Jeremia 48
48
1Ku Moabu. Yahova wa mahe, Nyasaye wa Israeli, a vola ndi. O bayaye ku Nebo kigira li lekeywi vutswa; Kiriathaim li leganyeywi, li vuguywi: Misigabu, li leganveywi, nokusasugulwa. 2Lidzominywa lya Moabu si li veye ho kandi mba; mu Heshibon va saaviye ubudamano kulyo: Hambi, ku mu heridze a vule kuva ihiri kandi. Ive kandi O Madimen, u la kiring'anywa; kivavi ki la ku londerera. 3Mwoyo gwelilira gu twulanga Horonaim, ubudivi nobwoneku bunene 4Moabu yononnyeywi; avakeke veve va koli lilira kuhu lirwa. 5Kigira ku lyanegira lya Luhithu va lanegira nokulira kazozo; kigira mu lisulunguta lya Horonaim va hulira ubusaliri bwelilira lyobwo neku. 6Mwiruke, mu honye myoyo gyenyu, mu ve kuli musala gwo mwigendanyama. 7Ga veye kigira ive wa suuvira miyinzi gyigyo nobutugi bubwo, ive kandi u la vugulwa: na Vakemoshu va la hilwa mu lyadikidzwa, avasalisi veve navanene veve halala. 8Uyu mulanyi a ladza ku madala sa lilala, si ha veye nelidala li la hona; livona kandi li la diva, na kereremu ki lononywa; kuli Yahova a voye. 9U he Moabu tsimbaha, a duke kubuluka a tsie: na madala gege ga la va vutswa, si ga la va nomundu wokumenya mugo. 10A laamwe uyu u kolanga miyinzi gya Yahova nobugata; a laamwe uyu wigaliranga kivavi kikye ki vule kunyola masahi.
11Moabu a menya mu bwelemeridzi kutwula bwana buke, wegedi ku maseke gege, si a tsukwa kutwula mu kiju yiki kuduka mu kiju yiki, kandi a vula kutsia mu lyadikidzwa: kigira yaga bunulu bwibwe bu menyanga muye, na amalusu gege si ga girunkana mba. 12Kunangwa Yahova a vola, Henza, madiku gadza, mu madiku yago nda tuma kuye avatsuki, na va la mu tsuka; na va la tsukira viju vivye, nokwatannya tsichupa tsyavo vidonye. 13Na Moabu a la va soni ku Kemoshu, kuli inyumba ya Israeli ya li soni ku Betheli kisuuviri kyavo. 14Mwinye mu vola ndi, kwinye ku veye avaluviriri, ku veye avobunyali ku bulwani? 15Moabu u lekeywi vutswa, navo vanegiye nokwingira mu madala gege, na avasoleli veve avatovolwa va sulunguta ku liitwa, Mwami a vola, welieta lilye li veye Yahova wa mahe. 16Kivi kya Moabu ki veye himbi kuudza, nelisaleridza lilye lidzanga bwangu. 17Mwinye vosi ava mu kumbiridzanga, mu mu lirire, kandi mwinye vosi ava manyi lieta lilye; mu vola, O ya vunika kuli ndi impimbo yetsingulu, impimbo indahi 18O ive mukana u menyanga ha Dibon, yika u twule mu bukumi bubwo, wikale mu buluhu, kigira u mulanyi wa Moabu wanegiye ku ive, wononnyi tsimpinga tsitsyo. 19O ive u menyanga Aroeri, singira ku luginga lwenzira, u linde: u teve uyu wirukanga, na uyu mukali u honanga; u vole, Likuva ki li koleywi? 20Moabu u leganyeywi; kigira li sasuguywi: mu kupe tsikwili mu lire, mu vole makuva ku Arnon, Moabu li koleywi kyanyi. 21Na likalaga li duka ku kivala kyekereremu; ku Holon, noku Jahaza, noku Mefaathu; 22noku Dibon, noku Nebo, noku Bethdibilathaim, 23noku Kiriathaim, noku Bethgamuli, noku Bethmeon, 24noku Keriothu, noku Bozra, noku madala gosi geki vala kya Moabu, ihale na himbi. 25Lwiga lwa Moabu lu kaliki mukono gwigwe gu vuniki, Yahova a vola.
26U mu hambikidze; kigira yekuminya mwene ku Yahova: Moabu a la galagala mu maluuki gege, naye a la sekererwa. 27Kigira Israeli si a veye lisekererwa ku ive? Ya loleka hagati ha avivi? Kigira ku tsinyinga tsyosi lwa u mu talanga, u sung'usanga mutwe. 28O mwinye ava menya ha Moabu, mu twule mu madala, mu menye mu magina; mu ve kuli likulu li lombanga kyaalira kyalyo mmbalu mwomunwa gwobogo. 29Kwa hulira makuva goluyai lwa Moabu, a veye woluyai ligali uyu; lyeginga lilye, noluyai lwilwe nelyekonya lilye, na lyegingira lyomwoyo gwigwe. 30Inze mmanya ubutima bwibwe, Yahova a vola, bu veye bwa vutswa, lidzominya lilye si li dukidza kindu kali kilala. 31Kunangwa nda kupira Moabu tsikwili; yee, nda hanzukira ligali Moabu vosi: va la syomera avandu va Kiriheresi. 32Nda lirira ive nelilira lyokuvita lilira lya Jazeri, O muzabibu gwa Sibima: tsisya tsitsyo tsyambuka inyanza, tsya duka kali ku inyanza ya Jazeri: mulanyi u gwiye ku makuyu gogo genyinga yoluya, noku ligesa lilyo lyamazabibu. 33Busangali nobuyanzi bu twulidzeywi mu mulimi gwamanga nomu kivala kya Moabu, na inze nda kaminya iwaini mu vyokumina: si ha veye na uyu u duvaga halala nelihanzuka; lihanzuka si li la hanzukwa mba. 34Kutwula ku lilira lya Heshibon kuduka Eleale, kali kuduka Jahazu va gi nganga myoyo gyavo, kutwula Zo aru kuduka Horonaim, kali kuduka Egilathushelisiya: kigira amadzi ga Nimrim ga la lekwa vutswa. 35Ka ndi nda kola a heridzwe ku Moabu, Yahova a vola, uyu u haananga hadi guluku, na uyu u vuyidzanga vimuli ku vanyasaye veve.
36Kigira yaga mwoyo gwange gu kupira Moabu lwanga kuli lilere, mwoyo gwange gu kupira avandu va Kiriheresi lwanga kuli lilere: kigira yaga ubunyingi bwa yenyolera bu goti. 37Kigira mutwe sa mulala gu gwiye nekyole, na tsinderu tsyosi tsi vegeywi: ha veye netsimbala tsyokusalagwa mu makono gosi, nevikenge vyosi vi boheywi tsingubo tsyamagunia. 38Igulu ku tsinyumba tsyosi ha Moabu noku mahasi galyo ha veye nelisyoma hosi: kigira inze mmali kwononnya Moabu kuli kiju ki ta yandzidzanga kyononnyangwa, Yahova a vola. 39Lya sasugulwa kuli ndi va kupanga tsikwili kuli ndi Moabu virana mugongo netsisoni kuli ndi ni ndiyo Moabu a la va kihenyahenye nokuhendidza vosi ava mu kumbiridza ku tsimbega. 40Kigira Yahova ya vola ndi: Henza, a la buluka kuli indidzu, na a nyira tsimbaha tsitsye ku Moabu. 41Keriothu li vuguywe, netsimpinga tsi gumeywi, lidiku yilyo myoyo gya valuviriri va Moabu gyi la va kuli mwoyo gwomukali u lumangwa. 42Moabu a la dividzwa ihiri i vule kuva yo kandi, kigira yekuminya ku Nyasaye. 43Ubutii, na bogo, na mutego, vi veye ku ive, O u menyanga Moabu, Yahova a vola. 44Uyu wirukanga ubutii a la gwa mbogo; na uyu u twulanga mbogo a la ha mbwa mmutego: kigira nda leta kuye livola li veye, ku Moabu, muhiga gwelihenzwa lilye, Yahova a vola.
45Yavo aviruka va singiye mu kiriri kya Heshibon, na si va veye netsingulu; kigira muliru gwa twula Heshibon, na lumemo lwomuliru lwa twula hagati ha Sihon, na lu sambi lwiga lya Moabu, na lwote lwavana vekivihiri. 46O bayaye ku ive Moabu avandu va Kemoshu va divi: kigira avana venyu vayai va hileywi avahambe, navakana vadikidzeywi mbuhambe. 47Kandi ndirannya lyadikidzwa lya Moabu mu madiku gekiheri, Yahova a vola. Likalagirwa lya Moabu li duki hano.
Currently Selected:
Jeremia 48: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
