Kyavalevi 25
25
1Kandi Yahova ya volera Musa mu kigulu kya Sinai, na a vola, 2U volere avana va Israeli nokuvavolera, Lwa mu duka mu kivala kya mmu hedzanga, hene yaho kivala ki la va nelisosa lyelisabato ku Yahova. 3Mihiga gyitano na mulala u la taga mulimi gugwo, na mihiga gyitano na mulala u la lomba mulimi gugwo gwemizabibu, nokuvungidza nokuleta makuyu gagyo; 4navutswa muhiga gwegyitano na gyiviri gu la va lisabato lyelisosa lyekivala, lisabato ku Yahova: u ta taga mulimi gugwo kandi u ta lomba mulimi gugwo gwemizabibu. 5Yikyo ki meranga kyene mu ligesa lilyo u ta gesa mba, na mazabibu gemizabibu gyigyo gyi ta lombwa u ta gaagula: gu la va muhiga gwokusosa gwekivala. 6Na lisabato lyekivala li la va lyevyokulia ku mwinye; ku ive, noku mutugwa wowo, noku mutugwa wowo mukana, noku mutugwa u tungangwa, noku mugeni wowo u menyanga halala na ive. 7Noku mitugu gyigyo, noku tsinyama tsi veye mu kivala kikyo, limedeka lyosi li la va vyokulia.
8Kandi u levalidzira masabato gatano na gaviri gemihiga ku ive, gyi veye mihiga gyitano na gyiviri hali katano na kaviri; na ga la va ku ive madiku gamasabato gatano na gaviri gemihiga, gyene gyi veye mihiga makumi gane na gyitano na gyine. 9Na u la tuma kisiliva kyomwoyo munene tsimbega tsyosi ku lidiku lyelikumi lyomweli gwegyitano na gyiviri; mu lidiku lyokukunika ubwoni mu tuma kisiliva mu kivala kyenyu kyosi. 10Na muhiga gwa makumi gatano mu la gu takasa, nokulandidza libohololwa mu kivala kyosi ku vosi ava menya mukyo: na gu la va jubili ku mwinye; na mu lirana sa mulala kwirana ku miyandu gyigye mwene, na mu lirana sa mulala ku aviko veve. 11Muhiga gwa makumi gatano gu la va jubili ku mwinye: mu ta taga mba, kandi mu ta gesa kindu kya mera kyene, kandi mu taagula makuyu gemizabibu gyi ta lombwa. 12Kigira gu veye jubili; gu la va mutakatifu ku mwinye: mu la lia limedeka lyagwo lyomu mulimi.
13Mu muhiga gwa jubili mu lirana sa mulala kwirana ku miyandu gyigye mwene. 14Kandi nu u va nu u gulidza umutende wowo, kinga nu u gula kindu ku mukono gwomutende wowo mu ta dambidzana. 15Kuli livaiidza lyemihiga inyima womuhiga gwa jubili u la gula ku mutende wowo, kandi kuli livalidza lyemihiga gyeligesa a la ku gulidza. 16Kandi kuli livalidza lyemihiga gyi veye minyingi u la meda ubuguli bwagwo, kandi kuli livalidza lyemihiga gyi veye mikekeke u la gehidza ubuguli bwagwo; kigira kuli livalidza lyeligesa li veye, a la ku gulidza ndiyo. 17Na mu ta dambidzana avene na avene mba; navutswa u la tia Nyasaye wowo: kigira inze mbeye Yahova Nyasaye wenyu.
18Kunangwa mu la kola malago gange, na mu la gumira miima gyange nokugyikola; na mu la menya nobulahi mu kivala. 19Na kivala ki lama makuyu gakyo, na mu la lia nokwiguta, nokumenya mukyo nemirembe. 20Kandi ni mu va ni mu vola, Ku la lia ki ku muhiga gwegyitano na gyiviri? Henza, si ku la taga, kandi si ku la vungidza vya medeka vyetu; 21hene yaho nda laga ubugasu bwange ku mihiga gwegyitano na mulala, nagwo gu lama makuyu gemihiga gyivaka. 22Na ku muhiga gwegyitano na gyivaka, mu la taga, na mu la lia makuyu makulu; kuduka ku muhiga gwegyitano na gyine, kuduka makuyu gagwo ga duka, mu la lia makuyu makulu. 23Na kivala si ki la gulidzwa ku ligulidzwa lyemihiga gyosi; kigira kivala ni kyange: kigira mwinye mu veye avageni na avamenyi halala na inze. 24Na mu kivala kyemiyandu gyenyu gyosi mu la haanira kivala mitungu. 25Amwavo wowo na a va na a gwa mudaka, nokugulidza kidieli kyemiyandu gyigye, ma mwiko wewe wa himbi, a ladza nokuboholola yikyo kya amwavo wewe ya gulidza. 26Na mundu na a vula kuva nomundu kukiboholola, na mwene na a nyola ubutugi bwokuduka kukiboholola; 27ma a la validza mihiga gyeligulidzwa lyakyo, na a lirannya ku uyu wa gula kya vita mu; naye a lirana ku miyandu gyigye. 28Navutswa na a ta nyala kwiranyira mwene, ma kya ya gulidza ki la menya mu mukono gwa uyu wa ki gula kuduka ku muhiga gwa jubili: mu jubi li ki la bohololwa, naye a lirana ku miyandu gyigye.
29Kandi mundu na a va na a gulidza inyumba yokumenya mu lidala lyolugaga, ma a la nyala kugiboholola mu muhiga mulala inyima weligulidzwa; a la va nomunwa kugiboholola kuduka muhiga mulala. 30Ni i va ni i ta bohololwa kuduka muhiga mulala, hene yaho inyumba zana i veye mu lidala lyolugaga i la singeridzwa mihiga gyosi kuva ya uyu wa gi gula, mu visukululwi vivye vyosi: na i la vula kutwula mu jubili. 31Navutswa tsinyumba tsyomu tudala tu ta veye nolugaga tsi la validzwa halala nemilimi gyekivala: yitsi tsi nyala kubohololwa, na tsi la twula mu jubili. 32Navutswa amadala ga Valevi, na tsinyumba tsya amadala gemiyandu gyavo, Avalevi va nyala kugiboholola ku tsinyinga tsyosi. 33Kandi mulala ku Valevi na a va na a boholola, hene yaho inyumba ya gulidzwa, na lidala lyemiyandu gyigye, vi la twula mu jubili; kigira tsinyumba tsya madala ga Valevi tsi veye miyandu gyavo mu avana va Israeli. 34Navutswa mulimi gwetsinzako tsya madala gavo, si tsi nyala kugulidzwa mba; kigira gu veye miyandu gyavo madiku gosi.
35Kandi amwavo wowo na a va na a gwa mundaka, na mukono gwiwe na a gwa mudaka, na mukono gwigwe gu dendeyi halala na ive; hene yaho ive u la mu konya: kuli mugeni na mumenya a la menya halala na ive. 36U la vula kuvugula kuye madanyi kinga vyambeti, navutswa u tie Nyasaye wowo; amwavo wowo a menye halala na ive. 37U la vula kumuha ifetha yoyo kunyola madanyi, kinga kumuha vyokulia vivyo kunyola vyambeti. 38Inze mbeye Yahova Nyasaye wenyu, wa mu twulidza mu kivala kya Egepeti, kumuha kivala kya Kanani, nokuva Nyasaye wenyu.
39Kandi amwavo wowo na a va na a gwa mudaka, halala na ive, na yegulidza mwene ku ive; u ta mu kola a tumekire kuli mutugwa. 40A la va nive kuli mutumwa u tungangwa, kandi kuli mumenya, a la va nive; a la ku tumekira kuduka ku muhiga gwa jubili: 41ma a la twula ku ive, uyu na avana veve halala naye, na a lirana ku aviko veve, noku miyandu gya avaguga veve. 42Kigira va veye avatumekiri vange, ava nda twulidza mu kivala kya Egepeti: va la vula kugulidzwa kuva avatugwa. 43U la vula kwameha kuye nobudinyu, navutswa u la tia Nyasaye wowo. 44Kandi makuva ga avatugwa vovo, avasatsa na avakali, ava u la va navo; ku avetsihiri tsi veye himbi na mwinye, ku yavo mu nyala kugula avatugwa, avasatsa na avakali. 45Kandi ku avana va avageni ava menya halala na ive, ku yavo mu nyala kugula, noku aviko vavo ava veye halala na ive, yava ava vivulira mu kivala kyenyu: navo va la va miyandu gyenyu. 46Na mu la va kola kuva miyandu gya avana venyu inyima wenyu, kuva miyandu; ku yavo mu la vugula avatugwa venyu vyemihiga gyosi: navutswa mu tameha nobudinyu ku avamwavo venyu avana va Israeli mba.
47Kandi mugeni kinga mumenya halala na mwinye na a gwa mutugi, na amwavo wowo na a gwa mudaka himbi naye, ni yegulidza mwene ku mugeni kinga ku uyu u menyanga na ive, kinga ku visukululwi vya aviko vomugeni; 48lwenyima lwa a mala kugulidzwa, a nyala kubohololwa: mulala ku avamwavo veve a nyala kumuboholola; 49kinga mifwa, kinga mwana wa mifwa wewe, a nyala kumuboholola, kinga mulala u veye himbi mu aviko veve, a nyala kumuboholola; kinga uyu mwene na a duka kuva mutugi a nyala kweboholola. 50Na a la validza halala na uyu wa mu gula kutwula ku muhiga gwa yegulidza, kuduka ku muhiga gwa jubili: na ubuguli bwa ligulidzwa lilye bu la va kuli livalidza lyemihiga; a la va halala naye kuli mutumekiri u tungangwa. 51Ni gyi va ni gyi tigaye mihiga minyingi, kuli livalidza lyagyo a la tungira libohololwa lilye ndiyo ku ifetha ya ya gulwa. 52Kandi ni gyi va ni gyi tigaye mihiga mikekeke kuduka ku muhiga gwa jubili, ma a la validza halala naye; kuli mikiga gyigye a la tungira libohololwa lilye. 53Kuli mutumekiri u tungangwa ku muhiga nomuhiga a la va halala naye: si a lameha kuye nobudinyu imbiri wetsimoni tsitsyo mba. 54Kandi na a va na a vula kubohololwa ku makuva yaga, ma a la twula ku muhiga gwa jubili, uyu, na avana veve halala naye. 55Kigira avana va Israeli va veye avatumekiri vange; ava nda twulidza mu kivala kya Egepeti: inze mbeye Yahova Nyasaye wenyu.
©Bible Society of Kenya, 1967