2 AVAMI 3
3
Vulwani hagati ha Isiraeli na Moabu
1Mu muhiga gwa komi na nane gwi liamiiha liu mwami Jehoshafati wi Ivuyuda, Joramu muyaayi wa Ahabu yagwa mwami wa Isiraeli na yamiha mu Samaria, ku mihiga komi na mbiri. 2Joramu yakola gaali uvwoni mu zimoni zia Yahova Nyasaye, navuzwa siyaali mudamanu kuli baba na mama weve Jezebeli mba. Yasambula munara gwa Baali, kifananyi cha baba weve yaali na lombi kigira lisigamira lia Baali. 3Navuzwa, kuli mwami Jeroboamu muyaayi wa Nebati, uwaali imbiri weve, yakola avandu va Isiraeli kokora uvwoni.
4Mwami Mesha wa Moabu yaali mutugi wa magondi, na vuli muhiga yahaana vusuuru ku mwami wa Isiraeli vwi vimeme via magondi 100,000 kandi vwoya vwa magondi mamigu 100,000. 5Navuzwa lwa mwami Ahabu yakuza, mwami Mesha wa Moabu yibaala nukutura ku mwami wa Isiraeli. 6Nonoho mwami Joramu yatura Samaria kandi navungiza harara amahi geege goosi.
7Yatuma amakuva ku mwami Jehoshafati wi Ivuyuda; navoora, “Mwami wa Moabu umali kwibaala ku inzi; ulahambana ninzi kuzia kumulwana?”
Mwami Jehoshafati yativura navoora, “Inzi ndakora ndio. Inzi mbeeye hasi hu vunyali vuvwo harara na avandu vange kandi ni zibarasi ziange kuli zizio. 8Na kuziiri kunzira ki lwa kuvingilira?”
Joramu yativura, “Kulaziira kunzira yi changalangwe cha Edomu.”
9Kunangwa mwami Joramu na vami vi Ivuyuda na Edomu yaatanga logendo. Inyima wo kogenda ku madiku saba, vadaka amazi, na sihaali ho na gatigala aga vasaza vi liihi kandi agi zinyama ziavagingiraa vindu mba. 10Maku Mwami Joramu wa Isiraeli yavoola, “Kunyi kuudivi! Yahova uviiki kunyi vavaga haasi hi zinguru ziu mwami wa Moabu!”
11Mwami Jehoshafati yateeva, “Hakaveeye ho nu muporofeti uwa Yahova wa kunyala koteeva vulaliri vwa Yahova?”
Maku Munene wa mahi gu mwami Joramu yativura, “Elisha muyaayi wa Shafati aveeye hano. Yaali mulondi wa Elija.”
12Mwami Jehoshafati yateeva, “Aveeye muporofeti wa giligali.” Kunangwa avami vavaga yavo vazia ku Elisha.
13Elisha yavolera mwami wa Isiraeli, “Kigira ki ngokonye? Zia uteeve avaporofeti yavo ava baba na mama woovo vateeva.”
Navuzwa Joramu mwami wa Isiraeli yativura, “Awa! Yahova niyie uviiki kunyi avami vavaga hasi hi zinguru ziu mwami wa Moabu.”
14Elisha yativura, “Nzisuha ku lieta lia Yahova oveeye mwoyo, uwa inzi ndumikiraa, ndaavura kuva nu luyali ku mukonyeleri woovo, Jehoshafati, mwami wi Ivuyuda, sindakenyi ngolole mba. 15Lero, ndeteri mundu wu kwimba zinyimbu.” Lwu mwimbi wi zinyimbu yakuba uvukana, zinguru zia Yahova ziaza ku Elisha; 16kandi yavoola, “Yaga nigo ga Yahova avoora, ‘Yavi mitaro ja mazi mu lwaalo lwu mugera mwumu yigu. 17Kali ni muvura kolola imbura kinga imbuza, lwaalo lwu mugera yigu lulizura mazi; na munyi harara ni mitugu jenyu kandi ni zinyama zimulonda zilava na mazi manyingi gu kunwa.’ ” 18Elisha yaazizagilira, “Navuzwa kindu yiki ne kedoto ku Yahova kokora, alamuha kandi vuguuti ku Vamoabu. 19Mulaguuta madaala manene malahi gaavo gi zimbinga; mulatema misaala jaavo ja makuyu josi, nu kwigalira vidaho viavo, kandi mwonogonyie milimi migunamu jaavo nu kugifuuma josi na magina.”
20Mugamba gwalonda ku, ku ing'inga yu kuhaana visiuviliru via mugamba kuli kazozo, amazi gaaza nigagenda kutura lovega lwa Edomu nigakunika kivala choosi.
21Lwa Moabu vahulira ndi avami vavaga yava vaali ni vazi kuvingilira, avasaza vosi vaali vanyara kuginga viuma viu vulwani, kutura ku musakulu ligali kuduuka ku muyaayi mukekeeke, valangwa harara kandi ni vasingirizwa ku lwako ni vetegeki kulwaana. 22Lwa vavuuka mugamba gwalonda ku, liuva liali ni liaka ku mazi, niligakola gave amakanyu kuli amasahi.
23Vavoola, “Gaveeye amasahi! Mahi gavaga ga vasigu kuduuka gave gaali kulwaana nu kwiitana aveene na vene! Gendi kuzie kulanya hokososa haavo.”
24Navuzwa lwa vaduuka hokososa, Vaisiraeli vavingilira nu kuvakunga nu kuviranyia inyima. Vaisiraeli vazizagilira livalolendelera, ni vita Avamoabu, 25nu kudiviza madaala manene gaavo. Lwa vavita mu mulimi mugunamu, vuli Mwisiraeli yalasa magina mugwo kuduuka mulimaliriza milimi josi jakunikwa na magina; vigalira kandi vidaho viavo nokotema misaala jaavo josi ja makuyu. Mu limalirika, lidaala linene ku goosi lia Kiri Hareshezu lialekwa na valasi va magina valikumbiriza nu kulingilira.
26Lwu mwami wa Moabu yamanya ndi azizaa kuguutwa mu vulwani, yavugula vasaza vi vivavi mia saba harara naye kandi nageriza kuvitira mu zimbaso zia vasigu aduuki kwirukira ku mwami wa Siria, navuzwa siyanyariza mba. 27Kunangwa yavugula muyaayi weve mukulundu awaali yakavuguyi ovogono vwivwe kuli mwami, namuhaanira ku lidigi lie lidaala linene kuli kisiuviriru ku munyasaye wa Moabu. Vaisiraeli vatihizwa ligali, na ndio vamanya ni virana inyima kutura mu lidaala linene ni virana mu kivala chavo aveene.
©Bible Society of Kenya, 2019