2 Vatesalonike 3
3
1Inyima, avamitu, mu ku saalire, likuva lyo Mwami li lande bwangu nokwidzominywa, kuli li veye mu mwinye, 2kandi ku honnywe ku vandu avobugoti navadamano; kigira si va li vosi ava veye nelisuuvira. 3Navutswa Mwami a veye musuuvirifu, u li luviridza mwinye, nokumulinda ku mudamano. 4Na kwinye ku veye nelisuuvira ku Mwami kigira mwinye, mu kolanga kandi mu la kola vindu vya ku laga. 5Mwami yimirira myoyo gyenyu gyingire mu buyanzi bwa Nyasaye, nomu bwikudziri bwa Kristo. 6Kandi ku laga mwinye, avamitu, ku lieta lyo Mwami wetu Yesu Kristo, mwinye mwiyahule ku vamitu vosi avekivihiri, ava vula kulonda amakuva ga va vugula ku kwinye. 7Kigira mwinye avene mu manya kuli ga mu dukira kwega ku kwinye: kigira si kwa kola kivihiri mu mwinye; 8kandi si kwa lagira vutswa ubukima bwomundu kali mulala, navutswa mu linyankana lyemiyinzi, nomu busaliri kwa kola miyinzi ubudiku nombasu ku vule kumina ku mwinye kali mulala. 9Si ga li kigira kwa daka tsingulu, navutswa kwinye kwekolanga ku ve kiloleru kyenyu, mu duke kukola kuli kwinye ku kola. 10Kigira lwa kwa li halala na mwinye, kwa mu laga, Niva mundu kali mulala ku vosi na a sula kukola miyinzi, kandi a ta lia. 11Kigira ku hulira amakuva gavalala ku mwinye ava kola kivihiri, ava vula kuyinzira, navutswa va veye avahuudziridzi. 12Kalunu ku laga yavo ava veye ndivo nokuvatsuva mu Mwami Yesu Kristo, va kole miyinzi gyavo nobwehodzeridzi, va lie vyokulia vyavo avene. 13Navutswa mwinye avamitu, mu ta kudza myoyo mu likola bulahi. 14Niva mundu kali mulala na a sula kuhulira likuva lyetu mu ibaruwa yiyi, mu vike kuye kiloleru, mu ta va nelihambana naye, a duke kuva isoni. 15Navutswa mu ta mu kola musigu, navutswa mu mweganehidze kuli a ve amitu. 16Kalunu Mwami wemirembe a mu he mirembe kazozo ku vindu vyosi. Mwami a ve nemwinye vosi halala. 17Lichelidza lyange inze Paulo nomukono gwange inze mwene, li veye kiloleru mu tsibaruwa tsyosi: ni ndiyo ng'odanga. 18Tsimbabasi tsyo Mwami wetu Yesu Kristo tsi ve halala nemwinye mwosi.
©Bible Society of Kenya, 1967