Vagalatia 3
3
1Mwinye Avagalatia ava ta li nobugeeri, ibwaha wa mu loga kuduka si mwa hulira ageligali, mwinye ava Yesu Kristo ya vikwa habulavu imbiri wetsimoni tsyenyu u bambeywi? 2Nyenya kuhulira ku mwinye kindu kilala, Mwa vugula Roho ku vikolwa vyelilaga, naho ku lihu lira lyelisuuvira? 3Ubusiru bwe nyu bu duka ndi? Mwa tanga mu Roho, kalunu mu dukidzirwa mu mubiri? 4Mu saliridzwe vindu vinyingi vya mu gwira vutswa? Ni ga va ni ga veye ga vutswa ligali. 5Kunangwa uyu u hedzanga mwinye Roho, nokukola vyokugennya mu mwinye, ga veye ku vikolwa vyelilaga, naho ga veye ku lihulira lyelisuuvira? 6Kuli Abrahamu ya suuvira Nyasaye, ni ga validzwa kuye kuva bulungi. 7Kunangwa mu manye, yavo ava veye nelisuuvira yava nivo avana va Abrahamu. 8Kandi ma ng'oda ga tanga kulola Nyasaye a la vola ku ve Tsihiri ubulungi kigira lisuuvira, ga tanga kwilwadzira Abrahamu ivangeli, ni ga vola, Tsihiri tsyosi tsi la gasidzirwa ku ive. 9Kuduka yavo ava li nelisuuvira va luha va gasidzwa halala nomusuuvirifu Abrahamu. 10Kigira ku yavo ava veye mu vikolwa vyelilaga va veye mu lilaamwa: kigira ga ng'odwa, Ku vosi u ta menya mu vindu vyosi vya ng'odwa mu kitabu kyelilaga a vi kole, a laamangwa. 11Ga veye habulavu si ha veye nomundu u volangwa kuva nobulungi imbiri wa Nyasaye mu lilaga: kigira, Wobulungi a la va mwoyo kigira lisuuvira; 12kandi lilaga si li veye lyelisuuvira; navutswa, Uyu u kolanga lilaga a la va mwoyo kuyo. 13Kristo ya ku honnya mu vilaamu vyelilaga inyinga ya laamwa kigira kwinye; kigira ga ng'odwa, Ku vosi u sungangwa ku musala u laameywi: 14ubugasu bwa Abrahamu mu Yesu Kristo bu duke ku ve Tsihiri; ku duke kunyola lisuuviridzwa lya Roho kigira lisuuvira.
15Avamitu, mbola kuli avandu: Kali ga veye amalagano gavandu ni ga mali kusingeridzwa si ha veye nogononnya, kinga kugameda kindu. 16Kalunu lisuuviridzwa lya volwa ku Abrahamu nekisukululwi kikye. Si a voye, Visukululwi kuli vi veye vinyingi; navutswa kuli ki veye kilala, Nekisukululwi kikyo, nakyo ni Kristo. 17Kalunu mbola yaga: Amalagano ga Nyasaye ya tanga kusingeridza, lilaga lya duka inyima imihiga ni gyi viti tsimia tsine namakumi gavaka, si li nyala kwononnya, kuduka kuzangalalidza lisuuviridzwa. 18Kigira miyandu ni gyi veye kigira lilaga si gyi veye kigira lisuuviridza kandi: navutswa Nyasaye ya ha Abrahamu kigira lisuuviridza. 19Kunangwa lilaga li veye kindu ki? Lya medwa kigira lihyolo, kuduka lwe kisukululwi yiki kya hebwa lisuuviridzwa ki li duka; kandi ga singeridzirwa ku tsingelosi mu makono gomuhambannyi. 20Navutswa muhambannyi si a li womulala yeng'ine; navutswa Nyasaye a veye mulala. 21Kunangwa lilaga li hing'ana nelisuuviridzwa lya Nyasaye? Auwa, ligali: kigira lilaga ni li va ni lya haanwa li nyala kuleta livamwoyo nkano ubulungi bu veye ku lilaga. 22Navutswa mang'oda ga boha vindu vyosi ku bwoni, ava suuvira va duke kuhebwa lisuuviridzwa li twulanga ku lisuuvira li veye ku Kristo.
23Navutswa lisuuvira li kikiri kuduka, kwa li ni ku lindangwa mu lilaga, avabohe kigira lisuuvira li li lang'aminywa lwenyima. 24Kunangwa lilaga ya li mwegidzi wetu kukuleta ku Kristo, ku duke kuvalidzwa kuva nobulungi kigira lisuuvira. 25Navutswa lisuuvira li mali kuduka, si ku veye kandi ku mwegidzi. 26Kigira mwinye mwosi mu veye avana va Nyasaye, kigira lisuuvira mu Kristo Yesu. 27Kigira ku mwinye ava batidzwa ku Kristo, mweviki Kristo. 28Si ha li no Muyuda kinga Mugreki, kinga mutugwa, kinga muboholole, kinga mu satsa kinga mukali; kigira mu veye mulaia mu Kristo Yesu. 29Ni mu veye ava Kristo, hene yaho mu veye visukululwi vya Abrahamu, avemiyandu gyelisuuviridzwa.
Currently Selected:
Vagalatia 3: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
