Isaya 37
37
1Na ga duka lwa mwami Hezekia ya hulira yaga, ya tandula tsingubo tsitsye, ni yevika ingubo yeligunia, ni yingira mu inyumba ya Yahova. 2Na ya tuma Eliakim, munene wenyumba yeye, na Shebina mung'odi, na vakulundu va vasalisi, vivika magunia, va tsie ku Isaya muprefeti mwana wa Amozu. 3Va mu volera, Hezekia a vola, Lidiku lya lero yili li veye lidiku lyekivi, nelyokuhebwa mageli, nelya manyego; kigira avana va duki kwivulwa, netsingulu tsyokwivula si tsi ve ho mba. 4Namusia Yahova Nyasaye wowo a la hulira makuva ga Rabi shake, womwami wa Asuria munene wewe ya tuma a duke kunyega Nyasaye u veye mwoyo, nokugondokira amakuva aga Yahova Nyasaye wowo u huliye: kunangwa, kigira yaga u gingire avatigaye lisaala lilyo. 5Ma avatumwa vomwami Hezekia va duka ku Isaya. 6Na Isaya ya va volera, Mu volere munene wenyu makuva yaga, Yahova a vola, U ta tia makuva ga wa hulira, aga vatugwa vomwami wa Asuria va nnyegi nago. 7Henza, nda vika roho muye, na a la hulira lusuma, na a lirana mu kivala kikye mwene; na nda kola a duke kugwa ku kivavi mu kivala kikye mwene.
8Ma Rabishake yirana, na ya nyola mwami wa Asuria na a veye mu lilwana na Libina; kigira ya hulira u twuli ha Lakishi. 9Kandi ya hulira makuva ga Tirihaka mwami wa Ethiopia, U twuli a lwane nive. Na lwa ya hulira yaga, ya tuma avatumwa ku Hezekia, na a vola 10Mu la volera Hezekia mwami wa Yuda amakuva yaga, mu la vola, U ta ieka Nyasaye wowo wa u suuviranga a ku gade, na a vola, Yerusalemi si li la vikwa mu mukono gwomwami wa Asuria. 11Henza, ive u mali kuhulira makuva gevindu vyosi vyavami va Asuria va koli ku vivala vyosi, kuli va vi dividza ligali; na ive u la hona? 12Avanyasaye vetsihiri va va honnya, ava vadada vange va dividza, Gozan, na Harani, na Rezefu, navana va Eden ava veye mu Telasari? 13Mwami wa Hamathu a veye haliha, nomwami wa Aripadi, nomwami uelidala lya Sefa rivaim, na wa Hena, na wa Iva?
14Na Hezekia ya vugula ibaruwa mmukono gwavatumwa, na a gi soma; na Hezekia yanegira mu inyumba ya Yahova, na vambuula ibaruwa imbiri wa Yahova. 15Na Hezekia ya saala Yahova, na a vola, 16O Yahova wa mahe, Nyasaye wa Israeli, wikaye hagati ha vakerubi, ive u veye Nyasaye, ive weng'ine, mu bwami bwosi bwelirova; ive wa lomba ligulu nelirova. 17U tegidze gutu gugwo, O Yahova, u hulire; u kunule tsimoni tsitsyo, O Yahova, u lole; u hulire makuva yaga gosi aga Senakeribu, wa tuma avatumwa kunyega Nyasaye u veye mwoyo. 18Na geligali, Yahova, avami va Asuria va dividzi vivala vyosi, nemi limi gyavo, 19nokusyuva vanyasaye vavo mmuliru: kigira si va veye avanyasaye, navutswa va veye miyinzi gya makono gavandu, misala na magina; kigira yaga va va dividzi. 20Kunangwa kalunu, O Yahova Nyasaye wetu, u ku honnye ku mukono gwigwe, tsihiri tsyosi tsyomu lirova tsi duke kumanya ive u veye Yahova, ive weng'ine.
21Hene yaho Isaya mwana wa Amozu ya tuma mundu ku Hezekia, kumuvolera, Yahova Nyasaye wa Israeli, a ku volera, Kigira ive u saaye inze kigira Senakeribu, mwami wa Asuria, 22likuva lya Yahova ya tivula ku makuva gege, ni yili: Mukana migima wa Zioni u legi ive nokukuseka kuduka kuva isoni; mukana wa Yerusalemi u ku sung'useye mutwe gwigwe. 23Ni bwaha wa ive wa lega nokunyega? Kandi wa ginga mwoyo gugwo ku bwaha, nokuginga tsimoni tsitsyo ku bwaha? Kali ku Uyu Mutakatifu wa Israeli. 24Ive u legi Yahova ku vatumwa vovo, nokuvola, Inze nzanegiye igulu kuduka ku isongo yevigulu, nobunyingi bwamagari gange gobulwani, nduki mugati mwa Lebanon; nda tema mitaragwa gyagwo mitambi nemisala gyagwo mitovole; ndingira mugati mugwo hadiguluku ha veye ihale ligali, mulitu gwomulimi gwi gwe gwamanga; 25nda yava nokunwa madzi, nda kaminya migera gyosi gya Egepeti netsinduvatiru tsyange.
26Si u huliye kuli nda kola vindu yivi ku matsyambiri, nokuvilomba mu madiku ga vita? Kalunu mbidukidzi, u duke kuva wokutung'aminya madala getsingaga, ga duke kuva vitumi vyeving'anye. 27Kigira yaga avandu yava va li netsingulu tsinke keke, va genya nokutia; va li kuli bunyasi bwombulimu, kuli tsingutsa tsimbisi, kuli bunyasi ku tsinyumba igulu, kuli mulimi gwengano ni kikikiri kuviruka. 28Navutswa inze ma nya likala lilyo, nelitwula lilyo, neli ngira lilyo, nobutima bubwo ku inze. 29Kigira ubutima bubwo ku inze, kandi kigira kirage kikyo ki duki mmatu gange, kigira yaga inze nda vika inzago mu molo gogo, nelijamu mu minwa gyigyo, na nda kwirannya ku inzira ya wadzira ku.
30Na inkuva yiyi i la va lilolekidza ku ive: mu la lia muhiga guno vimeranga vyene, na mmuhiga gwa kaviri vya sibuka ku vya zana, nomu muhiga gwa kavaka mu tage bugutsa, mu gese, mu simike mizabibu, na mu lie makuyu gagyo. 31Na va tigala ava hona venyumba ya Yuda va likidza tsimiri hasi, nokwama ma kuyu. 32Kigira li la va ho litigala li twula Yerusalemi, na va hona kutwula kigulu kya Zioni: Lididikana lya Yahova wa mahe li la kola yaga.
33Kunangwa kigira yaga Yahova a vola ndi ku makuva gomwami wa Asuria, Si a lingira mu lidala yili mba, kandi si a la lasa ho mbano, kandi si a ladza mmugidzi gwelidala yili nengavo, kandi si a la kola kitumi kyalyo. 34Ku inzira ya yadzira ku, a liranira ku inzira zana, na si a lingira mu lidala yili mba, Yahova a vola. 35Kigira inze nda sola lidala yili kulihonnya, kigira inze mwene, na kigira Daudi, mutumekiri wange. 36Ma ingelosi wa Yahova ya twula, ni yiita avandu tsielfu mia na makumi gatano na gavaka na tsielfu tsitano mu hokusosa ha Asuria; navandu lwa va vuka mugamba, henza, vosi va li avakudzu avere. 37Ma Senakeribu mwami wa Asuria ya tsia, ni yirana kumenya Nineve. 38Na ga duka, ku lidiku lilala lwa ya li na a sigamiranga mu inyumba ya Nisiroko munyasaye wewe, avana veve Adarameleku na Sharezeru va mwiita nekivavi; na virukira mu kivala kya Ararati. Na mwana wewe wa langwa Esarihadon yameha mbugono bwibwe.
©Bible Society of Kenya, 1967