Isaya 3
3
1Kigira, henza, Yahova, Yahova wamahe, a twulidzanga mudigiru nempimbo mu Yerusalemi nomu Buyuda, mudigiru gwosi gwobukima, nempimbo yosi yamadzi; 2mundu wetsingulu, nomundu wobulwani; mu kalagi, nomuprofeti, musegetiri, no mukulundu; 3munyampara wavandu makumi gatano, nomundu mmanyekanu, nomboli, nomusidza, nomulongoli. 4Na nda va ha avana kuva avanene vavo, navana vadoto va lameha kuvo. 5Navandu va la dambidzwa, sa mulala nowakye, na sa mulala nomutende wewe: mwana a legingira imbiri womukulundu, nomu nyaaviru a legingira imbiri womma nyekanu. 6Hene yaho mundu a la gumira amwavo wewe mu inyumba ya dada wewe, nokuvola, Ive u veye nengubo, wamehe ku kwinye, nobwoneku yibu bu ve isi womukono gugwo; 7mu lidiku yilyo a la ginga mwoyo gwigwe, kuvola, Inze si nda va muhonnyi; kigira mu inyumba yange si mu veye nevyokulia kinga tsingubo: si mu nyala kunkola kuva mwami ku vandu yava. 8Kigira Yerusalemi li sambuywe, ne Buyuda bu gwiye; kigira tsinimi tsyavo nevikolwa vyavo vi hing'ana na Yahova, kuvihiriridza tsimoni tsyobukumi bwibwe. 9Liloleka lyommoni mwavo li lolekidza lihing'ana kuvo: na va lang'aminya ubwoni bwavo kuli Sodoma, si va visanga mba. Budamano bu ve ku mwoyo gwavo kigira vekoli avene ubuda mano. 10Mu vole ku mulungi, ga la va amalahi kuye: kigira va la lia makuyu gevikolwa vyavo. 11Bu damano bu ve ku mudamano ki la va kivi kuye; kigira a la hebwa likola lyamakono gege. 12Makuva gava ndu vange, avana va va dambidza, na vakali vameha kuvo. O avandu vange, yavo ava kwimiriranga va ku kyaminyanga, va dividzanga inzira yetsinzira tsitsyo.
13Yahova ya singiranga a duke kuhing'ana, a singiranga kukalagira avetsihiri. 14Yahova a lingira mu likalaga navakulundu vavandu veve navanene vavo: Ni mwinye ava mali kulia mulimi gwamazabibu; vyalanywa ku vadaka vi veye mu tsinyu mba tsyenyu: 15kigira ki mu dambidza avandu vange, nokusia mmoni mwa vadaka? Mwami Yahova wa mahe, a vola.
16Kuvita yaga, Yahova a vola, Kigira avakana va Zioni vegingira, na va gendanga namagoti manyiriku, netsimoni tsinyumu, ni va genda ku litematema inzira, nokutuula muliviti gwetsinyambula tsyomu virenge vyavo; 17kigira yaga Yahova a la kuya avakana va Zioni yavo nobufuma ku mitwe, na Yahova a la lang'aminya vyaviswa vyavo. 18Mu lidiku yilyo Yahova a la twulidza ubulahi bwetsinyambula tsyavo, migoye gyokumitwe, netsisimbi tsyavo; 19na tsinono tsyavo, nevisambo, netsingubo tsyokumutwe; 20nevigu du, neminyoro gyoku virenge, nobu tsiiri, neviseve vyevifunyanga mwayu, na tsinkombo; 21netsimingiri, netsinono tsyamolo; 22netsingubo tsyobukumi, nevisibao, netsingubo tsyavo tsinziyuhira notumuya; 23nevyelolero, nekatani indahi, netsigudwa, netsingubo tsinzasasu. 24Na ga la duka, mu bugono bwe vifunyanga mwayu gu la funya ubugundu; nombugono bwobutsiiri, ha la va na lufuno, nobugono bwelisu lya navwa, ha la va ne kyavusu; nombu gono bwekisibao, ha la va netsingu; bo tsyamagunia; na maballanda ga la va mbugono bweligondo lilahi. 25Na vekisatsa vovo va la gwa ku kivavi, navanene vovo va la gwa mu bulwani. 26Na viribwa vivye vi la lira nokusyoma; naye a la va mukali wa lekwa, naye a likala hasi.
©Bible Society of Kenya, 1967