Zaburi 63
63
Zaburi ya Daudi, lwa ya li mwigendanyama lya Yuda.
1O Nyasaye, ive u veye Nyasaye wange; nda kivira kwenya ive:
Mwoyo gwange gu veye nobuluhu ku ive, mubiri gwange gwenya nga ive
Mu kivala kyumu nokuluhidza, ha amadzi ga vula.
2Na ndiyo nku henzi mu hatakatifu,
Kulola tsingulu tsitsyo na ubukumi bubwo.
3Kigira tsi nbabasi tsyobuyanzi bubwo tsi veye tsindahi kuvita livamwoyo,
Minwa gyange gyi lidzominya ive.
4Na ndiyo nda ku gasidza lwa mbeye mwoyo:
Nda ginga makono mu lieta lilyo.
5Mwoyo gwange gu liguta kuli gu veye nobuhaali na maguta
Munwa gwange gu la kwidzominya neminwa gyobusangali;
6Lwa ndidzulitsa ive ku kitali kyange,
Na nganagananga ive inyinga yobudiku.
7Kigira ive u veye mukonyi wange,
Kandi mu kiriri kyetsimbaha tsitsyo, nda sangala.
8Mwoyo gwange gu londanga ive ligali:
Mukono gugwo mulungi gu singeridza inze.
9Navutswa yavo avenyanga mwoyo gwange kugwononnya,
Va la tsia musi mwelirova.
10Va la vikwa mu tsingulu tsyekivavi:
Va la va kidieli kyevibwe.
11Navutswa mwami a la sangala mu Nyasaye:
Ku vosi wisuhanga kuye a lidzominya;
Kigira minwa gya yava ava vola ububehi gyi la kunikwa.
©Bible Society of Kenya, 1967