Vagalatia 5
5
1Mu libohololwa lya Kristo ya ku boholola nalyo, mu singire mu budinyu, kandi mu ta gumirwa hali kaviri nenira yobutugwa.
2Henza, inze Paulo mmu volera, mwinye ni mu kevwa, Kristo si a la mu konya kali hakuzu.
3Yee, mmu lolekidzira kandi ku vosi u bugirira likevwa, a veye neligovi a duke kukola lilaga lyosi. 4Mwinye avenyanga kuvolwa kuva nobulungi kigira lilaga mwavukannyeywi na Kristo: mu gwiye kutwula mu tsimbabasi. 5Kigira kwinye ku lindiririra na Roho, lisuuviridzwa lyobulungi kigira lisuuvira. 6Kigira mu Kristo Yesu likevwa si li konya kindu, kinga livula kukevwa; navutswa lisuuvira li kolanga miyinzi kigira ubuyanzi. 7Mwa li ni mu nyagula bulahi; ibwaha wa mwigalira mu ta hulira ageligali? 8Ligoonya yili si lya twula ku uyu u langa mwinye. 9Mamera makekeke ga duvula lihumbi lyosi. 10Mbeye nelisuuvira ku mwinye mu Mwami, si mu la va nomwoyo gundi kali mulala: navutswa ku vosi uyu u mu kupidza kivi a la va nelikalagirwa lilye mwene. 11Navutswa inze, avamitu, ni mba ni nzilwadza likevwa kuduka kalunu, kigira ki ndambidzangwa kuduka kalunu? Kunangwa likigitalidza lyomusalaba li heri. 12Nkano va lyekala avene, yava ava mu hendidzanga myoyo. 13Kigira mwinye avamitu, mwa Iangwa mu nyole libohololwa; navutswa libohololwa lyenyu li ta va ubwiyangu bwomubiri, navutswa mu tumikirane avene navene nobuyanzi. 14Kigira lilaga lyosi li dukidzireywi mu likuva lilala, nalyo ni yili, U yanze mutende kuli weyanza mwene. 15Navutswa ni mu lumana nokulitsana avene navene, mwelinde gase mu la malirana avene navene.
16Navutswa mbola, Mu gende netsingulu tsya Roho, mu la vula kudukidza likayirwa lyomubiri. 17Kigira mubiri gu kayirangwa, ma gu tamana na Roho, kandi Roho a tamana nomubiri; kigira yivi vi tamana vyene na vyene; mbuli kukola vindu vya mwenya. 18Navutswa Roho na a mwimirira, si mu boheywi mu lilaga. 19Kunangwa miyinzi gyomubiri gyi veye habulavu, nagyo: namalaya, nekifwabwi, nokutsia mbakana, 20nokusigamira misambwa, nobukumu, nobusigu, nelihing'ana, nembodoka, nobutima, namahangali, nokwavukana, nokwekala vidieli, 21nelikendeka, nobuhambiki, nevindu vyoluyai, nevindu kuli yivi; ku vindu yivi ntanga kumuvolera kuli wa nda mu volera, yava ava kolanga vindu kuli yivi si va li nyola ubwami bwa Nyasaye. 22Navutswa likuyu lya Roho li veye ubuyanzi, nobusangali, nemirembe, nobwikudziri, netsimbabasi, nobulungi, nobusuuvirifu, 23nobuhokya, nokwelinda; si ha li nemiima gu sulana namakuva kuli yaga. 24Kandi yava ava veye va Kristo Yesu va mali kubambwa mubiri halala nelyegombwa lyagwo lidamano nelikayirwa lyagwo.
25Ni ku va ni ku veye mwoyo ku Roho, kandi ku gende netsingulu tsya Roho. 26Ku tenya liidzominywa lya vutswa nokuhing'ana avene navene, nokukolerana imbodoka avene navene.
Currently Selected:
Vagalatia 5: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
