2 Samweli 24
24
1Inyima w a yaga ubutima bwa Yahova bwaaka ku Israeli, naye ya vukidza Daudi kuvo, na a vola, Tsia u validze Israeli na Yuda. 2Nomwami ya volera Joabu, munene welihe lyavasikari, lya li halala naye, Kalunu u tsie yiyi neyiyi mu tsihiri tsyosi tsya Israeli, kutwula Dan kuduka Beersheba, u validze avandu, nduke kumanya liduka Ivelivalidza lyavandu. 3Na Joabu ya volera mwami, Yahova Nyasaye wowo a mede avandu, kuli livalidzwa lyavo li veye, hali mia; netsimoni tsyomunene wange mwami tsi lole inkuva yiyi: navutswa munene wange mwami, kigira ki u yanza inkuva yiyi? 4Navutswa, makuva gomwami ga guuta ga Joabu, na gavanyampara velihe. Na Joabu navanyampara velihe va twula imbiri womwami, ni va tsia kuvalidza avandu va Israeli. 5Na vambuka Yordani, ni va singeridza mahema gavo mu Aroeri, ku luvega lwomukono mulungi gwe lidala lya li ha zana hagati helivona lya Gadi, kuduka Jazeri: 6na va duka ha Gileadi, noku kivala kya Tahatimhodishi; na va duka Dan jaan, nokukumberidza Sidone, 7na va duka ku lugaga lwa Turo, noku madala gosi ga Vahivi, na ga Vakanani; na va twulira ku luvega lwa kusini wa Yuda, ha Beersheba. 8Na lwa va tsia yiyi neyiyi mu kivala kyosi, va duka Yerusalemi inyima wa myeli gyitano na gyine, na madiku makumi gaviri. 9Na Joabu ya haana ku mwami livalidzwa lyosi lya validzwa ku avandu yavo: na va li mu Israeli avandu vetsingulu ku ava tumekira kivavi, tsielfu tsimia tsitano na tsivaka; navandu va Yuda va li tsielfu tsimia tsitano.
10Nomwoyo gwa Daudi gwa mu duya inyima wokuvalidza avandu. Daudi ya volera Yahova Inze nkoli ubwoni ligali kigira nkoli inkuva yiyi: navutswa kalunu O Yahova, nku goonya ligali, u twulidze budamano yibu ku mutumekiri wowo; kigira ligali nda kola gobusiru. 11Na lwa Daudi ya vuka mugamba, likuva lya Nyasaye lya duka ku muprofeti Gadi, muloli wa Daudi, ni li vola, 12U tsie u volere Daudi, Yahova a ku volera, Mbika imbiri wowo vindu vivaka: tovola kilala kuvyo, nduke kukukolera. 13Ma Gadi ya tsia ku Daudi, na a mu volera, naye ya vola, Mihiga gyitano nagyiviri gyenzala gyi duke ku ive, noku kivala kikyo? Naho wiruke myeli gyivaka imbiri wavasigu vovo lwa va ku kunga? Naho ga ve ho madiku gavaka ageli duya lyobulwaye mu kivala kikyo? Kalunu u kole makuva, u ganagane ni litivula ki lya mbilira uyu wa ntuma. 14Na Daudi ya volera Gadi, Inze mbeye mu kivi kinene: u ku leke ku gwe mmukono gwa Yahova; kigira tsimbabasi tsitsye tsi veye tsinene ligali; mbule kugwa mmukono gwomundu.
15Ma Yahova ya leta liduya lyobulwaye ku lsraeli kutwula mugamba kuduka ku inyinga ya lagwa; na va kudza ku avandu kutwula Dan kuduka Beersheba avandu tsielfu makumi gatano na gaviri. 16Na ingelosi lwa ya nyira mukono gwigwe ku Yerusalemi kulyononya, Yahova yeganira ku budamano vibu, na a volera ingelosi wononya avandu, Ga duki gaya mukono gugwo kalunu. Na ingelosi wa Yahova ya li himbi ku lodze lwa Arauna Mujebusi. 17Na Daudi, lwa ya lola ingelosi ya dividzanga avandu, ya volera Yahova, na a vola, Henza ni inze wa kola ubwoni, na nkoli ubukyamu; na vutswa magondi yaga, ga koli ki? Mwadza, mukono gugwo gu veye ku inze, noku inyumba ya dada wange.
18Na Gadi yadza ku Daudi lidiku yili, na a mu volera, wanegire, wo mbakire Yahova ubwali mu lodze lwa Arauna Mujebusi. 19Ma Daudi yanegira kuli livola lya Gadi, kuli Yahova ya laga. 20Na Arauna ya henza, na a lola mwami navatumekiri veve, vadza kuye: Arauna ya twula, ni yeyinaminya imbiri womwami, mmoni mwimwe mwa henza hasi. 21Na Arauna ya vola, Umunene wange mwami a duki ku inze mutumekiri wewe, kigira ki? Daudi ya mu volera, Nduki kugula lodze lulwo, nduke kwombakira Yahova ubwali, liduya lyobulwaye li gayidzwe ku avandu. 22Na Arauna ya volera Daudi, Munene wange mwami, a vugule nokuhaana kihaanwa mu yivyo vya a lola kuva bulahi: henza, tsing'ombe kuva kihaanwa kyokusambwa, neviju vyokuhuulira, neviju vyetsing'ombe vi veye tsinku: 23vindu yivi vyosi, O mwami, inze Arauna mbedzanga ive umwami. Na Arauna ya volera mwami, Yahova Nyasaye wowo a ku bugirire. 24No mwami ya volera Arauna, Auwa; navutswa inze nda gula vindu yivi ku ive nobuguli bwavyo; si nda haana ku Yahova Nyasaye wange, vihaanwa vyokusambwa vi ta li nelitunga. Ma Daudi ya gula lodze netsing'ombe netsishekeli makumi gatano tsyefetha. 25Na Daudi yombakira Yahova ubwaii ha zana, na ya haana vihaanwa vyokusambwa nevihaanwa vyemirembe. Na Yahova ya bugirira lisaalira kivala, neliduya lyobulwaye lya gayidzwa mu Israeli.
©Bible Society of Kenya, 1967