Hosea 4
4
1Mu hulire likuva lya Yahova, mwinye avana va Israeli; kigira Yahova a veye nelihing'ana ku vamenyanga mkivala yikyo, kigira si ha veye na geligali, kinga tsimbabasi, kinga limanya Nyasaye mu kivala. 2Si ha veye nekindu ni li ta li lyesuha, nobubehi nokwiita, nokwiba, nobuheyi; va twulira namasahi ga dira masahi. 3Kigira yaga kivala ki la syoma, na sa mulala u menyanga mukyo a la ng'aha, halala netsinyama tsyombulimu na manyonyi gombwerefu; yee, tsisudzi tsyomu inyanza kandi tsi la twulidzwa. 4Navutswa mundu kali mulala a ta hing'ana, kinga mundu kali mulala a ta gondokera wundi: kigira avandu vovo va veye kuli ava hing'ananga nomusa lisi. 5Na ive u likigitala mu inyi nga yombasu, na muprofeti kandi a likigitala halala nive mu inyinga yobudiku; na nda dividza mama wowo. 6Avandu vange vononnywa kigira va daka limanya: kigira u suye limanya, na inze nda ku sula, ive u ta va musalisi ku inze mba: kigira wivirira lilaga lya Nyasaye wowo, inze ndivirira avana vovo. 7Kuli limedeka lyavo, ni ndiyo kandi mahyolo gavo ku inze ga leng'ana nalyo: nda girunkannya ubukumi bwavo bu duke kuva tsisoni. 8Avene velihidzanga mu ubwoni bwavandu vange, na va vikanga mu myoyo gyavo ubudamano bwavo. 9Na ga la va kuli avandu va veye, avasalisi kandi va veye ndiyo; na nda va ha mageli kigira tsinzira tsyavo nokuvatunga likola lyavo. 10Va la lia, na va la vula kwiguta; va lekola malaya, na si va la medeka; kigira va leka kulinda likuva lya Yahova.
11Likola malaya newaini namalwa vi twulidzanga limanya lyavandu. 12Avandu vange va teva likuva ku kigenga kyavo, nempimbo yavo ya vilwadzira; kigira mwoyo gwamalaya gwa va kyaminya, na va kola malaya kutloula isi wa Nyasaye wavo. 13Viitanga tsisadaka tsyavo igulu wevigulu, nokusamba vimuli mu tugulu, isi wemisala tsing'ano tsinyingi, kigira viriri vyagyo vi veye vilahi: kigira yaga avakana venyu vekola malaya, na aviha venyu va kola ubuheyi. 14Si nda ha avakana venyu amageli lwa vekola malaya, kandi aviha venyu si nda va ha mageli lwa va heya; kigira avasatsa avene va tsia ha luvega halala navamalaya, na va haana vihaanwa vyavo halala navakali vama laya; navandu va ta li nelimanya va lononnywa.
15Kali ive Israeli wekola wamalaya, Yuda a vule kwona; na mwinye mu la vula kuduka ha Gilgali; kandi mu tanegira Bethaven, kandi mu la vula kwisuha, ku vola, Kuli Yahova a veye mwoyo. 16Kigira Israeli u koli bwibaali, kuli iroli yobwibaali: kalunu Yahova a la va lihidza kuli mwana weligondi mu ubwiyangu bunene. 17Efiraim u hambannyeywi nevifwananyi; u mu leke a ve. 18Kyokunwa kyavo ki gwiye kilulu; va londanga malaya kazozo; avamehi veve va yanza tsisoni ligali. 19Imbuudza i mu bohi mu tsimbaha tsitsye, na va la va isoni kigira vihaanwa vyavo.
Currently Selected:
Hosea 4: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
