Vafilipi 2
2
1Kunangwa ni li ve ho litsuuva mu Kristo kali likekeke, kinga lileminya mwoyo mu buyanzi, kinga lisanga lya Roho kinga tsimbabasi tsyeligali kinga livererera, 2mwizulitse lisangala lyange, mu ve nomwoyo mulala, avobuyanzi bulala, avomwoyo mulala, avobulaliri bu lala. 3Mu ta kola kindu kali kilala nelihing'ana kinga kwenya ubukumi bwa vutswa, navutswa mu lyegehidza lyomwoyo mundu sa mulala a lole wundi kuva munene kuye mwene; 4mundu sa mulala a ta linda vindu vivye mwene, navutswa sa mulala a linde kandi vindu vyavandi. 5Mu ve nobulaliri yibu obwa li ku mu Kristo Yesu; 6uyu, wa li ku lugano lwa Nyasaye, si ya lola lile ng'ana na Nyasaye ni kindu kyokuhandwa ku, 7navutswa mwene yenavula, na a vugula lugano lwomu tugwa, na a gwa kuli lifwanana lyomundu; 8kandi kigira ya loleka kuva neligondo lyomundu, mwene yegehidza, na a bugirira likudza, yee kali likudza lyomusalaba. 9Kigira yaga Nyasaye ya mu kuminya ligali, na a mu ha lieta li veye igulu wameta gosi; 10ga duke kusigamwa amalu gosi mu lieta lya Yesu, aga va veye migulu, naga va veye mu lirova, naga va veye mugati mwelirova, 11kandi tsinimi tsyosi tsi duke kweyama Yesu Kristo a veye Mwami, kuduka ku bukumi bwa Nyasaye Dada.
12Kunangwa, avayanze vange mu dukidze ubuhonnyi bwenyu avene nobutii nelidegera, kuli mwa hulira madiku gosi, si ya li inyinga ya nda li ho, navutswa kalunu kuvita ligali inyinga ya nta li ho. 13Kigira a veye Nyasaye u kolanga mu mwinye lyenva nelikola, kigira liyanzidzwa lilye. 14Mu kole vindu vyosi bugira limonya nobuhing'ani; 15mu duke kuva avana va Nyasaye ava ta li nekindu kuvo, kandi avobuhokya, ava ta li nembala mu makula makyamu nagekirage aga mu lolekera mu kuva kuli avamulika mu lirova, 16ni mu lang'aminya likuva lyelivamwoyo; inze nduke kunyola kya nzidzominyira mu lidiku lya Kristo, kigira si nda nyagula vutswa kandi si nda yinzira vutswa. 17Yee, ni ntsukwa ku isadaka noku butumwa bwelisuuvira lyenyu, nsangala, kandi nsangala halala na mwinye mwosi: 18kandi mwinye ndiyo mu sangale kandi mu ve nobusangali halala na inze.
19Nawtswa nsuuvira Mwami Yesu kutuma Timoteo yadze ku mwinye bwangu, inze nduke kulema mwoyo lwa mmanya liva lyenyu. 20Kigira si mbeye nowundi kali mulala u veye nomwoyo kuli gwange, u li henzeridza liva lyenyu ligali. 21Kigira vosi venya vyavo avene, si venyanga vindu vya Yesu Kristo. 22Navutswa mu manya ligeridzwa lyowa zana, uyo a veye kuli mwana a tumekira ise, na ndiyo ya kola miyinzi halala na inze ku lilandidza ivangeli. 23Kunangwa nsuuvira kumutuma bwangu, inyinga ya ndola liva lyange wa li va: 24navutswa nsuuvira Mwami inze mwene kandi ndadza bwangu. 25Navutswa nda lola ga ndukira kutuma ku mwinye Epafradito, amitu wange, wa ku sangi naye miyinzi, kandi musikari halala na inze, naye nu mutumwa wenyu, kandi mutumiki ku budaka bwange; 26kigira ya kayirwa mwinye mwosi ligali, kandi ya verera ligali kigira mwa hulira a lwala. 27Kigira ya lwala na a va himbi likudza; navutswa Nyasaye ya mu vererera; si ya li iye yeng'ine, navutswa inze kandi, nta va neliverera mu liverera. 28Kigira yaga nda kira kukola bwangu kumutuma, ndi, lwa mu duka kumulola kandi, mu nyala kusangala, kandi inze ngehidzwe ubuvereri. 29Mu mbugirire mu Mwami nobusangali bwosi; kandi mu validze ava veye kuli uyu mu vidzominye: 30kigira ku miyinzi gya Kristo ya li himbi likudza, ya vika livamwoyo lilye mu buhimwa a duke kwizulitsa kya gehera mu litumika lyenyu ku inze.
Currently Selected:
Vafilipi 2: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
