Kyavalevi 27
27
1Na Yahova ya volera Musa, na a vola, 2U volere avana va Israeli, na u va volere, Lwa mundu a singeridza lilagana mwene, avandu va la va ku Yahova kuli livalidza lilyo. 3Na iivaiidza lilyo ii ia va ku musatsa wemihiga makumi gaviri kuduka ku mihiga makumi gatano na lilala, livalidza lilyo li la va tsishekeli makumi gatano tsyefetha, kuli tsishekeli tsya hatakatifu. 4Kandi l na a va na a veye wekikali, livalidza lilyo li la va tsishekeli makumi gavaka. 5Kandi na a veye wemihiga gyitano kuduka mihiga makumi gaviri, ma livalidza lilyo li la va tsishekeli makumi gaviri ku musatsa, na tsishekeli likumi ku wekikali. 6Kandi na a va wokutwula mweli mulala kuduka mihiga gyitano, ma livalidza lilyo li la va ku musatsa tsishekeli tsitano tsyefetha, na livalidza lilyo li la va tsishekeli tsivaka tsyefetha ku wekikali. 7Kandi na a va wemihiga makumi gatano na lilala nokuvita; na a va na a veye musatsa, ma livalidza lilyo li la va tsishekeli likumi na tsitano, noku wekikali tsishekeli likumi. 8Navutswa na a va na a veye mudaka kuvita livalidza lilyo, ma a la vikwa imbiri womusalisi, na musalisi a la mu validza; kuli linyala lya uyu wa singeridza lilagana a la mu validza ndiyo.
9Kandi ni i va ni i veye inyama, yoku lugano lwa avandu va letera Yahova kihaanwa, ku tsyosi tsyomundu a letera Yahova, i la va intakatifu. 10Si a la gi girunkannya, kandi si a la gi kirannya, indahi mu bugono bwendamano, kinga indamano mu bugono bwendahi: na a va na kirannya inyama mu bugono bwenyama, hene yaho tsyombi tsya a kirannya tsi la va tsintakatifu. 11Kandi ni i va ni i veye inyama i ta li inungi, yoku lugano lwa va ta haananga kuva kihaanwa ku Yahova, hene yaho a la vika inyama zana imbiri womusalisi; 12na musalisi a la gi validza, ni i va ni i veye indahi kinga i veye indamano: kuli ive musalisi u gi validza, i la va ndiyo. 13Navutswa na a va ni yenya kugiboholola ligali, a la meda kidieli kilala ku vitano ku livalidza lilyo.
14Na lwa mundu a takasa inyumba yeye i ve intakatifu ku Yahova, hene yaho musalisi a la gi validza, ni i va ni i veye indahi kinga indamano: kuli musalisi a gi validza, i la va ndiyo. 15Kandi uyu u takasa inyumba yeye, na a va ni yenya kugiboholola, a la meda kidieli kilala ku vitano kyefetha yelivalidza lilyo, na i la va yeye.
16Mundu na a va na a takasira Yahova kidieli kyomulimi gwigwe gwa a veye nagwo, hene yaho livalidza lilyo li la va kuli litagwa lyagwo: litaga lya ihomeri indala lyobugutsa bwa shairi livalidza lyagwo li la va tsishekeli makumi gatano tsyefetha. 17Na a va na a takasa mulimi gwigwe kutwula ku muhiga gwa jubili, kuli livalidza lilyo gu la singira ndiyo. 18Navutswa na a va na a takasa mulimi gwigwe inyima we jubili, hene yaho musalisi a la mu validzira ifetha kuli livalidza lyemi higa gyi tigaye kuduka ku muhiga gwa jubili; na livalidza lilyo li la gehidzwa. 19Na uyu wa takasa mulimi gwigwe, na a va ni yenya kuguboholola, hene yaho a la meda kidieli kilala kyevitano kyefetha ku livalidza lilyo, na gu la dinyiridzwa kuye. 20Kandi na a va na a vula kuguboholola, kinga na a va na a gulidza mundu wundi, si gu la bohololwa kandi mba: 21navutswa mulimi gu la va mutakatifu ku Yahova, lwa gu twula mu jubili, kuli mulimi gwa vikwla; gu la va gwomusalisi. 22Kandi na a va na a takasira Yahova gwa ya gula, gu ta va ku mulimi gwemiyandu gyigye; 23musalisi a la mu validzira ubuguli bwelivalidza lilyo kuduka ku muhiga gwejubili, na ku lidiku yilyo a la haana kuli livalidza lilyo li veye, kuli kindu kitakatifu ku Yahova. 24Mu muhiga gwejubili mulimi gu lirana ku uyu wa gwa gulwa ku, yee, ku uyu womulimi gu veye miyandu gyigye. 25Na livalidza lilyo lyosi li la londa ishekeli ya hatakatifu: tsigera makumi gaviri tsi la va ishekeli indala.
26Navutswa yokutanga kwivulwa mu tsinyama, ya vikwa kuva yokutanga kwivulwa kuva ya Yahova, ku vosi si ha li nomundu a nyala kukivika kuva kitakatifu; ni i va ni a veye ing'ombe kinga ligondi, i veye ya Yahova. 27Ni i v a ni i veye inyama i ta li inungi, hene yaho a la gi boholola kuli livalidza lilyo li veye naye a la meda kidieli kilala kyevitano vyalyo: navutswa ni i ta bohololwa, hene yaho i la gulidzwa kuli livalidzwa lilyo.
28Navutswa, ku vyosi kya vikwa, kyomundu avika kuva kya Yahova mu vyosi vya a veye navyo, ni ki va ni ki veye mundu kinga inyama kinga mulimi gwemiyandu gyigye si ki la gulidzwa, kandi si ki la bohololwa; kya vikwa kuva kya Yahova ki veye kitakatifu ligali. 29Ku vyosi kya vikwa, kya avandu va vika, si ki la bohololwa mba; ligali ki liitwa.
30Kandi izaka yosi yemilimi, ni i va ni i veye ubugutsa bwemilimi Ikinga ni i veye makuyu gomusala i veye ya Yahova: i veye intakatifu ku Yahova. 31Mundu na a va ni yenya kuboholola kilala kyezaka yeye, a la meda ku kidieli kyevitano. 32Kandi izaka yosi yetsing'ombe na ya magondi, ku vyosi vya vita isi wempimbo, kidieli kilala kyelikumi ki la va kitakatifu ku Yahova. 33Si a la henza ni ki va ni ki veye kilahi kinga ni ki va ni ki veye kidamano, kandi si a la kiranya mba: na a va na a kiranya ku vyosi, hene yaho vyombi, yiki na yiki vya kiranywa vi la va vitakatifu; si ki la bohololwa mba.
34Yaga ga veye amalago ga Yahova ya laga Musa ku avana va Israeli mu kigulu kya Sinai.
©Bible Society of Kenya, 1967