Joshua 1
1
1Na ga duka inyima we likudza lya Musa mutumekiri wa Yahova, Yahova ya volera Joshua mwana wa Nuni, wa li mutumekiri wa Musa, na a vola, 2Mutumekiri wange Musa u kudzi; kunangwa ive u vuke, wambuke mugera yigu gwa Yordani, ive, na avandu yava vosi, mu duke ku kivala kya mbedzanga, livola li veye ku avana va Israeli. 3Hosi hetsinduvatiru tsyevirenge vyenyu tsi sena, mmali ku ha mwinye ha zana, kuli nda volera Musa. 4Kutwula ku kyangalangwi, noku Lebanon yiki, kuduka ku mugera munene, mugera gwe Farati, kivala kyosi kya Vahiti, kuduka ku inyanza inene ku luvega lweliyera lyeliuva, ha la va lwako lwenyu. 5Si ha la va nomundu ku vosi u nyala, kusingira imbiri wowo madiku gosi aga u va mwoyo: kuli nda li halala na Musa, ni ndiyo nda va halala nive; inze ligali si nda ku gehera mba, kandi si nda ku leka mba. 6U ve mugulu nomuluviriri; kigira u la lihidza avandu yava miyandu gyekivala kya ndi suhira avaguga vavo nda va ha. 7U ve mugulu nomuluviriri ligali, u duke kulinda kukola kuli lilsga yili lyosi, lya Musa mutumekiri wange ya ku laga: u ta girunkana kulileka, u tsie ku luvega lwomukono mulungi kinga lwomukono mmosi mba, u duke kugasidzwa ha u tsitsanga hosi. 8Kitabu yiki kyelilaga si ki la twula mmunwa gugwo, navutswa u la ganagana kukyo mbasu nobudiku, u duke kulinda kukola kuli gosi aga ng'odwa mu: kigira inyinga zana u la gasidza inzira yoyo, na inyinga zana u la kola nobugeeri. 9Si nda ku laga? U ve mugulu nomuluviriri; u ta tia, kandi u ta kudza mwoyo: kigira Yahova Nyasaye wowo a veye halala nive hosi ha u tsitsanga.
10Kunangwa Joshua ya laga avanyampara vavandu, na a vola, 11Mu vite hagati hokusosa, mu lage avandu mu vole, Mu tegekidze vyokuiia; kigira ku madiku gavaka mu lambuka mugera yigu gwa Yordani, mu duke kwingira ku gumira kivala kya Yahova Nyasaye wenyu a mu hedzanga, mu duke kukigumira.
12Na Joshua ya volera Varubeni, na Vagadi, na inusu yehiri ya Manase, na a vola, 13Mwidzulitse likuva lya Musa mutumekiri wa Yahova ya mu laga, lwa ya vola, Yahova Nyasaye wenyu u mali ku mu ha ubwelemeridzi, naye a la mu ha kivala yiki. 14Avakali venyu, na avana venyu, nemitugu gyenyu, vi la menya mu kivala kya Musa ya mu ha engereka ya Yordani; navutswa mwinye mu lambuka imbiri wa vamwavo venyu ni mwiviki vyu na, avasatsa vosi avaluviriri avobunyali, mu la va konya; 15kuduka lwa Yahova a ha avamwavo venyu uhwelemeridzi, kuli mwinye, navo kandi va nyoye kugumira kivala kya Yahova Nyasaye wenyu a va ha: ma mu lirana mu kivala kyemiyandu gyenyu, mu duke kukigumira, kya Musa mutumekiri wa Yahova ya mu ha engereka ya Yordani ku luvega lwelitwulira lyeliuva. 16Navo va tivulira Joshua, nokumbolera, Yaga gosi aga u ku lagi ku la kola, kandi hosi ho u ku tuma ku la tsia. 17Kuli kwa hulira Musa mu vindu vyosi, ku la hulira ive ndiyo: Yahova Nyasaye wowo a ve halala nive, kuli ya li halala na Musa, yaga geng'ine. 18Ku vosi mundu u tinguha likuva lyomunwa gugwo, na a vula kuhulira makuva gogo ku yaga gosi aga u mu laga, uyu a liitwa: u ve mugulu nomuluviriri yaga geng'ine.
©Bible Society of Kenya, 1967