Livalidza 35
35
1Na Yahova ya volera Musa mu kereremu kya Moabu himbi Yordani ha Yeriko, na a vola, 2U iage avana va Israeli, va he Avalevi amadala aga veye ku miyandu gyavo, va menye mugo; kandi mu la ha Avalevi vyayiru vi kumberidza amadala. 3Navo va la menya mu madala; na vyayiru vyago vi la va vyetsing'ombe tsyavo, na vyevindu vyavo vyosi, na vyemitugu gyavo gyosi. 4Na vyayiru vya madala mu li ha Avalevi, vi la va kutwula ku tsingaga tsyelidala, ligera lyamakono elfu ku tsimbega tsyosi. 5Na mwinye mu la gera kyova welidala ku luvega lwevugwe ligera lya makono tsielfu tsiviri, na ku luvega lwa kusini, ligera lya makono tsielfu tsiviri, na ku luvega lwemadioli, iigera lya makono tsieifu tsiviri, na ku luvega lwa kasikasini, ligera lya makono tsielfu tsiviri, na lidala li la va hagati. Yivi vi la va kuvo vyayiru vya madala. 6Na madala ga mu la ha Avalevi, ga la va madala gatano na lilala aga veye gobuhaliru, aga mu la ha uyu wiiti mundu, yirukire mu: na halala na madala yaga mu la va ha madala makumi gane na madala gaviri. 7Amadala gosi aga mu li haana ku Avalevi, ga la va madala makumi gane na madala gatano na gavaka; yaga mu la va ha halala na vyayiru vyago. 8Na ku madala aga mu li ha gemiyandu gya avana va Israeli, ku yaga aga veye manyingi mu la vugula manyingi; na ku aga veye makekeke mu la vugula makekeke: ku vosi sa mulala kuli miyandu gyigye gya a nyola a la ha Avalevi ku madala gege.
9Na Yahova ya volera Musa, na a vola, 10U volere avana va Israeli, na u va volere, Lwa mwambuka Yordani kwingira mu kivala kya Kanani, 11kunangwa mu la tovola amadala kuva gobuhaliru ku mwinye, mundu ku vosi yiita mundu ku matava a nyala kwirukira mu. 12Na madala yaga ga la va ku mwinye hokuhalira kuduka uyu wenya kuvanza kisalya, a vule kwiita mundu wiita wundi ku matava, kuduka inyinga ya a singira imbiri welivugana, a kalagirwe. 13Na madala ga mu la haana ga la va ku mwinye amadala gatano na lilala kuva hokuhalira mu. 14Mu la haana madala gavaka engereka wa Yordani, na madala gavaka mu la haana mu kivala kya Kanani; na ga la va amadala gokuhalira mu. 15Kigira avana va Israeli, na kigira avageni na ava menya muvo, amadala yaga gatano na lilala ga la va agokuhalira kuduka uyu ku vosi wa matava ga gwira kwiita mundu, a nyala kwirukira mu.
16Navutswa ni i va a mu duya nekindu kyekivya, naye na a kudza, uyu a veye mulumindi: na mulumindi ligali a liitwa. 17Na a va na a mu duya neligina li veye mu mukono gwigwe, nalyo ni li veye lyomundu a nyala kukudzera, naye na a kudza, a veye mulumindi: mulumindi ligali a liitwa. 18Kinga ya va na a mu duya nekindu kyomusala mu makono, kyomundu a nyala kukudzera, na a kudza, uyu a veye mulumindi: na mulumindi ligali a liitwa. 19Na uyu u vanza kisalya mwene a liita mulumindi: lwa a li duka kwagana naye, a la mwiita. 20Kandi na a va na a mu tsoma bwangu nobudunyi, kinga kumulasa, mu likola iluku, kuduka ya kudza, 21kinga na a mu duya mu busigu nomukono kuduka ya kudza; uyu wa mu duya ligali a liitwa; a veye mulumindi: uyu u vanza kisalya ligali a la mwiita, lwa a duka kwagana naye.
22Navutswa na a va na a mu tsoma nonoho bugira ubutima, kinga kumusikisira kindu bugira kukola iluku, 23kmga neligina ku Iigira mundu a nyala kukudza, na a vula kumulola, na a mu sikisira, kuduka ya kudza, naye na a ta li musigu wewe, na a vula kwenya kumwononya; 24hene yaho livugana li la kalagira makuva hagati homuduyi nomuvanzi wekisalya kuli malago yaga; 25Na livugana li la i honya uyu muduyi a twule mu mukono gua muvanzi wekisalya, na livugana li la muiranya mu lidala lyobuhaliru bwibwe ha yirukira: naye a la menya mu kuduka likudza lyomusalisi munene, wa vakwa amaguta matakitifu. 26Navutswa ni i va muduyi, inyinga ku tsyosi na a tsia kyova kuvita lwako lwelidala lyobuhaliru lya yirukira mu, 27na uyu muvanzi wekiialya na a mu lola na a veye ku lwako lyelidala lilye, lyobuhaliru, na uyu muvanzi wekisalya ni yiita muduyi; si a la va nelikalagirwa lya masahi, 28kigira ga mu dukira kumenya mu lidala lilye lyobuhaliru kuduka likudza lyomusalisi munene: navutswa musalisi munene na a mali kukudza, muduyi a la nyala kwirana mu kivala kyemiyar du gyigye.
29Na makuva yaga ga la va amalago gelikalagira ku mwinye mu visukululwi vyenyu vyosi mu bumenyo bwenyu bwosi. 30Ku vosi uyu wiita mundu, mulumindi uyu a liitwa ku minwa gya valoli: navutswa muloli mulala si a la lolekidza ku mundu kali mulala, a duke kwiitwa. 31Kandi mu ta vugula mitungu ku livamwoyo lyomundu mulumindi, wa ga dukira a kudze; navu tswa ligali a liitwa. 32Kandi mu ta vugula mitungu ku uyu wirukira mu lidala lilye lyobuhaliru, a duke kwirana kandi kumenya mu kivala, kuduka likudza lyomusalisi munene. 33Na ndiyo si mu lononya kivala kya mu veye mu: kigira masahi gononyanga kivala; na si ha veye nekihaanwa ki dukana kwogidza kivala ku masahi ga sundulwa ku, ni i ta li masahi ga uyu wa ga sundula. 34Na ive u tononya kivala kya u menya mu, kya inze mwene mmenya hagati hakyo: kigira inze Yahova mmenyanga hagati ha avana va Israeli.
©Bible Society of Kenya, 1967