inga yumbasu mululu. Zinyumba zialombwa ku amiinu gi zinzogu, ziladivizwa kandi vuli inyumba enene iladiva.”
©Bible Society of Kenya, 2019