Lwimbu lwa Solomoni 2
2
1Inze mbeye kimuli kya Sharon,
Mbeye ubulavidzu bwomwivona.
2Kuli ubulavidzu bu veye hagati ha mafwa,
Ni ndiyo muyanze wange a veye hagati ha vakana.
3Kuli muchungwa gu veye mu misala gyommulitu,
Ni ndiyo muyanze wange a veye mu vayai. Ndikala hasi mu kiriri kikye nobusangali bunene,
Na makuyu gege ga nda tsatsama ga li amanolu ligali.
4Ya ndeta mu inyumba yokuliira mu lisavo,
Nebendera yeye ya li ku inze ya li ubuyanzi.
5Mbike tsingulu namazabibu amu mu, u mbodzeridze nomuchungwa
Kigira saliranga nobulwaye bwobuyanzi bu letanga.
6Mukono gwigwe mmosi gu veye isi womutwe gwange,
Nomukono gwigwe mulungi gu mkumbereye.
7Nzisuhidza mwinye, O vakana va Yerusalemi
Ku visusu noku tsimboongo tsyomigendanyama,
Mu ta sagannya, kandi mu ta vukidza muyanze wange,
Kuduka a yanza mwene.
8Gu veye mwoyo gwomuyanze wange henza, yadzanga,
A tumatumanga mu vigulu, nokukina mu tugulu.
9Muyanze wange a veye kuli kisusu kinga imboongo isoleli:
Henza, a singiranga inyima welidigi lyetu;
A henzereranga mu madirisha;
Yelolekidza mwene mu vibao vyomu madirisha.
10Munyanze wange ya vola, na ya mbolera,
Vuka, muyanze wange, mulahi wange, ku tsie.
11Kigira, henza, inyinga yobukindu i nti;
Imbula i duki i viti
12Vimuli vi loleka ku lirova;
Inyinga yelyimba lyamanyonyi i duki,
Mwoyo gwelikuulu gu hulirangwa mu kivala kyetu;
13Mukuyu gwengidzanga makuyu gagwo magingi,
Na mizabibu gyi lavidzanga;
Gyi lusanga malusu gagyo.
Vuka, muyanze wange, mulahi wange, ku tsie.
14O likuulu lyange, u veye mu tsimbwa tsyamagina,
Mu lyevisa lyoku kisulungutu,
Leka ndole mmoni mumwo,
Leka mbulire mwoyo gugwo;
Kigira mwoyo gugwo gu veye munolu, na mmoni mumwo mu veye mulahi.
15Ku gumire vinywere, vinywere vikekeke
Vyononyanga milimi gyamazabibu;
Kigira milimi gyetu gyemizabibu gyi lavidzi.
16Munyanze wange a veye wange, na inze ni wewe:
Yayanga kyayo kikye kyamagondi mu bulavidzu.
17Kuduka lwa mbasu gu sima, na viriri vi vita,
Wirane, muyanze wange, u ve kuli kisusu kinga imboongo isoleli
Ku vigulu vya Betheri.
©Bible Society of Kenya, 1967