Vakalagi 3
3
1Kunangwa tsihiri tsya Yahova ya leka ni yitsi, a duke kugeridza Israeli natsyo, kali yava ava vula kumanya ubulwani bwosi bwa Kanani; 2visukululwi vyavana va Israeli vi duke kumanya, kuvegidza bulwani, kuduka ku yavo ava vula kubumanya ku matsyambiri: 3navo navanene vatano va Vafilisiti, na Vaknnani vosi, na Vasidone, na Vahivi ava menya mkigulu kya Lebanon, kutwula mkigulu kya Baal-herimon, kuduka hokwingira ha Hamathu. 4Yavo va lekerwa, kugeridza Israeli navo, kumanya ni va va ni va hulira amalago ga Yahova, ga ya laga avaguga vavo nomukono gwa Musa. 5Avana va Israeli va menya hagati ha Vakanani, na Vahiti, na Vaamori, na Vaperizi, na Vahivi, na Vajebusi: 6na va vugula vakana vavo kuva avakali vavo, navo va serera avakana vavo ku avayai vavo nokutumekira vanyasaye vavo.
7Navana va Israeli va kola ubudamano imbiri wa Yahova, ni vivirira Yahova Nyasaye wavo, na va tumekira Vabaal na Ashitarothu. 8Kunangwa ubutima bwa Yahova bwaaka ku Israeli, naye ya va gulidza na a va vika mmakono ga Kushan-rishathaim mwami wa Mesopotamia: navana va Israeli va tumekira Kushan-rishathaim mihiga gyitano na gyivaka. 9Na lwa avana va Israeli vanira Yahova, Yahova ya singeridzira avana va Israeli mukonyi, wa va konya, naye ni Othinieli, mwana wa Kenazu, amwavo muke wa Kalebu. 10Na Roho wa Yahova yadza kuye, na ya kalagira Israeli: na ya twula kutsia mbulwani, na Yahova ya vika Kushan-rishathaim mwami wa Mesopotamia mmukono gwigwe: nomukono gwigwe gwa guuta Kushan-rishathaim. 11Na kivala kya sosa mihiga makumi gane. Na Othinieli mwana wa Kenazu ya kudza.
12Navana va Israeli va kola ubwoni kandi imbiri wa Yahova: na Yahova ya ha Egilon mwami wa Moabu tsingulu ku Israeli, kigira va kola budamano imbiri wa Yahova 13Naye ya vungidza avana va Amon na Amaleki; na ya tsia na ya kuya Israeli, na va gumira lidala lya makindu. 14Navana va Israeli va tumekira Egilon mwami wa Moabu mihiga likumi na gyitano na gyivaka.
15Navutswa lwa avana va Israeli vanira Yahova, Yahova ya va singeridzira muhonyi, naye ya li Ehudu mwana wa Gera, Mubenjamini, mundu ummosi. Navana va Israeli va hila bushutu ku Egilon mwami wa Moabu, mmukono gwa Ehudu. 16Na Ehudu yelombera kivavi kyobwogi tsimbega tsyombi, ubutambi bwakyo bwa li mukono mulala; na yeboha kivavi zana musi mwetsingubo tsitsye ku ivadzwa yeye yo mukono mulungi. 17Naye ya ha Egilon mwami wa Moabu ubushutu: na uyu Egilon ya li mundu mukomeru ligali. 18Na lwa ya mala kuhaana ubushutu, ya ha avandu ava ginga ubushutu munwa ni va tsia. 19Navutswa mwene ya girunkana kutwula ha magina ga vadzwa himbi Gilgali, na a vola Mbeye namakuva ga makiriri ku ive O mwami. Naye ya vola, Mu kiring'ane. Na vosi ava singira himbi naye va twula ni va mu leka. 20Na Ehudu yisunda himbi kuye: naye yikala mwene yeng'ine mu inyumba yegulu yeye yobukindu. Na Ehudu ya vola, Mbeye namakuva ku ive ga twula ku Nyasaye. Na ya singira ku intebe yeye. 21Ehudu ya nyira mukono gwigwe ummosi, na a gumira kivavi kukisomola ku ivadzwa yeye yoku luvega lwomukono mulungi, naye ya mu tumita munda mwimwe: 22nekilungi kandi kingira kulonda kivavi; netsitinya tsya dinya ku kivavi, kigira si ya twulidza kivavi mmunda mwimwe; na kya twulira luvega lundi. 23Hene yaho Ehudu ya twula na a tsia ku lusimbu, na ya hana miliango gyenyumba yegulu, ya mu hanira mu na a vasira.
24Na lwa ya mala kutwula, avatumwa veve ira duka; na lwa va lola, henza, miliango gyenyumba yegulu gyi haneywi nokuvasirwa, na va vola Ligali a kunikanga virenge vivye munyumba yobukindu. 25Navo va linda kuduka va luha va va netsisoni; naye si yigula miliango gyenyumba yegulu mba; kunangwa va vugula lufungu u, nivigula; henza, mwami wavo u gwiye hasi u kudzi.
26Na Ehudu yiruka lwa va lindirira, na ya vita hokuvadza magina, niyirukira Seira. 27Kunangwa, lwa ya duka yo, ya kupa kisiliva mu kivala kyevigulu kya Efiraim; navana va Israeli va sulunguta halala naye kutwula mu kivala kyevigulu, naye ya vimirira. 28Na ya va volera, Mu nonde; kigira Yahova u viki avasigu venyu Vamoabu mu makono genyu. Navo va sulunguta inyima wewe, na va gumira tsinyambuku tsya Yordani ku luvega lwa Vamoabu, na si va bugirira mundu kwambuka mba. 29Na va kuya Vamoabu inyinga yeyo avandu avasatsa ava duka tsielfu likumi, sa mulala wetsingulu, sa mulala muluviriri, si ya hona kali mundu mulala mba. 30Kunangwa Moabu va guutwa lidiku yili isi womukono gwa Israeli. Nekivala kyelemeridza mihiga makumi gatano na gavaka.
31Na inyima wa uyu ya li ho Shamigari, mwana wa Anathu, naye ya kuya ku Vafilisiti avandu tsimia tsitano na indala na makangu getsing'ombe, naye kandi ya honnya Israeli.
©Bible Society of Kenya, 1967