Isaya 53
53
1Ni bwaha u bugirira makuva getu? Na mukono gwa Yahova gwa vuulirwa bwaha? 2Kigira ya viruka imbiri wewe kuli kya simikwa kidoto, na kuli imiri gi sibukanga mu kivala kyumu: si a veye neligondo kinga bulahi; na lwa ku mu lola, si a veye nobulahi kwinye ku duke kumukayirwa. 3Ya legwa, navandu va mu sula; ya li mundu welivererera, ya manya ubuverereri ligali: kandi ya legwa kuli mulala wavandu va visa mmoni mwavo; na si kwa vola a veye kindu.
4Ligali ya ku gingira ubuverereri bwetu, kandi ya vugula ubulwayi bwetu; navutswa kwinye kwa vola, ya kupidzwa kivi, Nyasaye ya mu kuya, na a saliridzwa. 5Navutswa ya tumitwa kigira ubwoni bwetu, na ya kindukira budamano bwetu; nelikuywa lyemirembe gyetu lya gwa kuye, ku tsinkavaala tsitsye kwinye ku honnywa. 6Kwinye kwosi ku goti kuli magondi; ku girunkani sa mulala a londa inzira yeye; na Yahova a mu dwika ubudamano bwetu kwosi.
7Ya dambidzwa, navutswa lwa ya saliridzwa si ya kunula munwa gwigwe; kuli mwana weligondi ya hilwa kwiitwa, kandi kuli ligondi li kiring'ana imbiri wa yavo ava kalaganga bwoya, si ya kunula munwa gwigwe mba. 8Nelidambidzanelikalagirwa vya mu twulidza; nomu likula lilye, ibwaha wa manya u twulidzeywi mu kivala kya va veye mwoyo, kigira mahyolo gavandu vange ava dukana neliduywa? 9Va mu lombera kilindwa halala navadamano, kandi halala na mutugi mu likudza lilyekali ni ya vula kukola kirage, kandi si ha li nobugadi mmunwa gwigwe.
10Navutswa ga yanzidza Yahova kumukuya; ya mu vereridza: lwa u kola mwoyo gwigwe kuva kyokusayasayira ubwoni, a la lola kisukululwi kikye, a la meda madiku gege, na ga Yahova a yanza ga la gasidzwa mmukono gwigwe. 11A la lola ubululu bwelilumwa lyomwoyo gwigwe, na a la yanzidzwa: kigira lyemanya mwene mutumekiri mulungi wange, a la ha vanyingi ubulungi; naye a la ginga ubudamano bwavo. 12Kigira yaga nda mu gavulira kidieli halala na vanene, naye a la gavula vilanye halala na vetsingulu; kigira ya sundula livamwoyo lilye kuduka ku likudza, naye ya validzwa halala na vahyolanga: halala na yaga ya ginga ubwoni bwa vanyingi, kandi ya saalira yavo ava hyolanga.
©Bible Society of Kenya, 1967