Kohelethu 11
11
1Sikisa vyokulia vivyo ku madzi; kigira u la vi lola kandi inyima wamadiku manyingi. 2U he ava ndu vatano na vaviri vidieli vyavo, yee, kali vatano na vavaka; kigira si u manya ni budamano ki ubu la va ku kivala; 3Malesi ni gyizula imbula, ga la gi tsuka ku kivala; nomusala ni gu gwa gu henzanga ku luvega lwa kusini, naho ku luvega lwa kasikasini, ha musala gu gwidzanga niho ha gu vedzanga. 4Uyu u henzanga imbuudza a la vula kutaga ubugutsa: na uyu u henzanga amalesi a la vula kugesa. 5Kuli ive si u manya inzira yembuudza ni i li ha, kandi si u manya kuli liviruka lyevigumba mmunda mwomukali u veye inda; kandi ndiyo si u manyi miyinzi gya Nyasaye u kolanga vindu vyosi. 6Inyinga yomugamba taga bugutsa bubwo, na inyinga yomgolova u tigalira mukono gugwo mba: kigira si u manyi nobuliha ubu gasidzwa, ni yibu naho ni yibu, naho bwosi bu la duka kuleng'anabulahi. 7Ligaliubulavu nobunolu, kandi nobulahi ku tsimoni kukola ubulavu bweliuva. 8Yee, mundu na a va mwoyo mihiga minyingi, nobulahi a sangale mu gyosi; navutswa a ganagane madiku gekisundi, kigira ga la va manyingi. Vindu vyosi vidzanga vi veye vya vutswa.
9O musoleli, sangala, mu busoleli bubwo, nomwoyo gugwo gu ku sangalidze mu madiku gobusoleli bubwo, na u gende mu tsinzira tsyomwoyo gugwo, nomu lilola lyetsimoni tsitsyo: navutswa u manye Nyasaye a la ku vika mu likalagirwa kigira vindu yivi vyosi. 10Kunangwa u twulidze ubuvereri mu mwoyo gugwo; nobudamano u bu twulidze mu mubiri gugwo; kigira ubusoleli nobutangiru bwomundu vyosi vi veye vya vutswa.
©Bible Society of Kenya, 1967