Zaburi 7
7
Lwimbu lwa Daudi yimbira Yahova kigira makuva ga Kushi Mubenjamini
1O Yahova, Nyasaye wange, nzirukira ku ive:
U mbonnye ku vosi ava nondanga, nokumbonnya,
2Gase va la tandula mwoyo gwange kuli king'ang'a,
Nokugudonyannya ha vule kuva na u honnyangwa.
3O Yahova Nyasaye wange, ni mba ni nda kola yibu;
Na mmakono gange ni mu va ni mu veye nobukyamu;
4Ni mba ni nzirannyi ubudamano ku uyu u veye nemirembe ku inze
(Yee, mmali kuhonnya uyu u veye mudambidzi wange bugira kindu);
5Kunangwa musigu wange a twulire mwoyo gwange, nokugugumira;
Yee, a duvage livamwoyo lyange hasi mmarova,
Nokuvika ubukumi bwange mu lugukyi [Selaha
6U vuke, O Yahova, nobutima bubwo;
Wenenehidze ku butima bwa vasigu bwange,
U mbukire; u mali kulaga likalaga.
7Livugana lya avandu li ku kumbiridze;
Na ive wirane igulu kigira u veye igulu kuvo.
8Yahova a la kalagira avandu:
U nkalagire, O Yahova, kuli bulungi bwange, na kuli ubudukanu bu veye ku inze.
9Ubudamano bwa avadamano bu
heridzwe, navutswa u dinyeridze avalungi:
Kigira Nyasaye mulungi a geridza tsiganagani na myoyo.
10Ingavo yange i veye ku Nyasaye,
U honnyanga avemyoyo milungi.
11Nyasaye a veye mukalagi mulungi,
Yee, Nyasaye u veye nobutima kazozo.
12Mundu na a vula kwirana, a la hyagala kivavi kikye;
U mali kunyira buta bwibwe nokubuhingira;
13U mu lohidziye viyuma vyelikudza;
A kolanga mibano gyigye kuva gyolumema lwomuliru.
14Hene, mudamano a lumangwa kwivula ubudamano;
Yee kivi ki veye inda yeye, na yivula ubugadi.
15U mali kuyava ubogo, nokubulomba,
Naye mwene u gwiye mu bogo bwa ya yava.
16Kivi kikye ki lirana ku mutwe gwigwe,
Na kirage kikye ki lika ku lwote lwilwe.
17Ndidzominya Nyasaye kuli ubulungi bwibwe
Na nda gasidza lieta lya Yahova U Veye Igulu Ligali.
©Bible Society of Kenya, 1967