Matayo 17
17
1Lwa ga vita madiku gatanu nelilala Yesu ya vugula Petro na Yakobo na Yohana amwavo wewe, na a va hila mu kigulu kitambi veng'ine: 2na a girunkanywa ligo ndo imbiri wavo; mmoni mwimwe mwa ng'ereng'ana kuli liuva, netsi ngubo tsitsye tsya gwa tsindavu kuli ubulavu. 3Henza, va loleka kuvo Musa na Elija va volerana naye. 4Ma Petro ya tivula na a volera Yesu, Mwami, nu bulahi ku ve hano; nu u yanze ku la lomba hano vidioli vivaka; kilala kikyo, kindi kya Musa nekindi kya Elija. 5Lwa ya vola ndi, henza, lilesi lilavu lya va kinga, na mwoyo gu twula mu lilesi, ni gu vola, Uyu nu Mwana myanzi wange, wa nyanza; mu mu hulire. 6Avegidzwi lwa va gu hulira, va gwa mammama ni va tia muno. 7Yesu yadza na a va dira, na a vola, Singiri, mu ta tia mba. 8Va kunula tsimoni tsyavo, ni va vula kulola mundu navutswa Yesu yeng'ine.
9Lwa va sulunguta kutwula mu kigulu, Yesu ya veganehidza na a vola, Mu ta volera mundu kali mulala, kya mu loli, Mwana wa Adamu a luhe a simuguke mu vakudzi. 10Avegidzwi va mu teva, ni va vola, Kigira ki avang'odi va vola Elija a la tanga kuudza? 11Na ya tivula na a vola, Ligali, Elija a la tanga kuudza, kandi a lirannya vyosi: 12navutswa mmu volera, Elija u mali kuudza, navo si va mu manya mba, navutswa va mu kolera vyosi kuli vya va yanza. Kandi ndiyo va la kupidza Mwana wa Adamu, kivi. 13Hene yaho avegidzwi va hulira a vola ku Yohana Mbatidzi.
14Lwa va duka ku kiduma, mundu yadza kuye na a mu sigamira na a vola, 15Mwami, u vererere mwana wange: kigira a veye nendulume, kandi a salira muno; kigira kanyingi a gwa mu muliru, na kanyingi mu madzi. 16Nda mu leta ku vegidzwi vovo, navutswa si va nyala kumuhonnya. 17Yesu ya tivula na a vola, Likula li ta li nelisuuvira nelyokuhinga, nda va na mwinye kuduka inyinga ki? Nda mu vererera kuduka inyinga ki? Mu mu lete hano ku inze. 18Yesu ya li gaya; nelidemone lya twula kuye: na muyai ya hona inyinga zana yeyo.
19Hene yaho avegidzwi vadza ku Yesu lwa ya li yeng'ine ni va vola, Kigira ki kwinye si kwa nyala kulikunga? 20Na a va volera Kigira lisuuvira lyenyu ni likekeke. Kigira mmu volera, Ligali, ni mu ve nelisuuvira kuli bugutsa bwelisatsi, mu la volera kigulu yiki, Twula hano, wisunde hala; ki lisunda; kandi vindu vyosi vi la nyalika ku mwinye. 21Navutswa ku lugano yilu si li twula ni ga ta veye ne lisaala nokuhonga lilia.
22Lwa va menya mu Galilaya Yesu ya va volera, Mwana wa Adamu a la zamwa mu makono gavandu; 23va la mwiita, kandi ku lidiku lya gavaka a la simugukidzwa. Navo va verera muno.
24Lwa va duka Kapernaume avasolola inusu yeshekeli vadza ku Petro ni va vola, Mwegidzi wenyu si a tunga inusu yeshekeli? 25Ya vola, Yee, a la tunga. Lwa yingira mu inyumba, Yesu ya tanga kumuvolera, na a vola, U vola ki, Simoni? Avami velirova va solola ubushutu ni va kalira vaha vigedi? Ku avayai vavo naho avageni? 26Kandi lwa ya vola, Avageni, Yesu ya mu volera Kigira yaga avayai vavo va vula kutunga. 27Navutswa, gase ku la vikigitalidza, ive u tsie ku inyanza u limbike luyali u vugule isudzi i tanga kutwula; lwa u li kunula munwa gwayo u la lola ishekeli: vugula yiyo u tsie kutungira inze nive.
Currently Selected:
Matayo 17: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
