2 Timoteo 2
2
1Kunangwa ive, mwana wange, u nyole tsingulu mu tsimbabasi tsi veye mu Kristo Yesu. 2Kandi vyosi vya wa hulira ku inze ku valoli vanyingi, u vike ku avandu avasuuvirifu, ava li dukana kwegidza avandi. 3Wekudzire mu kivi halala na inze kuli musikari mulahi wa Kristo Yesu. 4Si ha veye nomusikari u tsitsanga mu lihe wevika mu madidikano genyinga yiyi, a duke kuyanzidza wa mu ng'oda kuva musikari. 5Kandi mundu na a gerana mu bukino, si a vikwa itaji bugira na a ta gerana kuli miima. 6Ga dukiranga uyu mulimi wa nyankana ku miyinzi a tange kunyola ku makuyu. 7Ganagana aga mbolanga; kigira Mwami a la ku ha ubugeeri mu vindu vyosi. 8Widzulire Yesu Kristo, wa simuguka kutwula ku vakudzu, wevisukululwi vya Daudi, kuli ivangeli yange: 9ya nda nyolera mu ubusaliri kuduka libofwa, kuli mukoli wobudamano, navutswa likuva lya Nyasaye si li bofwa mba. 10Kigira yaga nzikudziranga ku vyosi kigira avatovole, navo kandi va duke kunyola ubuhonnyi bu veye mu Kristo Yesu halala nobukumi bu ta hera mba. 11Li veye lyokusuuvirwa likuva yili: Kigira ni ku va kwa kudza halala naye, ku la va nelivamwoyo ka ndi halala naye: 12ni ku saliridzwa, kandi ku lameha halala naye: ni ku mwambakana, naye a la kwambakana; 13ni ku vula kusuuvira mwene a la menya musuuvirifu, kigira si a nyala kweyambakana mwene.
14Widzulitse avandu vindu yivi nokuveganehidza imbiri wo Mwami va ta va nobuhing'ani ku makuva ga ta veye nobukonyi, aga gotidzanga yava ava huliranga. 15Wedinyiridze kwevika mu libugirirwa imbiri wa Nyasaye, mukoli wemiyinzi u vula kulegannywa, u tumekiranga bulungi likuva lyageligali. 16Weyahule ku tsimbaka tsyekivala tsya vutswa: kigira yitsi tsi la kira kuduka mu budamano, 17kandi likuva lyatsyo li la lia kuli inkwagu i litsanga. Kuvo va veye Humenayo na Fileto; 18avandu ava goti ku geligali, va vola lisimuguka li mali kuvita, na va hinulanga lisuuvira lyavalala. 19Navutswa muse gwe tsingulu gwa Nyasaye gu singira, gu veye nekiloleru yiki: Mwami a manya yava ava veye aveve: kandi, Ku vosi u talanga lieta lyo Mwami yelehe ku budamano.
20Kunangwa mu inyumba inene si vi veye mu viju vyethahabu nevyefetha vyeng'ine, navutswa vi veye mu vyemisala nevyobudohi; vilala vi veye nelidzominywa, nevindi si vi veye nelidzominywa. 21Kunangwa mundu ni yetakasa nokweleha yivi, a la va kiju kyelidzominywa, ki takaseywi, ki dukana nemiyinzi gyo Mwami, ki lombeywi ku miyinzi gyosi milahi. 22Navutswa wiruke likayirwa lidamano lyobuyai, navutswa u londe ubulungi, nobusuu virifu, nobuyanzi, nemirembe, halala na yavo avaniranga Mwami mu myoyo milahi. 23Navutswa mateva gobusiru naga ta li nelimanya u sule, limanya u manya gyivulanga mahangali. 24Mutugwa wo Mwami ga mu dukira a vule kuha ngala, navutswa a ve nobuhooms ku vosi, a ve netsingulu kwegidza, a ve nobwikudziri, 25a ve nobuho kya mu lyeganehidza avahing'ana; mbula Nyasaye a va he lyeganira kuduka ku limanya ageligali, 26va duke kwitwulidza mu buginga bwa Setani, ava lanywa kukola ubulaliri bwibwe.
©Bible Society of Kenya, 1967