Joshua 13
13
1Inyinga yeyo Joshua ya li na a veye musakulu nokutsia mu mihiga minyingi; na Yahova ya mu volera, Ive u gwiye musakulu mu mihiga gyigyo, na ki tigaye kivala kinene ligali ki kikiri kugumirwa. 2Ne kivala ki tigaye ni yiki, vivala vyosi vya Vafilisiti, na Vageshuri vosi; 3kutwula Shihoru, gu veye imbiri wa Egepeti, kuduka ku lwako lwa Ekiron ku luvega lwa kasikasini, kivala ki volwa kuva kya Vakanani; vakulundu vatano ava Vafilisiti: Vagaza, na Vaashidodi, na Vaeskaloni, na Vagiti na Vekiron; kandi Vaavim, 4ku iuvega lwa kusini; kivala kyosi kya Vakanani, na Meara ki veye kya Vasidone, kuduka Afeku, kuduka ku lwako lwa Vaamori; 5nekivala kya Vagebali, na Lebanon hosi, ku luvega lwobutwuliru bweliuva, kutwula Baalgadi isi we kigulu kya Herimon kuduka ho kwingirira Hamathu; 6avandu vosi va menya I mu kivala kyevigulu, kutwula Lebanon kuduka Misirefothumaim, kuli Vasidone vosi; yavo nda va kunga va twule imbiri wa avana va Israeli: navutswa u ki haane ku Israeli kuva miyandu gyavo, kuli nda ku laga. 7Kunangwa kalunu u gavule kivala yiki ki duke kuva miyandu gyetsihiri yitsi tsitano na tsine, nenusu ku ihiri ya Manase.
8Halala naye Varubeni na Vagadi va nyole miyandu gyavo, gya Musa va va ha, engereka w a Yordani ku iuvega lwevugwi, kuli Musa mutumekiri wa Yahova ya va ha: 9kutwula Aroeri, i veye ku luginga lwa Arnon, nelidala lya li hagati helivona, nekereremu kyosi ki veye Medeba kuduka Dibon; 10na madala gosi ga Sihon mwami Vaamori, wameha mu Heshibon, kuduka ku lwako lwa avana va Amon; 11na Gileadi, na ku lwako lwa Vageshuri na Vamaakathu, nekigulu kyosi kya Herimon, na Bashan hosi kuduka Saleka; 12ubwami bwosi bwa Ogu mu Bashan, uyu wameha mu Ashitarothu na mu Edrei (uyu wa tigala ku emindu): kigira Musa ya va kuya na a va kunga. 13Navutswa avana va Israeli si va kunga Vageshuri, kinga Vamaakathu: navutswa Vageshuri na Vamaakathu va menya hagati ha Israeli kuduka lidiku lya lero. 14Navutswa si ya haana ku ihiri ya Levi miyandu kali mulala; vihaanwa vya Yahova, Nyasaye wa Israeli, vya lombwa nomuliru vi veye miyandu gyigye, kuli ya mbolera.
15Na Musa ya ha avehiri ya avana va Rubeni kuli bwiko bwavo. 16Lwako lwavo lwa li kutwula Aroeri, li veye ku luginga lwelivona lya Arnon, ne lidala li veye hagati helivona, nekereremu kyosi ki veye himbi Medeba; 17Heshibon, na madala galyo gosi ga veye mwivona; Dibon, na Bamothubaal, na Bethbaalmeon, 18na Jahazu, na Kedemothu, na Mefaathu, 19na Kiriathaim, na Sibima, na Zerethushaharu mu kigulu kyelivona yilyo, 20na Bethpeoru, nevivala vyevisulungutu ya Pisiga, na Bethjesimoth, 21madala gosi gekivala kyekereremu, nobwami bwosi bwa Sihon mwami wa Vaamori, wameha mu Heshibon, wa Musa ya kuya halala na vanene va Midiani, navo ni Evi, na Rekem, na Zuru, na Huru, na Reba, avakulundu va Sihon, ava menya mkivala zana. 22Balaam kandi mwana wa Beoru, musegetiri, avana va Tsraeli va mwiita nekivavi halala na avandi viitwa. 23No lwako lwavana va Rubeni lwa li mugera gwa Yordani, no lwako lwagwo. Yigyi ni miyandu gyavana va Ruheni kuli bwiko bwavo, madala gagyo no tudala twagyo.
24Na Musa ya ha ihiri ya Gadi, avana va Gadi, kuli bwiko bwavo. 25Lu ako lwavo lwa li Jazeri, na madala gosi ga Gileadi, nenusu yekivala kya avana va Amon, kuduka Aroeri ku luvega lwa Raba: 26na kutwula Heshibon kuduka Ramathumizpe, na Betonim; kandi kutwula Mahanaim kuduka ku lwako lwa Debiri, 27na mwivona Bethharam, na Bethnimira, na Sukothu, na Zafon, na ga tigala ago bwami bwa Sihon mwami wa Heshibon, mugera gwa Yordani nolwako lwagwo, kuduka ku kiheri kyenyanza ya Kinerethu engereka wa Yordani ku luvega lwevugwi. 28Yiki nikyo miyandu gyavana wa Gadi kuli bwiko bwavo, na madala gagyo na tudala twagyo.
29Musa ya ha avenusu yehiri ya Manase miyandu gyavo: gya li gyenusu yehiri yavana va Manase kuliubwiko bwavo. 30Nolwako lwavo lwa li kutwula Mahanaim, Bashan kyosi, nobwami bwosi bwa Ogu mwami wa Bashan, na madala gosi ga Jairo, ga veye mu Bashan, madala makumi gatano ne lilala: 31nenusu ya Gileadi, na Ashitarothu, na Edrei, madala gobwami bwa Ogu mu Bashan, ga li ku avana va Makiru mwana wa Manase ga veye ku inusu yavana va Makiru, kuli bwiko bwavo.
32Yivi vi veye miyandu gya Musa ya gavulira mu kivala kereremu kya i Moabu, engereka wa Yordani ha Yeriko, ku luvega lwevugwi. 33Navutswa ku ihiri ya Levi Musa ya vula kuvaha miyandu: Yahova, Nyasaye wa Israeli, a veye miyandu gyavo, kuli ya va volera.
©Bible Society of Kenya, 1967