Livalidza 4
4
1Na Yahova ya volera Musa na Haruni, na a vola, 2Mu twulidze livalidza lya avana va Kohathu mu avana va Levi kuli bwiko bwavo, kuli tsinyumba tsyavaguga vavo, 3kutwula mihiga makumi gavaka nokuduka mihiga makumi gatano, vosi avingira mu butumiki kukola miyinzi gyelihema lyokuvuganira mu. 4Yibu bu veye ubutumiki bwa avana va Kohathu mu lihema lyokuvuganira mu, ku viju vitakatifu ligali: 5lwa va la sambula hokusosa, Haruni a lingira, na avana veve, na va likidza ingubo yokukinga, nokukunika lisanduku lyelilolekidza nayo, 6na va la vika ku tsingubo tsyelitsivi, nokwaala ku ingubo yeblue, na va la vika mu misala gyokuginga. 7Na ku imeza yobukima bwokumanyira va laala ingubo yeblue, nokuvika ku tsisahani, na vijiko, na tsibakuli, na vikombe vyokutsuka; na ubukima bwa kazozo bu la va kuyo: 8na va laala kuvyo ingubo inzakanyu, nokukunika kuyo tsingubo tsyelitsivi, na va la vika misala gyokuginga. 9Na va la vugula ingubo yeblue, nokukunika kinara kyetaya yobulavu, na tsitaya tsyakyo, na makasi gakyo, na uluju lwakyo, na viju vyakyo vyosi vyamaguta, vya va tumekiranga kukyo: 10na va la ki vika halala na viju vyakyo vyosi mutsingubo tsyelitsivi tsyokukunika, nokukivika ku misala. 11Na va laala ingubo yeblue ku bwali bwethahabu, nokubukunika netsingubo tsyelitsivi tsyokukunika, nokubuvika ku misala gyabwo: 12na va la vugula viju vyosi vyobutumiki, vya va tumikiranga mu hatakatifu, na va la vi vika mu ingubo yeblue, nokuvikunika netsingubo tsyelitsivi tsyokukunika, nokuvivika ku misala. 13Navo va la ng'ula ligoke mu bwali, na va laala ku ingubo yekiforosadi: 14na va la vika kubwo viju vyosi vya va tumekiranga kubwo, vituva, na tsinzago, na vijiko, na tsibakuli, viju vyosi vyobwali; na va laala ku tsingubo tsyelitsivi kuvikunika, na va la vika mu misala gyabwo. 15Na lwa Haruni na avana veve va mala kukunika hatakatifu, na viju vyosi vya hatakatifu, lwa hokusosa ha la samula; inyima wa yaga, avana va Kohathu va la tsia kuviginga: navutswa va vule kudira hatakatifu, gase va la kudza. Viju yivi vi veye musigo gwa avana va Kohathu mu lihema iyokuvuganira mu. 16Na ubulindi bwa Eleazaru mwana wa Haruni musalisi, bu la va maguta getaya yobulavu, na vimuli vinolu, na kihaanwa kyobusie kya kazozo, na maguta gokuvaka, na bulindi bwelihema, nobwa vyosi vi veye mulyo, hatakatifu, na viju vyosi vyalyo.
17Na Yahova ya volera Musa na Haruni, na a vola, 18Mu ta twulidza ihiri yobwiko bwa Vakohathu ku Valevi; 19navutswa mu va kolere likuva yili, va ve mwoyo, va vule kukudza, lwa visunda ku vindu vitakatifu ligali: Haruni na avana ve-e va lingira mu, nokuvika sa mulala ku butumiki bwibwe noku musigo gwigwe; 20navutswa va vule kwingira kulola hatakatifu kuduka kali idakika indala, gase va la kudza.
21Na Yahova ya volera Musa, na a vola, 22U vungidze halala livalidzwa lya avana va Gerishon, kuli tsinyumba tsyavaguga vavo, nokubwiko bwavo; 23kutwula ku mihiga makumi gavaka nokuduka ku mihiga makumi gatano u la va validza; vosi avingira kutumika, nokukola miyinzi mu lihema lyokuvuganira mu. 24Yibu bu veye ubutumiki bwa bwiko bwa Avagerishon, mu litumika nomu liginga misigo: 25va la ginga tsingubo tsyelihema, na lihema lyokuvuganira mu, tsyokukunika tsyalyo, na tsingubo tsyelitsivi tsyokukunika tsi veye igulu walyo, na ingubo yokukinga mu kiliango kyelihema lyokuvuganira mu, 26na tsingubo tsyomugidzi, na ingubo yokukinga mu kiribwa kyomugidzi, gu kumberidzanga lihema na ubwali tsimbega tsyosi, na migoye gyatsyo, na viju vyosi vyobutumiki bwavo, na vyosi vi kolangwa navyo: muvyo va la tumika. 27Ubutumiki bwa avana va Avagerishon, mu musigo gwavo gwosi nomu butumiki bwavo, bu la va ku lilaga lya Haruni na avana veve; na mu la va laga musigo gwavo kugulinda. 28Yibu bu veye ubutumiki bwa bwiko bwa avana va Avagerishon mu lihema lyokuvuganira mu: na ubulindi bwavo bu la va ku mukono gwa Ithamaru mwana wa Haruni musalisi.
29Ku liva lya avana va Merari, u la va validza kuli bwiko bwavo, noku tsinyumba tsyavaguga vavo; 30kutwula mihiga makumi gavaka nokuduka mihiga makumi gatano, la va validza, sa mulala wingira ku butumiki, kukola miyinzi gyelihema lyokuvuganira mu. 31Na yili ni lilaga lyomusigo gwavo, kuli ubutumiki bwavo bwosi mu lihema lyokuvuganira mu: tsimbao tsyelihema, na tsimbohero tsyalyo, na tsitiru tsyalyo, na vyokusingira ku vyatsyo, 32na tsitiru tsyomugidzi tsyokukumberidza, na vyokusingiridza ku vyatsyo, na vivambo vyatsyo, na migoye gyatsyo, halala neviju vyatsyo vyosi, na halala nobutumiki bwavyo: kandi na ameta mu la va laga sa mulala viju vyomusigo gwobulindi bwavo. 33Yibu bu veye ubutumiki bwa bwiko bwa avana va Merari, kuli ubutumiki bwavo bwosi, mu lihema lyokuvuganira mu, ku mukono gwa Ithamaru mwana wa Haruni musalisi.
34Na Musa na Haruni na avanene velivugana v a validza avana va Avakohathu kuli bwiko bwavo, nokutsinyumba tsyavaguga vavo, 35kutwula ku avemihiga makumi gavaka kuduka ku avemihiga makumi gatano, sa mulala wingira mu butumiki, kukola miyinzi mu lihema lyokuvuganira mu: 36na yavo ava validzwa kuvo kuli bwiko bwavo, va li tsielfu tsiviri na tsimia tsitano na tsiviri na avandu makumi gatano. 37Yava niva ava valilzwa mu bwiko bwa Avakohathu, vosi ava kola miyinzi mu lihema lyokuvuganira mu, ava Musa na Haruni va validza kuli lilaga lya Yahova ku Musa.
38Na kuvo ava validzwa ku avana va Gerishon, kuli bwiko bwavo, noku tsinyumba tsyavaguga vavo.
39Kutwula ku avemihiga makumi gavaka kuduka ku avemihiga makumi gatano, sa mulala wingira mu butumiki bwemiyinzi gyelihema lyokuvuganira mu, 40kali yavo ava validzwa kuvo, kuli bwiko bwavo, noku tsinyumba tsyavaguga vavo, va li tsielfu tsiviri na tsimia tsitano na indala na avandu makumi gavaka. 41Yava nivo ava validzwa mu bwiko bwa avana va Gerhihon, vosi ava kola miyinzi mu lihema lyokuvuganira mu, ava Musa na Haruni va validza kuli lilaga lya Yahova.
42Na yavo ava validzwa mu bwiko bwa avana va Merari, kuli bwiko bwavo, noku tsinyumba tsyavaguga vavo, 43kutwula ku avemihiga makumi gavaka kuduka ku avemihiga makumi gatano, sa mulala ku vosi wingira mu butumiki bwemiyinzi mu lihema lyokuvuganira mu, 44kali yavo ava validzwa kuvo kuli bwiko bwavo, va li tsielfu tsivaka, na tsimia tsiviri. 45Yava nivo ava validzwa mu bwiko bwa avana va Merari, ava Musa na Haruni va validza kuli lilaga lya Yahova ku Musa.
46Yavo vosi ava validzwa mu Avalevi, ava Musa na Haruni na avanene va Israeli va validza, kuli bwiko bwavo, noku tsinyumba tsyavaguga vavo, 47kutwula ku avemihiga makumi gavaka kuduka ku avemihiga makumi gatano, sa mulala ku vosi wingira kukola miyinzi gyobutumiki, na miyinzi gyokuginga misigo mu lihema lyokuvuganira mu, 48kali yavo ava validzwa kuvo, va li tsielfu tsitano na tsivaka, na tsimia tsitano na avandu makumi gatano na gavaka. 49Kuli lilaga lya Yahova va validzwa na Musa, sa mulala kuli ubutumiki bwibwe, na kuli musigo gwigwe: na ndiyo va validzwa naye kuli Yahova ya laga Musa.
©Bible Society of Kenya, 1967