Esther 1
1
1Ga duka mmadiku gomwami Ahasueru (uyu ni Ahasueru wa meha kutwula kivala kya India kuduka Ethiopia, ku tsiprovinse mia na makumi gaviri na tsitano na tsiviri), 2mmadiku yago mwami Ahasueru lwa yikala ku intebe yobwami bwibwe, ya li mu inyumba yobwami mu Shushan, 3mmuhiga gwegyivaka gwelyameha lilye, ya lombera avenene veve vosi navatume kiri veve lilia; tsingulu tsya Persia na Media, avagali, navene vetsiprovinse va li imbiri wewe; 4lwa ya lang'aminya ubutugi bwobukumi bwo bwami bwibwe, na lidzominywa lyelyameha linene lilye madiku manyingi, kuduka madiku mia na makumi gatano na gavaka. 5Na lwa madiku yaga ga dukidzwa, mwami ya lombera avandu vosi ava li mu Shushan mu inyumba yomwami avanene na vakekeke, lilia lya duka madiku gatano na gaviri, mu mgidzi gwomulimi gwenyumba yobwami yo mwami. 6Tsya li ho tsingubo tsindavu, netsifwana ubulimu, netsyeblue, tsya sungwa nemigoye gye ikatani indahi, nekiforosadi, ni tsi sungwa netsimingiri tsyefetha ku tsitiru tsya magina malavu madinyu; vitali vya li vyethahabu na vyefetha, vya li ku magina malavu madinyu lyalwa hasi lyakanyu na lilavu, na lya mususi na lya mamwamu. 7Kandi va va ha vyokunwa mu viju vyethahabu (viju vya li lugano lugano), na iwaini yobwami inyingi, kuli ubuhaani bwo mwami. 8Na linwa lya li kuli lilaga; si ha li nowomunwa kuniga wundi, kigira mwami ya li kulaga ndiyo avanene vosi venyumba yeye, va kole kuli liyanza lyavandu sa mulala.
9Kandi Vashti mukali womwami ya lombera avakali ava li mu inyumba yomwami Ahasueru, lilia. 10Ku lidiku lya gatano na gaviri mwoyo gwomwami lwa gwa sangaia kigira iwaini, ya haana munwa ku Mehu mani, na Bizatha, na Harabana, na Bigatha, na Abagatha, na Zetharu, na Karikasi, avalindi venyumba yo mwami vatano na vaviri ava tumika imbiri womwami Ahasueru, 11va lete Vashti mukali womwami imbiri womwami halala na itaji yobwami, a mannye avandu na avanene ubulahi bwibwe; kigira ya li mulahi ligali kuhenzwa. 12Navutswa Vashti mu kali womwami ya sula kuudza ku lilaga lyomwami lya valindi venyu mba va leta: kigira yaga mwami ya vihirirwa ligali, na ubutima bwaaka muye.
13Ma mwami ya volera avandu avageeri ava li ni va manya tsinyinga (kigira miima gyomwami gya li ndiyo ku vosi ava manya amalago na likalaga; 14kandi ava kaviri kuye va li Karishena, na Shetharu, na Adamatha, na Tarshishi, na Meresu, na Maresena, na Memukan, yava avanene vatano na vaviri va Persia na Media, ava li kulola mumoni mwo mwami, nokwikala avokutanga mu bwami); 15Ku la kola ki ku Vashti mukali womwami kuli lilaga kigira si a bugiriye kukola likuva lyomwami Ahasueru lya valindi ve nyumba yomwami va mu hilira? 16Na Memukan ya tivula imbiri wo mwami navanene, Vashti mukali wo mwami si a koli ubudamano ku mwami yeng'ine, navutswa a koli ku avanene, noku avandu vosi ava veye mu tsiprovinse tsyomwami Ahasueru. 17Kigira likola yili lyomukali wo mwami li la landidzwa ku vakali vosi, nokukola avasatsa vavo kule geridzwa imbiri wavo, lwa ga volwa, Mwami Ahasueru ya haana munwa Vashti mukali wewe a letwe imbiri wewe, navutswa si yadza mba. 18Kandi lidiku lya lero avakali vavanene vosi va Persia na Media ava huliye makuva gelikola lyomukali womwami, va la volera avasatsa vavo ndiyo. Na ndivo lilegana linyingi li la vuka, nobutima bunyingi. 19Ni i va mwami a yanza, lilaga lilye lyobwami li twule mmunwe gwo mwami, kandi li ng'odwa mmalago ga Vapersia na Vamedia, li wle kugirunkanywa, kuvola, Vashti a tingira kandi imbiri womwami Aha sueru; na mwami a he wundi u veye mulahi kuvita uyu, ubunene bwi bwe bwobwami. 20Kunangwa lilaga lyomwami lya a li laga, lwa li la landidzwa mu bwami bwibwe bwosi, (kigira bwa li ubunene), avakali vosi va la ha avasatsa vavo lidzominya, ku vosi avanene na vakekeke. 21Likuva yili lya yanzidza mwami na vanene; na mwami ya kola kuli likuva lya Memukan: 22ma ya hila tsibaruwa ku tsiprovinse tsyosi tsyomwami, ku iprovinse se ndala kuli ling'oda lyayo, noku tsihiri se indala kuli ululimi lwatsyo, kuvola avasatsa vosi sa mulala vamehe mu i inyumba yeye, nokuvola kuli ululimi lwa vandu veve.
©Bible Society of Kenya, 1967