Zaburi 89
89
Lyegidza lya muezarahi.
1Ndimba tsimbabasi tsyobuyanzi tsya Yahova mihiga nemihiga:
Nomunwa gwange nda lolekidza ubusuuvirifu bubwo ku makula gosi.
2Kigira mbola, Tsimbabasi tsi lombakwa mihiga nemihiga;
Ubusuuvirifu bubwo u la singeridza mu ligulu lyene.
3Nombi lilagana nomutovole wange,
Nzisuhiye Daudi mutumekiri wange:
4Kisukululwi kikyo nda singiridza mihiga nemihiga
Na ndombaka intebe yobwami bubwo ku makula gosi. [Selaha
5Magulu ga lidzominya vyokugenya vivyo, O Yahova;
Na ubusuuvirifu buhwo mu livugana lyavatakatifu.
6Kigira migulu ha veye na bwaha u nyala kuleng'anywa na Yahova?
Na ibwaha a veye kuli Yahova mu avana vetsingulu,
7Nyasaye welitihidza mu livugana lyavatakatifu,
Nokutibwa kuvita yavo vosi ava mu kumbiridza?
8O Yahova Nyasaye wa mahe,
Ibwaha u veye wetsingulu, kuli ive, O Yahova?
Na ubusuuvirifu bubwo bu ku kumbiridza hosi.
9Ive wamehanga uluyai lwenvanza:
Viguvuli v yayo lwa vyegingira, ive u vi kiring'annya.
10Ive u shonolannyi Rahabu kuli wiiteywi;
U salanyi avasigu vovo nomukono gwetsingulu tsitsyo.
11Magulu na gogo, na lirova kandi ni lilyo:
Avelirova na vizula vyalyo, ive wa vi lomba muse.
12Kasikasini na kusini, ive wa vi lomba:
Taboru na Herimon vi sangala mu lieta lilyo.
13U veye nomukono gwobunyali;
Mukono gugwo gu veye netsingulu, mukono gugwo mulungi gu veye munene.
14Ubulungi na likalaga vi veye muse vwentebe yobwami bubwo:
Tsimbabasi na ageligali vimiriranga imbiri wetsimoni tsitsyo.
15Avandu ava manya isango va veye nobugasu:
O Yahova, va gendanga mu bulavu bwommoni mumwo.
16Mu lieta lilyo va sangala lidiku lyosi bei;
Na mu bulungi bubwo va nenehidzwa.
17Kigira ive u veye ubukumi bwetsingulu tsyavo;
Na mu bulahi bubwo ulwiga lwetu lu la nenehidzwa.
18Kigtra ingavo yetu i veye ya Yahova;
Na Mutakatifu wa Israeli a veye Mwami wetu.
19Kunangwa wa volera avatakatifu mu liloto,
Na wa vola, Mbiki ubukonyi ku mulala wetsingulu; Nnenehidzi mulala mutovole ku avandu.
20Nyoye Daudi mutumekiri wange;
Mmu vaki namaguta gange matakatifu:
21Wekigalo kyange ki la luvirira kuye
Na mukono gwange gu la mu vika tsingulu.
22Musigu si a la mu dambidza,
Kandi mwana wobudamano si a la mu kupidza kivi.
23Nda donyannya avasigu veve imbiri wewe
Nda kuya yavo ava mu dunyira.
24Navutswa ubusuuvirifu bwange na tsimbabasi tsyange tsi la va halala naye;
Na mu lieta lyange ulwiga lwilwe lu la kuminywa.
25Na nda vika mukono gwigwe ku inyanza
Na mukono mulungi gwigwe ku migera.
26A lanira ku inze, Ive u veye dada wange,
Nyasaye wange, na ulwanda lwobuhonyi bwange.
27Kandi nda mu kola kuva wokutanga kwivulwa wange,
Na munene ku avami velirova.
28Tsimbabasi tsyange nda mu lindira mihiga nemihiga;
Na lilagana lyange li la singira halala naye.
29Kisukululwi kikye kandi nda kola kumenya mihiga nemihiga,
Na intebe yeye yobwami kuli madiku gomigulu.
30Avana veve ni va leka malago gange,
Na va vula kugenda mu likalaga lyange;
31Ni vononnya munwa gwange,
Na va vula kugumira amalago gange;
32Hene yaho nda va kuya nempimbo kigira mahyolo gavo,
Na nda va kuya kigira ubukyamu bwavo.
33Navutswa tsimbabasi tsyange nda vula kutwulidza kuye ligali,
Kandi si nda leka ubusuuvirifu bwange kugwa.
34Si nda vunannya lilagana lyange,
Kandi si nda girunkannya aga twula mu minwa gyange.
35Inyinga indala ndisuha ku ubutakatifu bwange;
Si nda veha ku Daudi mba:
36Kisukululwi kikye ki la hindira mihiga nemihiga,
Na intebe yeye yobwami kuli liuva imbiri wange.
37I la dinyiridzwa mihiga nemihiga kuli mweli,
Na kuli lilolekidza lyobusuuvirifu lyomigulu. [Selaha
38Navutswa ive wa sikisi na wambakani,
Na u dunyiye mbake wowo.
39U suye lilagana lyomutumekin wowo:
Wa guluye itaji yeye kali ku lirova.
40Wononnyi tsinzebo tsitsye tsyosi;
U koli madigi gege kuva madivi.
41Vosi ava vitanga ku inzira va mu fwula:
U gwiye kyokulegwa ku vatende veve.
42U nenehidzi mukono mulungi gwavasigu veve;
U yanzidzi avasigu veve vosi.
43Yee, u duhidza ubwogi bwekivan kikye,
Na u vuli kumusingeridza mu bulwani.
44U heridzi ubunifu bwibwe
Na u tsomi hasi intebe yobwami bwibwe.
45U gehidzi madiku gobusoleri bwibwe:
U mu viki tsisoni. [Selaha
46Kuduka inyinga ki, O Yahova? U levisa mihiga nemihiga?
Kuduka inyinga ki ubutima bubwo bu laaka kuli muliru?
47Widzulitse kuli inyinga yange i veye inkekeke ndi:
U lombeye vyavutswa ki avans va avandu vosi
48Ni mundu ki u li hindira kazozo a vule kulola likudza
U nyala kwehonnva mwene mu mukono gwe Kihadisi? [Seleha
49Yahova, Tsimbabasi tsitsyo tsya kale tsi veye haliha,
Tsya wesuhira Daudi mu busuuvirifu bubwo?
50Widzulitse, Mwami, linyegwa lyavatumekiri vovo
Kuli ng'inga mu kiritu kyange amanyego gavandu vosi vetsingulu,
51Aga vasigu vovo va nyeganga, O Yahova
Na aga va nyeganga virenge vyombake wowo.
52Yahova a gasidzwe mihiga nemihiga.
Amini, na Amini.
©Bible Society of Kenya, 1967