2 SAMWELI 5
5
Daudi yakolwa mwami wi Zihiiri ziosi zia Isiraeli
(1 Zin. 11:1-9; 14:1-7)
1Ahene yaho, zihiiri ziosi zia Isiraeli ziazia ku Daudi ha Heburoni nivamuvoolera, “Kunyi koveeye va masahi googo. 2Ku maziambiri, lwa Saolo yaali nakikiri mwami wiitu, ivi wimilira avandu va Isiraeli kuzia muvulwani, kandi Yahova yakusuuviriza ndi ivi ulimilira avandu veve na ulava mwami wavo.” 3Kunangwa aviimiliri vosi va Isiraeli vaza ku mwami Daudi ha Heburoni. Yalomba lilagana litakatifu navo imbiri wa Yahova, kandi vaamuvaka amaguta, nivamukora Mwami wa Isiraeli. 4Daudi yaali ni mihiga 30 lwa yagwa mwami, kandi yamiha mihiga 40. 5Yamiha mu Heburoni, ku ihiiri ya Yuda ku mihiga saba ni inusu mu Jerusalemi, ku Isiraeli na Yuda, yamiha ku mihiga 33.
6Mwami munene Daudi na avasaza vi liihi veve vazia kutulira Jerusalemi. Avajebusi avamenya yo, vaganagana ndi Daudi sialanyala kuguuta lidaala liene yilio mba, nandio vamuvolera, “Siulingira muno kali hakuzu mba; kali avavoku na avalema valakwigalira uvuli kwingira.” 7(Navuzwa Daudi yagumira nukuguuta imbinga yaavo ya Ziyoni, kandi liaza kumanyikana kuli “Lidaala linene lia Daudi.”)
8Lidiku yilio Daudi yavolera avasaza vi liihi veve, “Aveeye ho nu mulala ku munyi hano uvihilirwa vandu va Jebusi kuli inzi udukana kuviita? Ahene yaho, muzie igulu kuvitira mu ulutu lwa amazi nukwingilira avavoku na valema vadaka yavo.” (Yicho nicho kigiranga nigavoleka, “Avavoku na avalema sivanyala kwingira munyumba ya Yahova mba.”)
9Inyima wukugumira nukuguuta imbinga zana yeyo, Daudi yamenya muyo kandi yagigulika, “Lidaala linene lia Daudi.” Yumbaka lidaala linene ku likumbiriza kutangira havundu hu mulimi gwaali ni gwizulizwa mu amavona ku lovega lwa Ivugwi wi kiguru. 10Yaazizagilira kugwa nizinguru zing'inga ziosi kigira Yahova Nyasaye Wanyala Viosi yaali naye.
11Mwami Huramu wa Tiro yatuma avatumwa vi viasala ku Daudi; yamuha misaala ji midaragwa kandi na avavaazi na avumbaki vizinyumba zia magina ukwumbakira Daudi inyumba yu vwami. 12Nandio Daudi yamanya ndi Yahova amali kumusingiriza kuli Mwami munene wa Isiraeli kandi akolaa uvwami vwivwe kuva vwukuzizagilira imbiri ligali kulwa avandu veve.
13Lwa Daudi yaali ni yakatula Heburoni kuzia Jerusalemi yavugula avakali vaviika vandi na avakali vandi, na yivula vayaayi vanyingi kandi avakaana. 14Yava nivo avana viivulwa kuye mu Jerusalemi: Shamua, Shobabu, Nazani, Solomoni, 15Ibiharu, Elishua, Nefegi, Yafia 16Elishama, Eliada, Elifeleti.
Avandu va Filisitia Vaguutwi
(1 Zin. 14:8-17)
17Avandu va Filisitia vavolerwa ndi Daudi umali kokolwa mwami munene ku Isiraeli. Kunangwa liihi liavo liatanga kuzia kumugumira. Lwa Daudi yahulira amakuva yaga, yazia havundu ha imbinga yaali neveeye. 18Avandu va Filisitia vaduuka ha livona lia Refaimu kandi valigumira nukulivugula. 19Daudi yateeva Yahova, “Ngazia kwingilira vandu va Filisitia naho? Ulamba iliguuta?”
Yahova yativura, “Yee, zia uvatuliri! Inzi ndakuha iliguuta!”
20Kunangwa Daudi yazia kuduuka ha Baaliperazimu#5:20 Baaliperazimu: Mu Luheburaina livoora, Mwami wi livunaga., kandi uwene yeyo, yaguuta vandu va Filisitia. Yavoola, “Yahova umali kuvunaga avasigu vange kuli livunaga lia amazi gizuyi.” Nandio havundu yaho halangangwa Baaliperazimu. 21Lwa avandu va Filisitia viiruka, valeka vifananyi via avanyasaye viavo inyima na Daudi na avasaza vi liihi veve vaavivugula ni vazia navio.
22Maku avandu va Filisitia viirana mu livona lia Refaimu nivalivugula nokomenya mu kandi. 23Daudi yateeva Yahova kandi lwa kaviri, na yativura, “Utakola ndio kutura hano mba; navuzwa uzie uvakumbirize na wetegeke kuvatulira kutura lovega lundi ahimbi nimisaala ji zinyangaleri. 24Lwa uhulira muliviti gwi ligenda ku zisonga zie misaala ji zinyangeleri, ahene yaho zia uvingiliri kigira ndava niing'endanga imbiri woovo kuguuta liihi lia Avafilisitia.”
25Daudi yakola icha Yahova yaali nalagi, kandi yaanyaliza kukunga Avafilisitia kutura Geba kuduuka Gezeri.
©Bible Society of Kenya, 2019