Ezekieli 37
37
1Mukono gwa Yahova gwa li ku inze, na ya mbila kyova mu Roho wa Yahova, na ya mbika hagati helivona; nalyo lya li ni lizula vigumba. 2Na ya mbila mbite kuvodonkana kuvyo: henza, vya li ho habulavu vigumba vinyingi ligali mu livona; na, henza, vya li viha ngalalu ligali. 3Na ya mbolera, Ive mwana womundu, vigumba yivi vi nyala kuva mwoyo kandi? Na inze nda tivula, O Mwami Nyasaye, ive u manya. 4Hene yaho ya vola kandi ni ya mbolera, Profeta ku vigumba yivi, u vi volere, Mwinye vigumba vihangalalu, mu hulire likuva lya Yahova. 5Mwami Nyasaye a volera vigumba yivi amakuva yaga: Henza, nda vika mwika mu mwinye, na mu la va mwoyo. 6Na nda vika imiki ku mwinye, nokuleta tsi nyama tsi ve ku mwinye, nokumukunika neligodo, na nda vika mwika mu mwinye, na mu la va mwoyo; na mu la manya inze mbeye Yahova.
7Ma nda profeta kuli nda lagwa: na lwa nda li mu liprofeta, ha li nomuliviti, na, henza, lidegera lyelirova; na vigumba vyesunda ku vindi ha lala, kigumba ku kigumba kyakyo. 8Na nda lola, na, henza, miki gya li kuvyo, netsinyama tsya duka kuvyo, neligodo lya kunika kuvyo; navutswa si ha li nomwika muvyo. 9Ma ya mbolera, U profete ku imbuudza, u profete, ive mwana womundu, u gi volere, Mwami Nyasaye a ku volera: Hamba u twule ku tsimbega tsyetsimbuudza tsine, O mwika, u herane ku yava aviitwa, va duke kuva mwoyo. 10Ma nda profeta kuli ya ndaga, nomwika gwingira muvyo navo va li mwoyo, nokusingira nevirenge vyavo, lihe linene ligali.
11Hene yaho ya mbolera, Ive mwana womundu, vigumba yivi vi veye inyumba yosi ya Israeli: henza va vola, Vigumba vyetu vi veye viyumu, na lisuuviridzwa lyetu li goti; ku dividzwi ligali. 12Kunangwa u profete, u va volere, Mwami Nyasaye a vola ndi: Henza, nda kunula vilindwa vyenyu, nokumutwulidza mu twule mu vilindwa vyenyu, O avandu vange; na nda leta mwinye nokumuvika mu kivala kya Israeli. 13Na mu la manya inze mbeye Yahova, lwa ndi kunula vilindwa vyenyu, nokumutwulidza mu vilindwa vyenyu, O avandu vange. 14Na nda vika Roho wange mu mwinye, na mu la va mwoyo, na nda mu vika mu kivala kyenyu avene: na mu la manya, inze, Yahova mmali kuvola yaga, nokugakola, Yahova a vola.
15Likuva lya Yahova lya duka ku inze kandi, kuvola, 16Na ive mwana womundu, u vugule kisala kilala, u ng'ode kukyo likuva yili, Kya Yuda, na kya avana va Israeli avakye veve: ma u vugule kisala kindi, u ng'ode kukyo, Kya Yosefa, kisala kya Efiraim, na kye inyumba yosi ya Israeli avakye veve: 17na u vi hambannye halala vyombi, kigira ive yiki na yiki vi gwe kilala mmukono gugwo. 18Kandi lwa avandu vovo va li volera ive, nokuvola, Si u la ku mannya kivune kya u leteranga inkuva yiyi? 19U va volere, Mwa mi Nyasaye a vola pdi: Henza, nda vugula kisala kya Yosefa, ki veye mmukono gwa Efiraim, na tsihiri tsya Israeli avakye veve; nda va vika halala nakyo, livola li veye, halala nekisala kya Yuda, nda vi lomba kuva kisala kilala, vi la va kilala mmukono gwange. 20Na visala vya wa ng'oda kuvyo vi la va mmukono gugwo imbiri wetsimoni tsyavo. 21U va volere, Mwami Nyasaye a vola ndi: Henza, nda vugula avana va Israeli va twule hagati hetsihiri, tsya va tsia mu, na nda va vungidza tsimbega tsyosi, noku va leta nokuvavika mkivala kyavo avene: 22na nda va kola kuva ihiri indala mu kivala yikyo, ku vigulu vya Israeli; na mwami mulala a la va mwami kuvo vosi: na si va la va tsihiri tsiviri kandi mba, kandi si va lavukana kuva ubwami buviri kandi mba kuduka mihiga nemihiga; 23kandi si va livika mu bubi ku vifwananyi vyavo kandi mba, kinga ku vindu vyavo vyekivihiri, kinga ku mahyolo gavo lilala kugo; navutswa nda va honnya va twule mu bumenyo bwavo bwosi, bwa va kolera mu ubwoni, na nda vogidza: ma va la va avandu vange, na inze nda va Nyasaye wavo.
24Na mutumekiri wange Daudi a la va mwami kuvo; na vosi va la va nomwayi mulala: kandi va la genda mu miima gyange, na va la gumira amalago gange ku ga kola. 25Va la menya mu kivala kya nda ha mutumekiri wange Yakobo, kya vaguga venyu va menya mu; navo va la me nya mukyo, yava, na avana vavo, na visukulu vavo, kazozo: na mutumekiri wange Daudi a la va munene wavo madiku gosi, kuduka mihiga nemihiga. 26Kandi nda kola lilagana lyemirembe halala navo; li la va lila gana lyemihiga nemihiga halala navo; nda va vika bulahi, nokuvameda, nda singeridza hatakatifu hange hagati havo mihiga nemihiga. 27Lihema lyange li la va halala navo; na nda va Nyasaye wavo, navo va la va avandu vange. 28Na tsihiri tsi la manya inze mbeye Yahova u takasanga Israeli, lwa hatakatifu hange ha la va hagati havo mihiga nemihiga.
Currently Selected:
Ezekieli 37: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
