Livalidza 27
27
1Hene yaho visunda himbi, avakana va Zelofehadi, mwana wa Heferu, mwana wa Gileadi, mwana wa Makiru, mwana wa Manase, wa bwiko bwa Manase mwana wa Yosefa; na ameta ga avakana veve ni yaga: Mahala, Noa, na Hogila, na Milika na Tirza. 2Navo va singira imbiri wa Musa, na Eleazaru musalisi, na imbiri wa vanene, na vosi avelivugana, ha kiliango kyelihema lyokuvuganira mu, nokuvola, 3Dada wetu ya kudzera mwigendanyama, naye si ya li wekiduma kya yavo ava vugana halala kuhing'ana na Yahova mu kiduma kya Kora: navutswa ya kudza mu bwoni bwibwe mwenenaye ya li bugira avana avayai. 4Kigira ki lieta lya dada wetu li twulidzwe mu bwiko bwibwe, kigira si ya li nomwana muyai? U ku he miyandu halala na avamwavo va dada wetu. 5Na Musa ya leta likuva lyavo imbiri wa Yahova.
6Na Yahova ya volera Musa, na a vola, 7Avakana va Zelofehadi va vola ageligali: ligali u la va ha miyandu halala na avamwavo va dada wavo; na ive u la va ha miyandu gya dada wavo. 8Na u la voleraavana va Israeli, nokuvola, Mundu na a va na a kudza, na a ta li nomwana muyai, mwinye mu la ha mukana wewe miyandu gyigye. 9Kandi na a ta li nomukana, mu la ha amwavo wewe, miyandi gyigye. 10Naye na a ta li na avamwavo, ma mu la ha avamwavo va dada wewe, miyandu gyigye. 11Kandi dada wewe na a ta li na avamwavo, ma mu la ha uyu mwiko wa himbi, miyandu gyigye, naye a la va nagyo: na likuva yili li la va lilaga lya avana va Israeli, na mwima, kuli Yahova ya laga Musa.
12Kandi Yahova ya volera Musa, U nine mu kigulu yiki kya Abarim, u henze kivala kya mmali kuha avana va Israeli. 13Na lwa u ki loli, u la vungidzwa ku avandu vovo, kuli Haruni amwavo wowo ya vungidzwa; 14kigira mwa tinguha ku munwa gwange mwigendanyama lya Zin, mu kivihiri kyelivugana, kigira si mwa nkuminya ha amadzi imbiri wetsimoni tsyavo. (Yaga ga veye amadzi ga Meriba ga Kadesh mwigendanyama lya Zin.)
15Na Musa ya volera Yahova, na a vola, 16Yahova, Nyasaye wemyoyo gyavandu vosi, a tovole mundu a ve munene welivugana, 17u genda imbiri wavo, kutwula nokwingira, nokwimirira imbiri wavo, kuvatwulidza nokuvingiridza; livugana lya Yahova li ta va kuli magondi ga ta li nomwayi. 18Na Yahova ya volera Musa, U lete Joshua mwana wa Nuni, nundu wa Roho a veye muye, na u vike kuye mukono gugwo; 19na u mu vike imbiri wa Eleazaru musalisi, na imbiri welivugana lyosi; u mu he malago imbiri wetsimoni tsyavo. 20Na u la vika kuye ku lidzominywa lilyo, livugana lyosi lya avana va Israeli va mu hulire. 21Naye a la singira imbiri wa Eleazaru musalisi, naye u la mu tevera ku likalagira lya Urim imbiri wa Yahova: ku likuva lilye va la twula, nokwingira, uyu, na avana va Israeli vosi halala naye, kali livugana lyosi. 22Na Musa ya kola kuli Yahova ya mu laga; na ya leta Joshua, na a mu vika imbiri wa Eleazaru musalisi, na imbiri wa livugana lyosi; 23naye ya vika makono gege kuye, na a mu ha lilaga, kuli Yahova ya volera Musa.
©Bible Society of Kenya, 1967