2 SAMWELI 22
22
Lwimbu lwu Vuguuti vwa Daudi
(Zab. 18:1-50)
1Lwa Yahova yahonyia Daudi kutura ku Saolo kandi ku vasigu veve, Daudi yimba lwimbu yilu ku Yahova:
2Yahova aveeye mukingi wange,
Aveeye imbinga yange yi zinguru,
kandi muhonyi wange.
3Nyasaye wange aveeye chukwivisa mu change,
aveeye inguva yange kandi zinguru zio vohonyi vwange.
Aveeye imbinga yange, chu kwivisa mu
change kandi muhonyi wange;
ivi ombonyia kutura ku vasigu vange.
4Nzanira Yahova, udukana kwizominywa,
kandi mbonyia kutura ku vasigu vange.
5Viguvuli vie likuza viangumbiriza,
migera jukudiviza jambita nizinguru.
6Uvuhimwa vwi likuza vwangumbiriza,
mutego gwi likuza gwaduuka ku inzi.
7Ndaanira ku Yahova, mu kivi change ndanira ku Nyasaye
kutura mu litembeli lilie yahulira mwoyo gwange,
lilira liange liaduuka mu matu geege
yahuliriza ku lilira liange kigira ovokonyi.
8Maku lirova liatenga nilidegera
misinai ji ligulu jadengeya,
kigira Nyasaye yaali nu vutima!
9Mwoki gwasunduka kutura mu muulu geege,
muliru gulizaa gwatura mu munwa gwigwe;
Amanda gu muliru gwaduuka kutura mu munwa gwigwe.
10Yavukanyia ligulu kandi niyiika hasi,
kisundi kenene chaali isi wi virenge vivie.
11Yikala ku mukerubi weve, nabuluka,
yaloleka ku zimbaha zie imbuza.
12Yifuma umwene ni kisundi;
malesi mamwamu, nigiizuyi amazi,
gamukumberiza;
13Amanda gumuliru gaaka
kutura mu loheni imbiri weve.
14Maku Yahova yaatululukiza inguba kutura mwigulu,
kandi mwoyo gwa Nyasaye Wuvunyali gwahulirika.
15Yalasa mivano ju uvuta vwivwe kandi yaasalanyia avasigu veve;
Yavakunga ni lihemahema lie zimbeni.
16Lwaalo lwi inyanza lwakolwa hazwa,
kandi misingi ji lirova jakunulwa
lwa Yahova yagondokera avasigu veve,
kandi nuvafuumira nu vutima.
17Yahova yaduuka hasi kutura igulu,
kandi naang'umira.
Yang'usa inzi kutura mu mazi gu luliva.
18Yambonyia kutura ku avasigu vange vizingulu
kandi kutura ku yavo vosi avadunyira -
vaali avizingulu ligali ku inzi.
19Lwa ndaali mu kivi, vanzingilira, navuzwa Yahova yasoola.
20Yangoonya kutura mu vuhimwa;
yambonyia kigira ndamuyaanziza.
21Yahova yamba madanyi kigira ngolaa vulahi,
yangasizaa kigira simbeeye niimbala mba.
22Mali kugumira lilaga lia Yahova
Ngikiri kugirung'ana kutura ku Nyasaye wange mba.
23Mali kolonda malago geege goosi,
kandi sindaleka amalago geege.
24Yamanya ndi inzi mbeeye vugira imbara
kandi ndayigaya ku likora vudamanu.
25Nandio yambezaa madanyi kigira ngolaa agaveeye malungi,
kigira amanya ndi simbeeye nimbala mba.
26O, Yahova, oveeye musuuvirifu ku yavo
avaveeye avasuuvirifu ku ivi,
kandi oveeye mulahi ligali ku yavo avaveeye avadukiru.
27Oveeye mulungi ku yavo avaveeye valungi.
Navuzwa oveeye mululu ku yavo avachamu.
28Ivi ohonyia yavo avaveeye avahoma
navuzwa ogehizaa yavo avaveeye avigingiri.
29Ivi O, Yahova, oveeye vulavu vwange
ivi utulizaa ho kisundi change.
30Ivi ombeezaa zinguru kwingilira avasigu vange,
kandi zinguru kuguuta zimbinga ziavo.
31Nyasaye uyu, ivikolwa vivie viveeye vidukiru ligali,
amakuva geege gaveeye agiligali!
Aveeye kuli inguva
ku vosi avenya likingwa lilie.
32Yahova wengine aveeye Nyasaye;
kandi niye yeng'ine oveeye mukingi wiitu.
33Ni Nyasaye ongoraa mbe ni zinguru;
kandi akolaa inzira yange kuva inungi.
34Alombaa inzi kunyagula kuli virenge vie kisusu;
yaanindaa mbe ni mirembe ku vigulu.
35Yanzigiza kuli nyara kulwaana vulwani;
kunangwa nduuki unyala kutumikira uvuta vwizingulu ligali.
36Ivi ombeeye inguva yu vuguuti
kandi ovokonyi vuvwo vokoli inzi munene ligali.
37Ivi ummali kuginga mburi kugumirwa,
kandi ngikiri kugwa hasi kali hakuzu.
38Nondeleraa avasigu vange kandi mbaguuta;
si sinndekaa kuvalondelera kuduuka lwa mbadiviza ligali.
39Ndaavatumita mu kuvadiviza ligali;
vaagwa hasi nivaguutiywi.
40Ivi ombeezaa zinguru ziu kulwaanira (muvulwani)
kandi liguuta ku vasigu vange.
41Ivi okolaa vasigu vange ukwiruka kutura ku inzi;
Ndivizaa yavo avandunyira.
42Vanira ovokonyi, navuzwa siaveeye ho nu uvahonyia mba.
Vanira ku Yahova, navuzwa siavativuliraa mba.
43Inzi mbasionoranyia, kandi ma vaagwa kuli luguki
mbaduvagaa kuli ovodohi muzinzira.
44Ivi wambonyia kutura ku avandu vi liebaala
walinda uvwamihi vwange ku zihiiri;
avandu va inzi ndaavura kumanya vagwiyi vatumikiri vange.
45Avageni vinamaa imbiri wange,
lwa vahulira inzi, vavezaa nuvuti.
46Vagotizanga uvuluviliri vwavo,
ma vaza nivadegeranga kutura mu zimbinga ziavo.
47Yahova aveeye mwoyo!
Mukingi wange yizominywe!
Landiza ovonene vwa Nyasaye ombonyia.
48Nyasaye yambezaa liguuta ku vasigu vange
kandi zihiiri mu zinguru ziange.
49Ombonyia kutura ku vasigu vange.
O, Yahova, ivi ohezaa inzi iliguuta ku avasigu vange;
kandi ukingaa inzi kutura ku avasaza vu vutindi.
50Kigira yaga ndakwizominya O, Yahova, hagati hi zihiiri;
Ndakwimbira zinyimbu zie lizominya lieta liilio.
51Nyasaye ahaanaa liguuta linene ku mwami munene weve;
kandi amanyia uvuyanzi vutaveeye nekeheri ku uyu uwamali kotovola.
Kandi Daudi ni ivisukulurwi vivie mihiga ni mihiga.
©Bible Society of Kenya, 2019