Joshua 9
9
1Na ga duka, avami vosi va li engereka ya Yordani, mu kivala kyevigulu, no mu kivala kereremu noku luginga lwe inyanza inene kuhenza Lebanon, Muhiti, na Mwamori, no Mukanani, na Muperizi, no Muhivi, no Mujebusi, lwa va hulira makuva gevindu yivi; 2vevungidza avene halala, kulwana na Joshua na Israeli neliva lilala.
3Navutswa avandu va Gibeon lwa va hulira makuva yaga gosi aga Joshua ya kola ku avandu va Yeriko, na ava Ai, 4navo va kola nobugeeri bwobugadi, ni va tsia kwekola kuli va veye avatumwa, na va gumira magunia makulu ku tsisukiru tsyavo, netsimuya tsyewaini tsinkulu tsya tanduka tsya kupwa vilave 5nevilatu vikulu vya navirirwa ku virenge vyavo, netsingubo tsinkulu tsya vi vika; kandi ubukima bwosi bwe lilagira lyavo bwa li bwumu noku kupa luguku. 6Navo va tsia ku Joshua kuduka mu hokusosa ha Gilgali, na va mbolera, uyu na avasatsa va Israeli, Kwinye ku twuli mu kivala kyehali ligali: kunangwa mu lombe lilagana halala na kwinye. 7Na avandu va Israeli va volerana na Vahivi yava, Mbula mu menyi hagati hetu; na kwinye ku nyala ndi kulomba lilagana ne mwinye? 8Navo va volera Joshua, Kwinye ku veye avatumekiri vovo. Na Joshua ya va teva, Mwinye mu veye vaha? Na mu twuli haliha? 9Navo va mbolera, Kwinye avatumekiri vovo ku twuli mu kivala kyehali kigira lieta lya Yahova Nyasaye wowo: kigira kwinye ku huliye lidzominywa lilye, na makuva gosi aga ya kola mu Egepeti, 10na gosi aga ya kolera avami vaviri va Vaamori, ava li engereka ya Yordani Sihon mwami wa Heshibon, na Ogu mwami wa Bashan, wa li ha Ashitarothu. 11Kandi vakulundu vetu na avandu ve kivala kyetu vosi va volera kwinye, nokuvola, Lero mu vugule vyokulia mmakono genyu vyolugendo, mu tsie kwagana navo, nokuvavolera, Kwinye ku veye avatumekiri venyu: kalunu mu lombe lilagana na kwinye. 12Ubukima bwetu yibu kwa bu vugula ni bu kikiri ubuhyu, mu tsinyumba tsyetu, lidiku lya kwa twula kuudza ku mwinye; navutswa kalunu, henza, bwumi kandi bu kupi luguku: 13netsimuya tsyetu yitsi, tsya kwa vika mu iwaini tsya li tsimpya; na henza kalunu tsya tanduka: netsingubo tsyetu nevilatu vyetu vi gwiye vikulu kigira butambi bwolugendo lwetu. 14Na avasatsa yavo va vugula ku vyokulia vyavo, ni va vula kuteva likuva ku munwa gwa Yahova. 15Na Joshua ya va kola mirembe navo nokulomba lilagana halala navo, va va leke kuva mwoyo: na vanene velivugana va visuhira.
16Na ga duka ku kiheri kyamadiku gavaka inyima welilomba lilagana halala navo, va hulira makuva avandu yavo va veye avatende vavo na va menyi hagati havo. 17Ma avana va Israeli va samula, na va duka mmadala gavandu yavo ku lidiku li kola gavaka. Na madala ga avandu yava ga li Gibeon, na Kefira, na Beerothu, na Kiriathujearim. 18Na avana va Israeli va vula kuvakuya, kigira avanene velivugana va li ni va rnali kuvisuhira ku Yahova, Nyasaye wa Israeli. Nelivugana lyosi lya monya avanene. 19Navutswa vanene vosi va volera livugana lyosi, Kwinye ku visuheye ku Yahova, Nyasaye wa Israeli: kunangwa kalunu si ku nyala kuvadira. 20Ku la va kolera yaga, na ku la va leka va ve mwoyo gase ubutima bu la va ku kwinye kigira lyesuha lya kwa visuhira. 21Na avanene va va volera, Mu va leke va ve mwoyo: kunangwa va gwa avasyagi vetsinku navatsitsanga mkidaho ku livugana lyosi, kuli avanene va va volera.
22Na Joshua ya va langa, na a va volera, na a vola, Mwinye mwa ku gada kigira ki, ni mu vola, Kwinye ku veye avehale ligali; navutswa mu veye hagati hetu? 23Kunangwa kalunu mu laameywi, na si ha la vula kuva ku mwinye avatugwa, avasyagi vetsinku navatsitsa mkidaho vombi venyumba ya Nyasaye wange. 24Navo va tivulira Joshua, ni va vola, Kigira kwa volerwa ligali, kwinye avatumekiri vovo, kuli Yahova Nyasaye wowo ya laga mutumekiri wewe Musa kuhaana ku mwinye kivala yiki kyosi, no kudividza avandu vosi vekivala yiki va twule imbiri wenyu; kigira yaga kwinye kwa tia ligali ku livamwoyo lyetu kigira mwinye, na kwa kola inkuva yiyi. 25Na kalunu, henza, ku veye mmukono gugwo: kuli aga u lola kuva bulahi nobulungi kukukolera, u kole. 26Naye ya va kolera ndiyo, na a va honnya ku mukono gwa avana va Israeli, va vule kuviita. 27Na lidiku zana yilyo Joshua ya va kola avokwasyaga tsinku na vokusomba madzi velivugana, navo ubwali bwa Yahova, kuduka lidiku lya lero, ha zana ha a li tovola.
©Bible Society of Kenya, 1967