2 Samweli 22
22
1Na Daudi ya volera Yahova makuva golwimbu yilu ku lidiku lya Yahova ya mu honnya ku makono ga vasigu veve vosi, noku mukono gwa Saulo: 2na a vola,
Yahova a veye lwanda lwange, nolugaga lwange, nomuhonnyi wange, wange ligali.
3Nyasaye, lwanda lwange, ndi visa muye;
Ingavo yange, nolwiga lwange lwobuhonnyi, nomunara gwange, na hokwivisa hange;
A veye muhonnyi wange, u mbonnyi ku kirage.
4Ndanira ku Yahova, u dukana kwidzominywa:
Na ndiyo nda honnywa ku vasigu vange.
5Kigira viguvuli vyelikudza vya nkumberidza;
Ubunene bwobudamano bwa ntihidza:
6Migoye gyekihadisi gya nkumberidza;
Mitego gyelikudza gya nyola.
7Mu lisalira lyange ndanira Yahova
Yee, nda kupa lwanga ku Nyasayewange:
Naye ya hulira mwoyo gwange mu litempeli lilye,
Nelilira lyange lingira mmatu gege.
8Hene yaho lirova lya degera ni li dengeya. Mise gyeligulu gya degera
Na gya degeridzwa, kigira ya li nobutima.
9Mwoki gwa vuya kutwula mmolu gege,
Nomuliru gwa twula mmunwa gwigwe ni gu lia:
Amanda gaakidzwa nagwo.
10Yinaminya ligulu kandi, yika hasi;
Kisundi kinene kya li isi wevirenge vivye.
11Yikala ku mukerubi, na a buluka;
Yee, ya loleka igulu wetsimbaha tsyembudza.
12Ya kola kisundi kuva mahema gokumukumberidza,
Livunga lyamadzi, amalesi manene gomigulu.
13Mu bung'ering'anu bwa henza imbiri wewe,
Amanda gomuliru gaakidzwa.
14Yahova ya syagukidza inkupa migulu,
U veye Igulu Ligali ya twulidza mwoyo.
15Na ya lasa mibano, na a va salannya;
Ya twulidza uluheni, na a va dambidza.
16Tsinzira tsyenyanza tsya loleka,
Mise gyelirova gya kunulwa,
Neligondoka lya Yahova,
Ku lihuudza lyemyika gyamolo gege.
17Ya tuma kutwula migulu, na a mbugula;
Ya ntwulidza mmadzi manyingi;
18Ya mbonnya ku musigu wange wetsingulu,
Kuvo ava ndunyira; kigira va li netsingulu kuvita inze.
19Va ntwulira bwangu ku lidiku lyekivi kyange;
Navutswa Yahova ya li itiru yange.
20Na ya ntwulidza, ni ya mbika hobwiyangu
Ya mbonnya, kigira ya nyanza.
21Yahova ya mba madanyi kuli ubulungi bwange;
Kuli butakatifu bwamakono gange ya mpa ndiyo.
22Kigira ng'umiye tsinzira tsya Yahova,
Kandi si nda twula ku Nyasaye wange ku budamano.
23Kigira miima gyigye gyosi gya li imbiri wange;
Na si ndavukana namalago gege.
24Nda li mudukiru imbiri wewe;
Nzegaya ku ubukyamu bwange.
25Kunangwa Yahova u ntungi kuli bulungi bwange,
Kuli butakatifu bwange imbiri wetsimoni tsitsye.
26Ku wetsimbabasi u lelolekidza kuva wetsimbabasi
Ku u veye mudukiru u lelolekidza kuva mudukiru;
27Ku u veye umunifu, u lelolekidza kuva umunifu;
Ku mukyamu u lelolekidza kuva mukyamu.
28Na ava dambidzangwa u la va honnya;
Navutswa tsimoni tsitsyo tsi veye ku yavo aveyidzominyanga, u duke kuvagehidza.
29Ive Yahova u veye itaya yange;
Na Yahova a la lavidza kisundi kyange.
30Kigira ku ive ntwulira lihe;
Noku Nyasaye wange nsira lidigi.
31Nyasaye uyu inzira yeye i veye indukiru:
Livola lya Yahova li loleywi kuva lilungi
A veye ingavo ya vosi avivisa muye.
32Kigira ibwaha a veye Nyasaye, na a ta li Yahova?
Nibwaha u veye lwanda na a ta li Nyasaye wetu?
33Nyasaye uyu niye lugaga lwange lwetsingulu;
Uyu yimiriranga muduliiru ku inzira yeye.
34Virenge vyange a vi leng'annya ne virenge vyembongo,
A nsingeridzanga ha kidiguluku hange.
35A nalidza makono gange ku lwana,
Kuduka makono gange ga kuumba ubuta bwomugasa.
36Kandi u mpeye ingavo yobuhonnyi bubwo;
Nobuhoma bubwo bu nenehidzi.
37U lombeye tsinduvatiru tsyange ubwiyangu isi wange;
Tsinduvatiru tsyange tsi vuli kuswerereka.
38Nda londerera avasigu vange, na nda va dividza,
Kandi si ndirana kuduka lwa nda va heridza.
39Nda va heridza, kuvatodza, va vule kuvuka:
Yee, va gwa isi wevirenge vyange.
40Kigira wa mboha tsingulu tsyokuguuta mbulwani;
Winaminya ava hing'ananga ku inze, isi wange.
41Kandi ive u kola avasigu vange va girunkana migongo gyavo ku inze,
Nduke kudividza yavo ava ndu nyiranga.
42Va henza, navutswa si ha li nowokuvahonnya;
Kali ku Yahova, navutswa si yava tivulira mba.
43Ma nda va sia, va duka kuva kuli lugukyi lwekivala,
Nda va duvaga kuli ubudohi bwoku inzira, nokuvasalannya yiyi neyiyi.
44Ive wa mbonnya ku lining'ana lyavandu vange;
Wa ninda nduke kuva mutwe ku avetsihiri
Avandu va nkikiri kumanya vala ntumekira.
45Avetsihiri tsindi va legehidza avene ku inze:
Lwa va hulira makuva gange, nonoho va mbulira.
46Avandu va ihiri yindi va la niala,
Va la twula mbugono ha vivisa nelidegera.
47Yahova a veye mwoyo; lwanda lwange lu gasidzwe;
Na a nenehidzwe Nyasaye, lwanda lwobuhonnyi bwange,
48Kali Nyasaye u mbanziranga kisalya,
A gehidzanga avandu isi wange,
49Na ya ntwulidza hagati ha vasigu vange:
Yee, u nginganga igulu kuvo ava ntuliranga; U mbonnya ku uyu wekirage.
50Kigira yaga nda santidza ive,
O Yahova, hagati hetsihiri,
Na ndimba tsinyimbu tsyokwidzominya lieta lilyo.
51A hedzanga mwami wewe ubuhonnyi ubunene,
Nokumannya mbake wewe tsimbabasi tsyobuyanzi,
Ku Daudi nokuvisukululwi vivye kuduka mihiga nemihiga.
©Bible Society of Kenya, 1967