Habakuk 1
1
1Yibu nobuliduhu bwomuprofeti Habakuk ya lola. 2O Yahova, ndanira ive kuduka inyinga ki, na ive nu u vula ku mbulira? Nyaniranga ive kigira kirage, na ive si wenya kukonya. 3Kigira ki u mannyanga inze ubudamano, kigira ki u henzanga ubukyamu? Ki gira ubwoneku nekirage vi veye imbiri wange; kandi ubulwani nelihing'ana vi vuki. 4Kigira yaga lilaga li gehi, nelikalaga si li nyoleka mba; kigira avadamano va kumbiridza avalungi; kigira yaga likalaga lyobukyamu li loleka.
5Henza, mwinye ava veye hagati hetsihiri, mu lole, na mu genye ligali; kigira nkolanga miyinzi mmadiku genyu, gya mu vula kusuuvira kali ni mu volerwa. 6Kigira, henza, nsingeridzanga Avakalidei, ihiri i veye nobululu, i kolanga bwangu, ava vitanga hagati helirova, kugumira bumenyo bu ta li bwavo. 7Va veye avokutihidza, avadamano ligali; likalaga lyavo, na ubukumi bwavo, vi twulanga muvo avene. 8Tsiparasi tsyavo tsi veye netsimbiru kuvita engo, na tsindulu kuvita kisalang'ongo kyamgolova; avasikari vetsiparasi velandidzanga: yee, avasikari vavo vetsiparasi va twula ihale liga'i; va bulukanga kuli indidzu i gendanga tsimbiru kulia. 9Yavo vosi vadza nekirage; mmoni mwavo mu henza imbiri kuli imbuudza yevugwe; na va vungidzanga vahambe kuli mu yeke. 10Yee, va kolera avami kihenyahenye, navanene va gwiye lilega lilye; a leganga tsimpinga tsyosi; kigira a vungidzanga lugukyi nokulugumira. 11Hene yaho a la vita nomuliviti kuli imbuudza, nokwa mbuka, na a la va nelihyola; kali uyu wobunyali bwibwe bu veye munyasaye wewe.
12Ive si u veye wemihiga nemihiga, O Yahova Nyasaye wange, Mutakatifu wange? Kwinye si ku la kudza mba. O Yahova, wa vika uyu kuva welikalagwa; na ive, O Lwanda, wa mu singeridza a duke kulungekidza. 13Ive u veye netsimoni tsindahi, tsi ta nyala kulola ubudamano, na u ta nyala kulola ubukyamu, kigira ki u henzanga yavo ava kolanga ubu gadi, na ive u kiring'ananga inyinga mudamano a miranga mundu wobulungi bu vita bwo mwene uyu; 14na u kola avandu kuva kuli tsisudzi tsyomu inyanza, kuli vimolanga, vi ta li nowokwameha kuvyo? 15Uyu a gumiranga vosi nenzago, a va gumira nga nomuluvo, nokuvavungidza halala mu kyokukwesa kikye: kigira yaga a sangalanga nokuyanza. 16Kigira yaga a lombera muluvu gwigwe kihaanwa, nokuvuyidzira kyokukwesa kikye kimuli; kigira a nyolanga kidieli kyobunolu ku vindu yivi, nevyokulia vivye vi nenehi. 17Kigira yaga a la twulidza vyosi vi veye mu muluvo gwigwe, na a la vula kwegaya kwiita avetsihiri kazozo?
Currently Selected:
Habakuk 1: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
