2 SAMWELI 12
12
Makuva ga Nazani ni Lieganira lia Daudi
(1 Zin. 20:1-3)
1Yahova yatuma muporofeti Nazani ku Daudi. Nazani yazia kuye navoora, “Vaali ho avasaza vaviri avamenyaa mu lidaala lilala; mulala yaali mutugi nuwundi yaali mudaka. 2Musaza mutugi yaali nizing'ombe zinyingi kandi namagondi manyingi, 3navuzwa mudaka yaali niligondi lilala lieng'ine vuzwa lia yaali niyagula. Yalilinda vulahi ligali na liavirukira hango hehe harara na avana veve. Yaali anyala kulilihiza kali ni vilala ku viukulia vivie, kulileka linwere amazi mu kekombe chiche, kandi alilera kumagulu geege. Ligondi yili liali kuli mukaana weve. 4Lidiku lilala, mugeni yaza naduuka hango hu mutugi. Mutugi siyenya kwita lilala ku magondi geege kolombera mugeni lilia mba. Muvogono yivwo yavugula ligondi liumudaka lieg'ine vuzwa, naalietegekizira mugeni weve chukulia.”
5Daudi yavihilirwa ligali mutugi zana oyo navoora, “Nzisuha ku Yahova oveeye mwoyo ndi mundu wakola yaga kuduuka akuzi! 6Kigira likora inguuva ndamanu yiyi, kuduuka atuungi haali kane kuli yavugula.”
7Nazani yavolera Daudi. “Ivi niye mundu zana oyo, yaga nigo ga Yahova Nyasaye wa Isiraeli avoora: ‘Inzi ndakokola ove mwami munene wa Isiraeli kandi ningohonyia kutura ku Saolo. 8Ndakuha uvwami vwivwe kandi avakali veve. Ndakokola kuva mwami wa Isiraeli ni Ivuyuda. Niiva yivi siviakuduuka, ngano ndakuha vinyingi haali kaviri kuli viene yivio. 9Kigira ki nuchaya amalago gange? Kigira ki nokora inguuva ndamanu yiyi? Ivi walaga Uria yiitirwi muvulwani. Waleka vandu va Amoni vamwiti; ma nuvugula mukali weve! 10Kalunu, muvuli likula valala ku visukululwi vovo valakuza likuza liekisaahi kigira ivi uvuli kuhulira inzi na uvuguyi mukali wa Uria. 11Nzisuha ku ivi ndi ndakora mulala kutura mu vandu vinyumba yooyo koleta uvudinyu ku ivi. Ulagalola ivi mwene lwa mbugura avakali vovo kutura ku ivi nukuvaha musaza wundi; kandi alagona navo havulavu na avandu va Isiraeli vaduuki kolola. 12Wakola vwoni mu vwivisu, navuzwa ndakora yaga gekoleka mbasu hagati kunangwa vandu va Isiraeli vosi valore.’ ”
13Daudi yavolera Nazani, “Mali kwonera Yahova.”
Nazani yativura, “Yahova ukusamihi; si ulakuza mba. 14Navuzwa kigira wakolegeliza Yahova, Mwana woovo alakuza.” 15Maku Nazani yazia yengo.
Muyaayi wa Daudi Yakuzaa
Yahova yakola muyaayi wu mukali mutiga Uria yivulira Daudi kuva mulwaye ligali. 16Daudi yasaala ku Nyasaye ndi mwana ahone. Yasura kulia kindu kali kikuzuzu kandi vuli vudiku yazia mu keng'oze chiche kandi naagona hasi uvudiku vwosi. 17Avakulundu vinyumba yeeye vazia kuye nivageriza kumuvukiza, navuzwa yasura na siyaali unyala kulia kindu navo mba. 18Mwana zana oyo yakuza inyima wi lisiza lilala, na vatumikiri va Daudi vaali avati kumuvolera ndi mwana ukuzi. Vavoola, “Lwu mwana yaali nakikiri mwoyo, Daudi siyaali unyala kovora kindu kali lwa kwamoloma naye mba. Kunyala ndi kumuvolera, umwana weve ukuzi? Hawundi anyala kwekola kindu kidamanu!”
19Lwa Daudi yalora nivamonyanaa, yamanya ndi mwana umali kukuza. Kunangwa yavateva, “Mwana ukuzi?”
Vamutivulira “Yee, ukuzi.”
20Daudi yavuka, niyisinga, nalomba liisu lilie nukwivaka maguta ma niyiviika zinguvu zizie. Maku yazia munyumba ya Yahova naamusigamira. Lwa yirana munyumba yu vwami, yateeva ahevwe chukulia nonoho lwa chetegekizwa, yikala nalia. 21Vatumikiri veve vamuteeva, “Kigira ki okolaa kuli ndi? Lwu mwana yaali mwoyo, wahonga lilia kandi nusioma, navuzwa kalunu ndi mwana ukuzi, uvuki kandi uliizaa!”
22Daudi yativura, “Yee, ndaahonga lilia nukulira lwu mwana yaali nakikiri mwoyo. Ndaaganagana ndi hawundi Yahova alambera zimbavasi, ma avuli koleka mwana akuzi. 23Navuzwa kalunu umali kukuza, kigira ki mburi kulia? Nyara kwilanyia mwana zana ave mwoyo? Lidiku lindi lilala inzi ndakazie aha aveeye, naye sianyala kwirana ku inzi kandi mba.”
Liivulwa lia Solomoni
24Ahene yaho Daudi yaaleminya mukali weve Bazisheba mwoyo, naava naye, kandi yivula mwana muyaayi uwa Daudi yagulika Solomoni. Yahova yayanza mwana oyo 25kandi nalaga muporofeti Nazani kugulika mwana oyo Jedidia#12:25 Jedidia: Lieta yili mu Luheburaina livoora “Muyanze wa Yahova.”, kigira Yahova yamuyanza.
Daudi Yagumira Raba
(1 Zin. 20:1-3)
26Ku ing'inga zana yeyo, Joabu yaazizagilira kulwaana Raba lidaala linene lia Amoni kandi yaali naveeye ahimbi kuligumira. 27Yatuma vatumwa ku Daudi navoora ndi; “Mali kwingilira Raba kandi mali kugumira havundu ha amazi gaturaa. 28Kalunu vungiza harara amahi googo gandi goosi, wingiliri lidaala linene zana na ulivuguli. Sinyenyaa mbuguli uluyali kigira ligumira lidaala yilio mba.” 29Kunangwa Daudi yavungiza harara amahi geege gatigala goosi, nazia kulwaana Raba, naalingilira kandi naligumira. 30Daudi yavugula itaji yi zahabu iyaali nuvulitu vwi zikilo salasini na tano kandi yaali namagina guvuguli vutambi muyo Moleki, umunyasaye wa vandu va Amoni. Daudi yavugula ligina liuvuguli zana kandi yaaliviika ku itaji yeeye. Yavugula kandi vilaanye vinyingi ligali kutura mu lidaala lia Raba. 31Yavika avandu valio ku miyinzi kuyinzira ni misumeno, magembe givivia, kandi zimbazi zie vivia, kandi naavaniga kuyinzira okolomba amadafali. Yakola malala mere ku avandu vosi va madaala gandi goosi ga Amoni. Maku oyo harara na avandu veve viirana Jerusalemi.
©Bible Society of Kenya, 2019