Livalidza 9
9
1Na Yahova ya kyangalangwi kya Sinai, mu mweli gwokutanga gwomuhiga gwa kaviri inyima welitwula lyavo mu kivala kya Egepeti, na a vola, 2Kandi avana va Israeli va gumire lilia lyelipasaka ku inyinga yalyo ya lya lagwa. 3Mu lidiku lyelikumi na gane lyomweli yigu, ku inyinga ya mgolova, mu la lomba lilia ku inyinga yalyo ya lya lagwa: kuli lilaga lyalvo lyosi li veye, na Kuli amalago gaiyo gosi mu la li gumira. 4Na Musa ya volera avana va Israeli, va lombe lilia lyelipasaka. 5Na va lomba lilia lyelipasaka mu mweli gwokutanga, lyelipasaka mu mweli gwokutanga, ku lidiku lyelikumi na gane, mgolova, mu kyangalangwi kya Sinai: kuli gosi ga Yahova ya laga Musa, avana va Israeli va kola ndiyo. 6Na va li ho avasatsa avalala, ava kolwa avadamano kigira mukudzu gwomundu, kuduka va ta nyala kugumira lilia lyelipasaka ku lidiku yilyo lyene: navo vadza imbiri wa Musa na Haruni ku lidiku yilyo: 7na avasatsa yavo va mu volera, Kwinye ku veye avadamano kigira mukudzu gwomundu: kigira ki ku gayeywi, ku ta nyala kuhaana kihaanwa ku Yahova ku inyinga yakyo ya lagwa hagati ha avana va Israeli? 8Na Musa ya va volera, Mu linde, nduke kuhulira kya Yahova a la laga kumwinye.
9Na Yahova ya volera Musa, na a vola, 10U volere avana va Israeli, na u vole, Mundu ku mwinye kinga ku visukululwi vyenyu, ku vosi u veye mudamano kigira mukudzu, kinga na a veye ihale mu lugendo, navutswa a la gumira lipasaka ku Yahova. 11Mu mweli gwa kaviri, ku lidiku lyelikumi na gane lyomweli, mgolova va la li gumira; va la li lia halala nobukima bu ta li na mamera, na tsingutsa tsindulu: 12na va vule kuleka kindu kulyokudukamugamba, kandi va ta vunanya kigumba kyalyo: kuli lilaga lyosi lyelipasaka va la li kola. 13Navutswa mundu u veye mulahi, kandi u ta veye mu lugendo, na a vula kulia lipasaka, mundu uyu a la twulidzwa mu avandu veve; kigira ya vula kuleta kyokuhaanwa ku Yahova ku inyinga yakyo ya lagwa, mundu uyu a la ginga ubwoni bwibwe. 14Na mugeni u menya hagati henyu, na a va ni yenya kulomba lilia lyelipasaka ku Yahova; kuli lilaga lyelipasaka li veye, na kuli miima gyalyo gyi veye, a la kola ndiyo: mu la va nelilaga lilala ku mugeni, noku uyu mwene luhya.
15Na ku lidiku lyelihema lya singeridzwa, lilesi lya kunika lihema, kali lihema lyelilolekidza: na mgolova lya li igulu helihema, na liloleka lyalyo lya li kuli muliru, kuduka mugamba. 16Lya li ndiyo kazozo lilesi lya li kunika, na liloleka lyalyo lya li kuli muliru mu budiku. 17Na lwa lilesi lya gingwa kutwula ku Lihema, ma inyima weligingwa avana va Israeli va samula: na ha lilesi lya singira, ha zana avana va Israeli va singeridza ho mahema gavo. 18Ku lilaga lya Yahova avana va Israeli va samula na ku lilaga lya Yahova va singeridza mahema gavo: inyinga yosi yelilesi lya menya igulu welihema, navo va menya mu hokusosa. 19Na lwa lilesi lya lindagira igulu welihema madiku manyingi, ma avana va Israeli va linda lilaga lya Yahova, na va vula kusamula. 20Na tsinyinga tsindi lilesi lya li ku lihema madiku makekeke; ma va menya mu hokusosa kuli lilaga lya Yahova, na kuli lilaga lya Yahova va samula. 21Na tsinyinga tsindi lilesi lya li ho kutwula mgolova kuduka mugamba; ma lwa lilesi lya gingwa mugamba, va samula: kinga ni li lindagira mbusu nobudiku, lwa lilesi lya gingwa, va samula. 22Ni ga veye madiku gaviri, kinga mweli, kinga muhiga gwelilesi lya lindagiranga igulu welihema, nokumenya igulu walyo, avana va Israeli va menya mu hokusosa, si va samula mba; navutswa lwa lya gingwa, ma va samula. 23Ku lilaga lya Yahova vombaka mahema, na ku lilaga lya Yahova va samula: va gumira lilaga lya Yahova, ku lilaga lya Yahova mu munwa gwa Musa.
©Bible Society of Kenya, 1967