Zaburi 45
45
Ku Munene Wetsinyimbu: Lwimbu lwe lirerererwa lyo Mwami. Zaburi ya Avana va Kora.
1Mwoyo gwange gwizuye amakuva malahi;
Mbola vindu vya nombeye mwami:
Lulimi lwange lu veye ikalamu yomung'odi mugulu.
2Ive u veye mulahi kuvita avana va avandu;
Tsimbabasi tsi tsukeywi mu minwa gyigyo:
Kigira yaga Nyasaye u ku gasidzi ubugasu bwemihiga nemihiga.
3Webohe kivavi kikyo ku kikenge kikyo, O ive wetsingulu,
Na ubukumi bubwo na ubunene bubwo.
4Na mu bunene bubwo u gende nobugasu,
Kigira ageligali na ubuhoma na ubulungi:
Na mukono mulungi gugwo gu la ku mannya vindu vyokutihidza.
5Mibano gyigyo gyi veye miyugi;
Avetsihiri va gwidza isi wowo;
Gyi veye mu mwoyo gwavasigu vomwami.
6Intebe yoyo yobwami, O Nyasaye, i hindiraga mihiga nemihiga:
Impimbo yobulungi i veye impimbo yobwami bubwo.
7Ive u yanzi ubulungi, nokudunyira ubudamano:
Kigira yaga, Nyasaye, Nyasaye wowo, u ku vaki
Maguta gobuyanzi kuvita avakye vovo.
8Tsingubo tsitsyo tsyosi tsi funya
mwayu gwa manemane, na uudi, na kida;
Mutsinyumba tsya amino getsinzogu, ubukana bwa ku yanzidza.
9Avakana va avami va veye halala na avakali vovo avidzomi nywa:
Ha mukono mulungi gugwo, mwami wekikali u singiye, wiviki ithahabu ya Ofiru.
10Hulira, ive mukana, u lole, u tegidze ugutu gugwo;
Na wivirire avandu vovo mwene, na avenyumba ya dada wowo:
11Ku yaga mwami a lenya ubulahi bubwo;
Kigira a veye mwami wowo; na ive u mu sigamire.
12Kandi mukana wa Turo, a la ra yo nekihaanwa;
Avatugi mu avandu va lenya tsi mbabasi tsitsyo.
13Mukana womwami a veye nobu kumi ligali mu inyumba yobwami:
Tsingubo tsitsye tsi lombeywi nethahabu.
14A la letwa ku mwami netsingubo tsyobubahbale:
Avakana avagima avakye veve ava mu londanga Va la letwa ku ive.
15Va la letwa nobuyanzi na ubusangali:
Va lingira mu inyumba yomwami.
16Mu bugono bwa vaguga vovo, va la va ho avana vovo,
Ava u la kola avanene mu lirova lyosi.
17Nda kola lieta lilyo lidzulitswe mu makula gosi:
Kunangwa avandu va la ku santidza mihiga nemihiga.
©Bible Society of Kenya, 1967