2 Samweli 8
8
1Na ga duka inyima wa yaga Daudi ya lwana na Vafilisiti, na a va guuta: na Daudi ya vugula lijamu lyelidala linenel ku mukono gwa Vafilisiti.
2Na ya kuya Moabu, na ya gera nemigoye, na ya va niga va gone hasi; na ya va gera nemigoye gyiviri viitwe, nomugoye mulala mudukiru va lekwe mwoyo. Na Vamoabu va gwa avatumekiri va Daudi, ni va leta vihaanwa.
3Daudi ya kuya kandi Hadadezeri, mwana wa Rehobu mwami wa Zoba, lwa ya tsia kwenyoiira miyandu gyigye ha Mugera. 4Na Daudi ya mu nyaga avaskari vokunina tsifarasi, elfu ne tsimia tsitano ne tsiviri na vevirenge tsielfu makumi gaviri: Daudi ya tema tsiparasi tsyosi tsyamagari virenge, navutswa ya leka tsiparasi tsi duka magari mia. 5Na lwa Vasuriai va Damasko va dza venya kusola Hadadezeri mwami wa Zoba, Daudi ya kuya Vasiria ava ndu tsielfu makumi gaviri na gaviri. 6Hene yaho Daudi ya vika avaskari vo kulinda mu Siria nomu Damasko; na Vasiria va gwa avatumekiri va Daudi, ni va leta vihaanwa. Na Yahova ya ha Daudi liguuta hosi ha ya tsia. 7Na Daudi ya vugula tsingavo tsyethahabu tsyavatumekiri va Hadadezeri, va li ni veyavala, na ya tsi leta Yerusalemi. 8Kandi kutwula Beta na Berothai, amadala ga Hadadezeri, mwami Daudi ya vugula migasa minyingi.
9Kandi Toi mwami wa Hamathu lwa ya hulira Daudi u kuyi lihe lyosi lya Hadadezeri, 10hene yaho Toi ya tuma mwana wewe Joram ku mwami Daudi, kumuchelidza, nokumugasidza, kigira ya li na a lwani na Hadadezeri nokumuguuta: kigira Hadadezeri ya li nobulwani na Toi. Na Joram ya leta viju vyefetha, ne viju vyethahabu, neviju vyomugasa: 11viju yivi kandi mwami Daudi ya vi gima ku Yahova, halala nefetha nethahabu vya ya gima ku Yahova, vya twula ku tsihiri tsyosi tsya ya guuta; 12vya Siria, na Moabu, na vyavana va Amon, na vya Vafilisiti, na va Vaamaleki, nevilanye vya Hadadezeri, mwana wa Rehobu, mwami wa Zoba.
13Na Daudi yenyolera lieta lwa yirana kutwula kuguuta Vasiria mu Livona lyo Munyu, va li avandu tsielfu likumi na tsitano na tsivaka. 14Na ya vika avaskari kulinda mu Edom, mu Edom mwosi ya vika avaskari, navo vosi Vaedom va gwa avatumekiri va Daudi. Na Yahova ya ha Daudi liguuta hosi ha ya tsia.
15Na Daudi yameha ku Israeli vosi; na Daudi ya singeridza likalaga lyobulungi ku avandu veve vosi. 16Na Joabu mwana wa Zeruia ya li igulu ku lihe; na Jehoshafatu mwana wa Ahiludu ya li mwidzulitsi; 17na Zadoku mwana wa Ahitubu, na Ahi meleku mwana wa Abiatharu, va li vasalisi; na Seraia ya li mung'odi; 18na Benaia mwana wa Jehoiada ya li igulu ku Vakerethi na Vapelethi; navana va Daudi va li avanene vobwami.
©Bible Society of Kenya, 1967