Livalidza 2
2
1Na Yahova ya volera Musa na Haruni, na a vola, 2avana va Israeli va lombaka sa mulala himbi nebendera yeye mwene, halala nevilolero vyetsinyumba tsyavaguga vavo: ku tsindulu tsyelihema lyokuvuganira mu, va lombaka mahema gavo kulikumbiridza. 3Na yavo avombaka ku luvega lwevugwe kuhenza ku litwulira lyeliuva va la va avebendera ya Yuda, kuli amahe gavo: na munene wa avana va Yuda a la va Nahashoni mwana wa Aminadabu. 4Na lihe lilye, ava na yavo validzwa kuvo, va li tsielfu makumi gatano na gaviri na tsine, na tsimia tsitano na indala. 5Na yavo avombaka himbi naye va la va ihiri ya Isakari: na munene wa avana va Isakari a la va Nethanaeli mwana wa Zuaru. 6Na lihe lilye, navo ava validzwa kuvo, va li tsielfu makumi gatano na tsine, na tsimia tsine. 7Na ihiri ya Zebuloni: na munene wa avana va Zebuloni a la va Eliabu mwana wa Helon. 8Na lihe lilye, navo ava validzwa kuvo va li tsielfu makumi gatano na tsitano na tsiviri, na tsimia tsine. 9Yavo vosi ava validzwa mu hokusosa ha Yuda va li tsielfu mia na makumi gatano na gavaka, na tsitano na indala, na tsimia tsine, kuli amahe gavo. Yava va la tanga kusamula.
10Ku luvega lwa kusini ha la va ibendera ya hokusosa ha Rubeni kuli amahe gavo: na munene wa avana va Rubeni a la va Elizuru mwana wa Shedeuru. 11Na lihe lilye, navo ava validzwa kuvo, va li tsielfu makumi gane na tsitano na indala, na tsimia tsitano. 12Navo avombaka himbi naye va la va ihiri ya Simeoni: na munene wa avana va Simeoni a la va Shelumieli mwana wa Zurishadai. 13Na lihe lilye, navo ava validzwa kuvo, va li tsielfu makumi gatano na tsitano na tsine, na tsimia tsivaka. 14Na ihiri ya Gadi: na munene wa Gadi a la va Eliasafu mwana wa Reueli. 15Na lihe lilye, navo ava validzwa kuvo, va li tsielfu makumi gane na tsitano, na tsimia tsitano na indala na avandu makumi gatano. 16Vosi ava validzwa mu hokusosa ha Rubeni, va li tsielfu mia na makumi gatano na indala na tsimia tsine na avandu makumi gatano. Navo va la samula va kaviri.
17Hene yaho lihema lyokuvuganira mu li la samula, halala na hokusosa ha Valevi hagati heviduma vyahokusosa: kuli lyombaka lyavo mu hokusosa, ni ndiyo va la samula, sa mulala hango hehe himbi nebendera yeye.
18Ku luvega lwemadioli, ha la va nebendera ya hokusosa ha Efiriam, kuli amahe gavo: na munene wa avana va Efiraim a la va Alishama mwana wa Amihudu. 19Na lihe lilye, navo ava validzwa kuvo, va li tsielfu makumi gane na tsimia tsitano. 20Na himbi naye i la va ihiri ya Manase: na munene wa avana va Manase a la va Gamalieli mwana wa Padazuru. 21Na lihe lilye, navo ava validzwa kuvo, va li tsielfu makumi gavaka na tsiviri, na tsimia tsiviri. 22Na ihiri ya Benjamini: na munene wa avana va Benjamini a la va Abidani mwana wa Gideoni. 23Na lihe lilye, navo ava validzwa kuvo va li tsielfu makumi gavaka na tsitano, na tsimia tsine. 24Vosi ava validzwa va hokusosa ha Efiraim va li tsielfu mia na tsitano na tsivaka, na mia indala, kuli amahe gavo. Navo va la samula va kavaka.
25Ku luvega lwa kasikasini ha la va nebendera ya hokusosa ha Dan, kuli amahe gavo: na munene wa avana va Dan a la va Ahiezeru mwana; wa Amishadai. 26Na lihe lilye, navo ava validzwa kuvo va li tsielfu makumi gatano na lilala na tsiviri, na tsimia tsitano na tsiviri. 27Na yavo avombaka himbi naye va la va ihiri ya Asheri: na munene wa avana va Asheri a la va Pagieli mwana wa Okirani. 28Na lihe lilye, navo ava validzwa kuvo, va li tsielfu makumi gane na indala, na tsimia tsitano. 29Na ihiri ya Nafitali: na munene w a avana va Nafitali a la va Ahira mwana wa Ellani. 30Na lihe lilye navo ava validzwa kuvo, va li tsielfu makumi gatano na tsivaka, na tsimia tsine. 31Vosi ava validzwa mu hokusosa ha Dan, va li tsielfu mia na makumi gatano na tsitano na tsiviri, na tsimia tsitano na indala. Yava va la samula invima ku tsibendera tsyavo.
32Yava nivo ava validzwa ku avana va Israeli kuli tsinyumba tsyavaguga vavo: vosi ava validzwa mu viduma vya hokusosa kuli amahe gavo, va li tsielfu tsimia tsitano na indala na tsielfu tsivaka, na tsimia tsitano na avandu makumi gatano. 33Navutswa Avalevi si va validzirwa halala na avana va Israeli; kuli Yahova ya laga Musa.
34Avana va Israeli va kola ndiyo; kuli gosi ga Yahova ya laga Musa, vombaka ndiyo ha teibendera tsyavo tsi veye, na ndiyo va samula sa mulala ku bwiko bwavo, kuli tsinyumba tsyavaguga vavo tsi veye.
©Bible Society of Kenya, 1967