2 SAMWELI 14
14
Joabu Yalohiza lirana lia Abisolomu
1Joabu yamanya ndi mwami yegomba kolola Abisolomu ligali. 2Kunangwa Joabu yatuma na mukali mugeri wamenyaa mu lidaala lia Tekoa, lwa yaduuka yamuvolera, “Wigadize ndi oveeye mu lisioma. Wiviki zinguvu zielisioma, na utiivaka amaguta kwinihiza mba. Wekole kuva kuli mukali waamenyi madiku manyingi naasiomeraa mukuzu. 3Maku uzie ku mwami na umuvolere aga inzi ngovolera ovoole.” Maku Joabu yamuvolera icha avoora.
4Lwu mukali kutura Tekoa yazia ku mwami, yagwa hasi mamumama imbiri weve kumuha luyali, kandi yavoola, “Ngonya, O, mwami munene wuluyali!”
5Mwami Daudi yamuteeva, “Wenyaa ki?”
Yativura, “Inzi mbeeye ligali mukunzakali mudaka,” musaza wange yakuza. 6Inzi, mutumikiri woovo, ndaali na vayaayi vaviri, kandi lidiku lilala vatanga likubanira mu kiguti, kandi sihaliho nu mundu wu kuvavukanyia mba. Mulala yakuya uwundi naamwita. 7Kalunu, aviiko vosi vaangirung'ani mutumikiri woovo; vavoola, “Koleetere uyu wakuya nukwita amwavo weve, kunangwa kuduuki kumwita kigira liruminda amwavo weve. Niiva valakola ndio, ndatigara vugira muyaayi. Valadiviza lisuuvira liange likumaliriza nokoleka musaza wange vugira lieta liu muyaayi weve livuli kogota.”
8Mwami yavolera mukali zana oyo, “Zia yengo na inzi ndatuliza lilago mu vugono vuvwo.”
9Navuzwa mukali kutura Tekoa yamuvolera “Mwami wuluyali wange, leka lidulwa live ku inzi kandi ku avandu avinyumba ya baba wange, na oleke mwami munene harara nendeve yu vwami vwivwe vave vugira imbara.”
10Mwami yativura, “Niiva mundu alakutihiza, muleete ku inzi, sialakunyangiza kandi mba.”
11Mukali yavoola, “Mwami Wuluyali, mwaza saala ku Yahova Nyasaye woovo, kunangwa mwiko wange ndukanaa kuvaanza kisaalia kigira likuza liu muyaayi wange avuli kokora uvudamanu vonene ku liita muyaayi wange wundi.”
Daudi yativura, “Ngusuuvirizaa ku Yahova oveeye mwoyo ndi, muyaayi woovo sialasalirizwa kali hakuzu mba.”
12Maku mukali zana yavoola, “Mwaza, leka inzi, mutumikiri woovo molome likuva ku mwami wange, munene.”
Mwami yativura, “Moloma.”
13Mukali zana yavoola, “Kigira ki ivi okoli kindu kidamanu kuli yiki ku avandu va Nyasaye? Ukikiri kuvugilira muyaayi woovo mwene ukwirana kutura mu lihaminywa, nandio ivi wikalagiyi umwene kolondekana na icha gawakavoola. 14Kunyi kwosi kwaza kukuzi, koveeye kuli amazi gasunduliywi hasi ku marova, agatanyala kudafwa kandi mba. Nyasaye siyilanyia avakuzu kuva mwoyo kandi mba, navuzwa mwami anyala kwenya inzira ya yiranyira mu umundu kutura mu lihaminywa 15na kalunu, Mwami wuluyali wange, kivuni cha nzizi komoloma ku nivi keveeye ndi avandu vaguduki ligali, kandi ndio manyi ninzevoolera mwene ndi ndamoloma nivi nilisuvira ndi ivi ulakola icha ngoteva. 16Ndaali kuganagana ndi ivi ulambuliriza na ombonyie kutura mu mukono gwa uyu ogerizaa kwita muyaayi wange harara ninzi, nandio kukutuliza mu kivala cha Nyasaye yaaha avandu veve. 17Ndeevolera inzi mwene, ndi lisuuvirizwa liilio, mwami wuluyali, lilandetela likingwa, kigira mwami aveeye kuli engelosi wa Nyasaye kandi anyala kwavukanyia uvulahi kutura ku vudamanu. Yahova Nyasaye woovo ave harara nivi!”
18Mwami yativura, “Ndakoteeva liteeva, na ivi kuduuka ombolere agiligali goosi.”
Ndeva kindu choosi, mwami wange wuluyali, mukali yativura.
19Mwami yamuteeva, “Joabu aveeye mu makuva yaga goosi?”
Mukali zana oyo yativura, “Kuli ivi mwene oveeye mwoyo, O, munene wange umwami, siaveeyeho numulala ugirung'anaa ninzira yu kweloha kuhaana mativuli ku mateeva googo mba Mwami Wange Wuluyali. Yee, yaali mutumikiri woovo Joabu wambolera chokokola kandi gambolaa gwu mutumikiri woovo. 20Mutumikiri woovo Joabu yakola yaga kugirung'anyia liiva liveeye ho kalunu. Mwami wange aveeye novogeri kuli vwe engelosi wa Nyasaye kandi amanyi kindu choosi ichekolekaa mu kivala.”
21Lwa nyima, mwami yavolera Joabu, “Mali kotovola kovora kindu choosi cha wenyaa. Zia oleete musoleri Abisolomu, umwiranyie hano.”
22Joabu yagwa hasi mamumama imbiri wu mwami Daudi, navoora, “Nyasaye akugasizi, mwami wuluyali! Kalunu ndakamanya ndi uyanziziywi ninzi, kigira umali kuvugilira lisaala liange.” 23Maku yasingira nazia Geshuru, ma niyiranyia Abisolomu mu lidaala linene lia Jerusalemi. 24Nitali mwami yahaana lilaga ndi Abisolomu atamenyaa munyumba yu vwami mba. Mwami yavoola “Sinyenyaa mulole mba”. Kunangwa Abisolomu yamenya munyumba yeeye mwene, kandi siyaloleka imbiri wu mwami mba.
Abisolomu vasamihanaa na Daudi
25Mu Isiraeli mwosi sihaaliho nu mundu uwamanyikana ligali kigira ligondo lilahi lilie kuli Abisolomu mba. Siyaali nimbala kutura ku induvatiru yeeye kuduuka ku lwote lwu mutwi gwigwe mba. 26Liisu lilie liali liliduhu ligali, kandi yavega lulala ku muhiga, lwa liavirukaa kugwa litambi kandi lilitu ligali. Uvulitu vwalio vwali vunyala kuvita zikilo ziviri kolondekana niligera liavugilirwa nu vwami. 27Abisolomu yaali na vayaayi vavaga kandi nu mukaana mulala uwiligondo lilahi ligali, uwalangwa Tamara.
28Abisolomu yamenya mihiga giviri mu Jerusalemi vugira kolola mwami. 29Kunangwa Abisolomu yatumana Joabu aduuki kumuteeva amuziiri ku mwami; navuzwa Joabu siyaali anyala kuuza mba, Abisolomu yaamutumana kandi Joabu navuzwa yasura kuuza. 30Kunangwa Abisolomu yavolera avatumikiri veve, “Heenzi, mulimi gwa Joabu goveeye himbi nugwange, kandi aveeye ni ishairi mugwo. Muzie kuhambiza muliru mu mulimi yigwo.” Kunangwa vazia nivahambiza muliru.
31Joabu yazia munyumba ya Abisolomu kandi nateeva, “Kigira ki avatumikiri vovo nivahambiza muliru mu mulimi gwange gwi ishairi?”
32Abisolomu yativura, “Kigira usuyi kuuza lwa ngutumani. Nyenyaangi unziiri ku mwami na umundeevere ndi: ‘Kigira ki nindula Geshuru nu kuuza hano? Vwakaveeye vulahi ligali ku inzi komenya yo.’ ” Abisolomu yaazizagilira kovora, “Nyenya onombere vwiyangu nduuki kolola mwami, na niiva mbeeye nilihiolo, ahene yaho oleke anziiti.”
33Kunangwa Joabu yazia ku mwami Daudi namuvolera ga Abisolomu yaali navooye. Mwami yalanga Abisolomu. Abisolomu yazia kuye niyinama hasi imbiri weve. Mwami yaamwingiriza nilivusa.
©Bible Society of Kenya, 2019