2 Avami 2
2
1Na ga duka, lwa Yahova yenya kuhila Elija migulu nembuudza yekihudzudzi, hene yaho Elija ya twula Gilgali halala na Elisha. 2Elija ya volera Elisha, Wikale hano, mwadza; kigira Yahova u ntumi kuduka Beth-eli. Elisha ya vola, Kuli Yahova a veye mwoyo, na kuli ive u veye mwovo, si nda ku leka mba. Ma va sulunguta Beth-eli. 3Na vana vavaprofeti va veye ha Betheli vadza ku Elisha, ni va mu teva, U manya Yahova a la twulidza munene wowo lero a vule kuva ku ive kandi? Naye ya vola, Yee, mmanya; mu kiring'ane. 4Na Elija ya volera Elisha, Wikale hano, mwadza; kigira Yahova u ntumi Yeriko. Na ya vola, Kuli Yahova a veye mwoyo, kandi kuli ive mwene u veye mwoyo, si nda ku leka mba. Ma va duka Yeriko. 5Avana vavaprofeti ava veye ha Yeriko vesunda ku Elisha, nokumuteva, Ive u manya Yahova a la twulidza munene wowo a vule kuva ku ive kandi lero? Ya va tivulira, Yee, mmanya; mu kiring'ane. 6Na Elija ya mu volera, Wikale hano, mwadza; kigira Yahova u ntumi Yordani. Naye ya vola, Kuli Yahova a veye mwoyo, kandi kuli ive mwene u veye mwoyo, si nda ku leka mba. Ma va tsia vombi halala. 7Navandu makumi gatano vavana vavaprofeti va tsia, nokusingira kuvahenzera ihale: navo vombi va singira himbi ku Yordani. 8Na Elija ya vugula ingubo yeye yokwigulu, na a gi linga halala, nokuduya amadzi, nago gayuka kutsia yiyi neyiyi, ma vambuka vombi ku kivala kyumu. 9Na ga duka, lwa va mala kwambuka, Elija ya volera Elisha, Teva ku inze kya wenyanga nku kolere, ni nkikiri kutwulidzwa ku ive. Elisha ya vola, Nku goonya, vi ve ku inze vidieli viviri vya roho gugwo. 10Ya vola, U tevi kindu kidinyu: nu u va nu u lola inze ni mbugulwa ku ive, u la nyola; navutswa ni i va u vula kundola si u la nyola mba. 11Na ga duka, lwa va li ni va tsitsanga, nokuvolerana, henza, nonoho ligari lyomuliru lya loleka, netsiparasi tsyomuliru, tsya vavukannya uyu na uyu; na Elija yanegira kutsia migulu nembuudza yekihudzudzi. 12Na Elisha ya lola, na a hanzuka na a vola, Dada wange, dada wange, magari ga Israeli navokunina ku tsiparasi vovo.
Na a vula kumulola kandi: na ya gumira tsingubo tsitsye mwene, nokutsitandula tsimbaala tsiviri. 13Na ya dola ingubo yokwigulu ya Elija yaguluka kutwula kuye, ni yirana, na a singira ku luginga lwa Yordani. 14Na ya gumira ingubo yokwigulu ya Elija yaguluka kutwula kuye, na ya kuyira amadzi, na a vola, Yahova Nyasaye wa Elija a veye haliha? Lwa ya mala kukuya amadzi, gayuka kutsia yiyi neyiyi; ma Elisha yambuka.
15Avana vavaprofeti ava li Yeriko lwa va mu lola, va vola, Roho wa Elija wikaye ku Elisha. Na vadza kumwaganira, na vinama hasi imbiri wewe. 16Na va mu volera, Henza, kalunu va veye ho halala nekwinye avatumekiri vovo, avandu avetsingulu makumi gatano; ku goonya ive, leka va tsie kwenya munene wowo, namusia Roho wa Yahova u mu gingi, nokumusikisa mu kigulu kilala, kinga mwivona lilala. Ya vola, Mu ta va tuma mba. 17Na lwa va mu goonyerera ya luha ya va isoni, na a vola, Tumi. Ma va tuma avandu makumi gatano. Na va mwenya madiku gavaka, ni va vula kumulola. 18Virana kuye, lwa ya lindagira ha Yeriko; na a va volera, Si nda mu volera, Mu ta tsia mba?
19Avandu velidala yilyo va volera Elisha, Henza, ku goonya ive, lidala yili ha veye na halahi, kuli munene wange a lolanga: navutswa amadzi yaga si ga veye malahi mba, nekivala ki veye kihyahya vutswa. 20Ya vola, Ndeteri kiseve kihya, mu vike mu munyu. Va mu letera. 21Na ya twula na a tsia kuduka ha kisenukiru kyamadzi, na a tsuka mu umunyu, nokuvola, Yahova a vola, Inze mali kuhonnya amadzi yaga; si li la twula mu likudza kandi, kinga lilogosa. 22Kunangwa amadzi ga honywa kuduka lero, kuli likuva lya Elisha ya vola.
23Na yanegira kutwula ho kutsia Betheli; na lwa ya li na a vitanga ku inzira, vayai va twula mu lidala yilyo, ni va mu kolera kihenyehenye, ni va mu volera, Nina igulu, ive wogwavusu; nina igulu, ive wogwavusu. 24Yekevuka na a lola, na a va laama ku lieta lya Yahova. Na tsiduba tsiviri tsinkali tsya twula mu mulitu, na tsi tandula ku yavo makumi gane na vaviri avayai. 25Kutwula yaho ya tsia ku kigulu kya Karimeli, nokutwula yaho yirana Samaria.
©Bible Society of Kenya, 1967