Danyeli 5
5
1Belishazaru mwami ya lombera avanene veve elfu, lilia linene, na ya nwa iwaini imbiri we elfu zana. 2Belishazaru lwa ya tsatsama iwaini, ya haana munwa va lete viju vyethahabu na vyefetha vya dada wewe Ne bukadinezaru ya nyaga mu litempeli lya li mu Yerusalemi; mwami navanene veve, navakali veve, navasuria veve, va nwere ku. 3Ma va leta viju vya nyagwa mu litempeli lyenyumba ya Nyasaye, ya li mu Yerusalemi; na mwami navanene veve, navakali veve, navasuria veve, va nwera kuvyo. 4Va nwa iwaini, ni vidzominya vanyasaye vethahabu, na vefetha, na vomugasa, na vekivya, na vomusala, na veligina.
5Ku isaa zana videte vyomukono gwomundu vya twula, ni vi ng'oda ku budohi bwelidigi lyenyumba yobwami ha kinara kyetaya: na mwami ya lola kidonye kyomukono gwa ng'oda. 6Hene yaho ligondo lyommoni mwomwami lya galula na tsiganagani tsitsye tsya mu hulula inkolo; na a kalika viyungu vyo mgongo, na amalu gege ga duyana. 7Na mwami ya hanzuka va lete ava ng'olera ku tsi ng'ereng'ani, na Vakalidei, na avang'oli. No mwami ya moloma na a volera avageeri va Babuloni, Ku vosi u li soma mang'oda yaga, nokummannya livuula lyago, a la vikwa ingubo yekiforosadi, na a la vikwa munyoro gwethahabu migoti mwimwe, na a la va wa kavaka mu bwami yibu. 8Kunangwa avageeri vosi vomwami vingira, navutswa si va nyala kusoma mang'oda zana, na si va nyala kuvuu lira mwami livuula lyago. 9Kunangwa mwami Belishazaru ya hu lulukwa inkolo ligali, na ligondo lilye lya galula, na avanene veve va genya.
10Ma mama womwami yingira mu inyumba yelilia kigira makuva gomwami navanene veve: mama womwami ya moloma, na a vola, O mwami, u hindire mihiga gyosi; tsiganagani tsitsyo tsi ta ku hulula inkolo mba, kandi ligondo lilyo li ta galula mba. 11Mundu a veye ho mu bwami bubwo, wa roho gwa va nyasaye vatakatifu gu veye muye; na mu madiku ga dada wowo, ubulavu, nelimanya, nobugeeri, bwa loleka muye, kuli ubugeeri bwa vanya saye; na mwami Nebukadinezaru dada wowo, mwami, mbola, dada wowo, ya mu kola a ve munene wa avakumu, vasegeteri, Avakalidei, na avang'oli; 12kigira mwoyo mulahi nogwelimanya, nogwelihulira, nogwelivuula maloto, nogwelilungikidza makuva madinyu, nogwelikunga lihayahayidza, gwa nyoleka mu Danyeli zana, womwami ya gulika Beliteshazaru. Kunangwa Danyeli a langwe, na a la ku vuulira livuula yili.
13Hene yaho Danyeli yigeridzwa imbiri womwami. Mwami ya moloma na a volera Danyeli, Ive u veye Danyeli uyu, u veye ku avana ve lyadikidzwa lyo Buyuda, avo mwami dada wange ya twulidza mu Buyuda? 14Mbuliye ku ive, roho gwa avanya saye gu veye mu ive, kandi ubulavu na lihulira, na ubugeeri bulahi bu nyoleka mu ive. 15Na kalunu avageeri, na avasegetiri va leteywi imbiri wange, va somere inze amang'oda yaga, nokummannya livuula lyago; navutswa si va nyala kumannya livaula lyago. 16Navutswa mbuliye ku ive, u nyala kuvuula mavuulo, nokukunga mahayahayidza: kalunu nu u va nu nyala kusoma mang'oda, nokumannya livuula lyago, u la vikwa ingubo yekiforosadi, nokuvikwa munyoro gwethahabu migoti, nokuva munene wakavaka mu bwami yibu.
17Kunangwa Danyeli ya tivula na a vola imbiri womwami, Vihaanwa vivyo vi ve ku ive mwene, na madanyi gogo u he wundi; navutswa nda somera mwami mang'oda nokummannya livuula. 18O ive mwami, Nyasaye Wegulu Ku Vyosi, ya ha Nebukadinezaru, dada wowo, ubwami, nobunene, nelidzominywa, nobukumi: 19na kigira ubunene bwa ya mu ha, avandu vetsihiri tsyosi, na vetsimpya tsyosi, navetsinimi tsyosi, va degera nokutia imbiri wewe: wa ya yanza kwiita, yiita, na wa ya yanza kuva mwoyo, ya mu leka mwoyo; na wa yenya kunenehidza, ya nenehidza, na wa yenya kugehidza, ya mu gehidza. 20Navutswainyingamwoyo gwigwe gwigingira, na roho gwigwe gwa gwa mudinyu kuduka ya kola ubwigingiri, ya twulidzwa ku intebe yeye yobwami, na va nyaga ubukumi bwibwe: 21na ya kungwa mu avana vavandu, na mwoyo gwigwe gwa kolwa kuva kuli gwetsinyama, na limenya lilye lya li halala netsisukiri tsyomwigendanyama; ya lihidzwa bunyasi kuli tsing'ombe, na mubiri gwigwe gwama lime lyomigulu; a luhe a duke kumanya Nyasaye U Veye Igulu Ku Vyosi yamehanga mu bwami bwa avandu, kandi ku vosi uyu wa a yanza a mu vika mu bwami. 22Na ive mwana wewe, O Belishazaru, kali ive wa manya yaga gosi, u vuli kugehidza mwoyo gugwo, 23navutswa wegingiye ku Mwami womigulu; na va leti viju vyenyumba yeye imbiri wowo, na ive, navanene vovo, na avakali vovo na vasuria vovo, mu nwereye muvyo iwaini; na ive widzominyi avanyasaye vefetha navethahabu, na vomugasa, na vekivya, na vomusala, na veligina, ava vula kulola, nava ta hulira, nava ta manya; na u vuli kwidzominya Nyasaye womwika gugwo gu veye mu mukono gwigwe, na wetsinzira tsitsyo tsi veye tsitsye. 24Hene yaho kidonye kyomukono kya hilwa kutwula imbiri wewe, na mang'oda yaga ga ng'odwa ho. 25Na yaga ga veye mang'oda aga ng'odwa: MENE, MENE, TEKEL, UPHARSIN. 26Yili li veye livuula lya makuva: MENE; Nyasaye u validzi ubwami bubwo nokubuheridza. 27TEKEL; ive u gereywi ku tsiratili, kandi u loleki kuva nobugeheru. 28FERES; ubwami bubwo bu gavuleywi nokuhebwa Avamedi na Avapersia.
29Ma Belishazaru ya haana munwa, ni va vika ku Danyeli ingubo yekiforosadi, na va mu vika munyoro gwethahabu migoti, na va landidza makuva kuye, u gwiye munene wa kavaka mu bwami. 30Ubudiku zana yibwo Belishazaru mwami Mukalidei, yiitwa. 31Na Dario Mumedi ya hebwa ubwami, ya li na a ve ne mihiga makumi gatano na lilala na gyiviri.
Currently Selected:
Danyeli 5: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
