Livalidza 17
17
1Na Yahova ya volera Musa, nokuvola, 2U volere avana va Israeli, na u vugule kuvo tsimpimbo, indala yenyumba yavaguga vavo sa mulala, ku vanene vavo vetsinyumba tsya avaguga vavo, tsimpimbo likumi na tsiviri: na u la ng'oda lieta lya vanene sa mulala ku impimbo yeye. 3Na ku impimbo ya Levi, u la ng'oda lieta lya Haruni; kigira i la va impimbo indala ku mutwe sa mulala gwenyumba yavaguga vavo. 4Na u la tsi vika mu lihema lyokuvuganira mu imbiri welilolekidza, ha mbugana na mwinye. 5Na ga la duka, impimbo yomundu uyu wa nda tovola i la sebuka: na nda heridza imbiri wange, limonya lya avana va Israeli, lya va monyanga mwinye. 6Na Musa ya volera avana va Israeli; na avanene vavo vosi va mu ha tsimpimbo, impimbo indala ku munene sa mulala, kuli tsinyumba tsyavaguga vavo tsi veye, tsya li likumi na tsiviri: na impimbo ya Haruni ya li mu tsimpimbo tsyavo. 7Na Musa ya vika tsimpimbo imbiri wa Yahova mu lihema lyelilolekidza.
8Kunangwa mugamba, Musa yingira mu lihema lyelilolekidza; na, henza, impimbo ya Haruni ya li ku inyumba ya Levi ya sebuka, na i kola visibu, nokulavidza vimuli, nokwama ububia bwetsinzoli. 9Na Musa ya leta kyova tsimpimbo tsyosi kutwula imbiri wa Yahova na a tsi vika imbiri wa avana va Israeli vosi: navo va henza, na sa mulala ya vugula impimbo yeye. 10Na Yahova ya volera Musa Vika kandi impimbo ya Haruni imbiri welilolekidza, i lindwe kuva kilolekidzu ku avana vobwebaali; u duke kuheridza limonya lyavo ku inze, va vule kukudza. 11Kunangwa Musa ya kola ndiyo: kuli Yahova ya mu laga, ya kola ndiyo.
12Na avana va Israeli va volera Musa, nokuvola, Henza, kwinye ku kudzanga, ku divanga, ku divanga kwosi. 13Sa mulala wesunda ku lihema lya Yahova, a kudzanga: ku la kudza kwosi?
©Bible Society of Kenya, 1967