Zaburi 78
78
Zaburi ya Asafu.
1Mwinye avandu vange, mu huliridze lilaga lyange:
Mu yekidze amatu genyu kuhulira livola lyomunwa gwange.
2Nda kunula munwa gwange kukupa lugano;
Nda vola ga viswa aga veye ga kale.
3Aga ku huliye, ni ku ga manyi,
Aga avaguga vetu va ku voleye.
4Si ku la ga visa ku avana vavo
Ku la volera kisukululwi ki londanga lidzominywa lya Yahova,
Na tsingulu tsitsye, na vyokugenya vya ya kola.
5Kigira ya singeridza lilolekidza mu Yakobo,
Na ya vika lilaga mu Israeli,
Lya ya laga avaguga vetu,
Kumannya avana vavo;
6Kisukululwi ki londanga ki duke kulimanya, kali avana va livulwa;
Ava li singira nokulivola ku avana vavo,
7Va duke kuvika lisuuvira lyavo ku Nyasaye
Na va vule kwivirira vikolwa vya Nyasaye,
Navutswa va gumire amalago gege,
8Na va vule kuva kuli avaguga vavo
Ava li kisukululwi kyobwebaali na kyokutinguha,
Kisukululwi kya vula kulungikidza mwoyo gwakyo,
Na mwoyo gwakyo si gwa dinya ku Nyasaye mba.
9Avana va Efiraim, ava veye nevyuma, na va ginganga buta,
Virana inyima ku lidiku lyelihe.
10Si va gumira lilagana lya Nyasaye,
Na va sula kugenda mu malago gege;
11Na vivirira vikolwa vivye,
Na vyokugenya vya ya va mannya.
12Ya kola vyokugenya mu tsimoni tsya avaguga vavo
Mu kivala kya Egepeti, na mu mulimi gwa Zoan.
13Yavukanya inyanza, na a vambukidza engereka;
Ya singeridza amadzi kuva kuli kitumi.
14Kandi ya vimirira nelilesi mbasu,
Na ubudiku bei ya rimirira nobulavu bwomuliru
15Yatanya tsinyanda mwigendanyama,
Na a va nwehidza amadzi manyingi kuli agoluliva lunene.
16Naye ya twulidza amadzi ku lwanda
Na a tsuka amadzi kuli migera.
17Navutswa va meda kukola ubwonl kuye
Nokuhing'ana ku uyu U Veye Weigulu Ligali, mu kyangalangwi.
18Na va geridza Nyasaye mu myoyo gyavo
Ku lisaala vyokulia kuli likayirwa lyavo.
19Yee, va tala Nyasaye ubudamano;
Va vola, Nyasaye a nyala kwaala imeza mwigendanyama?
20Henza, ya kuya lwanda, kuduka amadzi ga senuka,
Na migera gyizula
Kandi a nyala kukuha ubukima?
Kandi a nyala kuletera avanduveve inyama?
21Kunangwa Yahova ya hulira, na a vihirirwa;
Na muliru gwaakidzwa ku Yakobo Na ubutima bwa twulira Israeli;
22Kigira si va suuvira Nyasaye mba
Kandi si va suuvira ubuhonnyi bwibwe
23Navutswa ya laga malesi gegulu,
Na yigula miliango gyomigulu;
24Ya kupidza imbuia ya mana va duke kulia
Na a va ha vyokulia kutwula migulu.
25Mundu sa mulala ya lagira ubukima bwa wetsingulu:
Ya va ha vyokulia vyokuvigutidza.
26Ya gendidza imbuudza yevugwe migulu;
Yimirira imbuudza ya kusininetsingulu tsitsye.
27Ya kupidza kuvo imbula ye inyama kuli ulugukyi,
Na manyonyi getsimbaha kuli muyeke gwenyanza:
28Na ya ga yeridza hagati hobusosero bwavo,
Ku kumbiridza ubumenyo bwavo.
29Kunangwa va lia, na viguta;
Na a va ha lyenya lyavo.
30Si va vukanywa nelikayirwa lyavo
Vyokulia vyavo vya li ni vi veye mminwa gyavo,
31Lwa ubutima bwa Nyasaye bwaaka kuvo,
Na bwiita kuvo avakomera
Na bwa tsoma hasi avasoieli va Israeli.
32Ku yaga gosi, va hongera kukola ubwoni,
Na va vula kusuuvira makuva gevikolwa vivye vyokugenya.
33Kunangwa ya heridza madiku gavo mu vyavutswa,
Na mihiga gyavo mu ubutii.
34Lwa ya viita, ma va mwenya;
Navo virana nokwenya Nyasaye ligali.
35Na vidzulitsa Nyasaye a veye lwanda lwavo
Na Nyasaye Weigulu Ligali mu honyi wavo.
36Navutswa va mu volera makuva madoto geminwa gyavo,
Na va veha kuye nolulimi lwavo.
37Kigira mwoyo gwavo si gwa li mulungi kuye,
Kandi si va veye avasuuvirifu ku lilagana lilye mba.
38Navutswa kigira a veye wetsimbabasi, ya sameha ubukyamu bu avo, na si ya vononnya mba:
Yee, hali kanyingi ya twula ku ubutima bwibwe,
Na si ya vukidza ubululu bwibwe bwosi.
39Naye yidzulitsa va veye inyama vutswa, Na ua veye imbuudza i vitanga, i vula kwirana mba.
40Hali kanyinga va hing'ana naye mwigendanyama,
Na va mu vereridzira mu kyangalangwi
41Na va girunkana ni va geridza Nyasaye,
Na vatira Mutakatifu wa Israeli lwako.
42Si vidzulitsa mukono gwigwe,
Kinga lidiku lya ya va honnya ku musigu;
43Kuli ya singeridza lilolekidza lilye mu Egepeti,
Na vyokugenya vivye mu mulimi gwa Zoan,
44Na girunkannya migera gyavo kuva masahi
Kandi amadzi gagyo kuduka avene si va nyala kunwa mba.
45Ya leta kuvo maduuma getsingi, tsya va luma;
Na makere aga vononnya.
46Ya haana vyamera vyavo ku lisa,
Na ya haana miyinzi gyavo ku tsisigi.
47Yononya mizabibu gyavo nembula yamagina,
Na mikuyu gyavo ya gyiita nobukindu.
48Ya vika imihlgu gyavo ku imbula yamagina,
Na vyayo vyavo ya vika ku luheni lwoluya.
49Ya tsuka kuvo ubululu bwobutima bwibwe,
Livihirirwa, na ubudunyi, na kivi,
Lya li lihila lyekiduma kyengelosi tsyobudamano.
50Ya lombera ubutima bwibwe inzira;
Si yigalira likudza ku mwoyo gwavo,
Navutswa ya haana livamwoyo lyavo ku ubulwaye.
51Na ya kuya vosi ava tanga kwi vulwa mu Egepeti,
Avanene vetsingulu tsyavo mu mahema ga Ham.
52Navutswa yimirira avandu veve kuli magondi,
Na a va gendidza kuli kyayo mwigendanyama.
53Ya vimirira bulahi, kuduka va vula kutia;
Navutswa inyanza ya kunika avasigu vavo.
54Ya va leta ku lwako lwobutaka tifu bwibwe
Ku kigulu yiki kyomukono gwigwe mulungi gwa nyola.
55Ya kunga avetsihiri imbiri wavo,
Ya va gerera miyandu gyavo nomugoye
Ya haana tsihiri tsya Israeli kumenya mu mahema gavo.
56Navutswa va geridza nokuhing'ana na Nyasaye Weigulu Ligali,
Kandi si va gumira lilolekidza lilye;
57Navutswa virana inyima, ni va kola nobugadi kuli avaguga vavo:
Na va kyama kuli ubuta bu ta li nobusoga.
58Kigira va mu vihiriridza nevitumi vyavo vyobwali,
Nokumukendekidza nevifwananyi vyavo vyavadzwa.
59Nyasaye ya hulira, na a vihirirwa,
Na a sula Israeli ligali
60Kunangwa ya leka iibema lya Shilo,
Lihema lya yembaka hagati; ha avandu;
61Na a haana tsingulu tsitsye tsi lanywe Na ubukumi bwibwe ya vika mu mukono gwomusigu.
62Ya haana avandu veve ku kivavi,
Kandi ya vihirirwa nemiyandu gyigye.
63Muliru gwa samba avasoleli vavo;
Na avakana vavo si va li netsinyimbu tsyekiserero.
64Avasalisi vavo va gwa nekivavi;
Na avakunzakali si va lira.
65Hene yaho Mwami ya vuka kuli u gonanga tsindolo,
Kuli mundu wetsingulu u kupanga lwanga kigira iwaini.
66Na ya duya avasigu veve, na a virannya inyima:
Nokuvavika mutsisoni tsyemihiga nemihiga.
67Kandi ya sula lihema lya Yosefa,
Na si ya tovola ihiri ya Efiraim,
68Navutswa ya tovola ihiri ya Yuda,
Kigulu kva Zioni kya ya yanza.
69Na yombaka hatakatifu hehe kuli tsisonga tsye vigulu,
Kuli lirova lya ya lomba muse mihiga nemihiga.
70Ya tovola Daudi mutumekiri wewe,
Na ya mu twulidza mu vigo vya magondi:
71Kutwula inyima wa magondi aga veye na avana vago ya mu leta
Kuva mwayi wa Yakobo avandu veve, na Israeli miyandu gyigye.
72Kunangwa ya li mwayi kuli ubu dukiru bwomwoyo gwigwe,
Na a vimirira nobusidza bwamakono gege.
©Bible Society of Kenya, 1967