MATAYO 21
21
1Otini kirich chane Yerusalem akwit ato kïkuro Petpake, tökepusta kutïng pö Arol. Kïyonta Yeso kinetankachi odeny kuntagha 2kïlenchï, “Ape atanga kanasyantaninö mi tawunkwa, otini katakwa onyorukwa sïkïryö nyo ratat nko wawenyi, atyakakwa akötwanïn. 3Akwoto töp chi ntökïtepekwa kïgh, olenchï, ‘Mököy Echotyon chane,’ pïstonekwa nyinte lawel.” 4Kighisyö choni tökïpïntö ngölyon nyo kimwa werkoyonta lö,
5 #
Sak 9:9. “Lenchinö kanasyanta Sayon,*
Anyona pöytoghintengu ngwïnchininyi.
Talase akungwïno sïkïryö,
nko wawa sïkïryö nyo mïnïng!”
6Kïpa nyu kinetanchay kwigh lenyini kimwochï Yeso chane. 7Kïkötï sïkïryonay nko wawenyi, kukorkorchï pich sïrokökwa pataghu sïkïröyichini, kïpus Yeso akïtöpö. 8Kukorkorchï sïrokökwa or söpïch nyo wow, kïtöröy pich walaka mori ket akukörkorchini arawet. 9#Tum 118:25-26. Kuteghyö söpïchtinö, akonga nyo kimi tawu Yeso nko anka nyo kirïpu löt akulïlighsot kïlentöy,
“Nya kïsala Wero Daudi!
Nya kusoyön Tororöt nyinte nyo ngwïno kayna Echotyon!
Nya kïsala Tororöt nyo mi parak tya.”
10Nyini kilït Yeso Yerusalem, kwar kegh pich ompö kanasyan akïtep kegh lö, “Ngo chichï nya?” 11Kuyokyï söpïchini lö, “Werkoyon Yeso nyo ngwïno Nasaret koro Kalilaya.”
Kiyona Yeso mïnchïrïs Kö pö Tororöt*
(Mrk 11:15-19; Luk 19:45-48; Yna 2:13-22)
12Kïwö Yeso akïlït Kö pö Tororöt akutul pich löwïr cho kyolöy akwoltegho tïkwïn köyini, kïköpïghtö meseni pich cho kïwöghököy ropïyen nko ngöcherwo pich cho kyoltoy chepïrïmpen 13#Isa 56:7; Yer 7:11. akïlenchï, “Kirate ompö kirurut lö, ‘Kïkuro Konyan kö pö saghat.’ Wölo kaghakwa kïlïkwï köpöno pkatis!”
14Kïpka chepkarotin nko cho kingwolsot Köyini, kusop Yeso chane. 15Kinörekyö tïsï cho echön nko koneti kirurut otini kisïwa tïkuchini pö töngönchin kighöy nyinte kimi monïngö kïtumöy ompö Kö pö Tororöt kïlentöy, “Nya kïsala Wero Daudi!” 16#Tum 8:2. Kïlenchï pich Yeso, “Melïmenyinye so ngalechï mwoghöy chane.”
Kïlenchï Yeso, “Owöy, olïman! Kichö tomönye so osomönökwa ngalechï kirate ompö Kikirut lö,
‘Keghanyi tengon nko mnyarkiltin
kïkonï salat nyo tenate?’ ”
17Kïpïstö Yeso chane akïngeta kanasyantanoni kutang Petaniya akïtöpö wöloni.
Köchïp Yeso moköngwö nyo kimötïnye akwa
(Mrk 11:12-14,20-24)
18Kyam kömöy Yeso tökwoghö ato kingwïnöy kutöngu kanasyan. 19Kïsïwa moköngwö ompö ara or kamas kïwö kuros, puryö kïgh ketini kïpoto sökö kwïle. Kïlenchï ketay, “Meyinenyinye akwa kokay!” Kïyam moköngwonay lenyini. 20Nyini kïsïwa kinetankachi kïtöngönchï nyoman. Kïtep lö, “Kayamta onö moköngwonï lenyini lawel nya?” 21#Mat 17:20; 1Kr 13:2. Kuyokyï Yeso chane lö, “Omwowokwa nyoman lö ntökotïngetekwa kighanat nyo möminye tomtomönötö, kötomukekwa oghe le nyete kaghan akïmönyoninye onkït, kötomukekwa ompö ntölenchï kutïngï, ‘Ngeta aiwirchï kegh nanam,’ kötö igho lenyoni. 22Akwoto oghönekwa, osïkekwa kïgh anka tïkwïl nyo osomekwa ompö saghat.”
Wowïn ne nyo tïng Yeso?
(Mrk 11:27-33; Luk 20:1-8)
23Kïmïla Yeso ngat Kö pö Tororöt akwotini kinetisïyi kïpka tïsï cho echön nko poyi pipö Yaudi kïtep nyinte lö, “Ighonyi owesyo ngo ngalechï nya? Akï ngo nyo kökoninyi owesyonï?” 24Kïlenchï Yeso, “Otepokwa nyu tïkwïl ngölyon akonga nyo ato oyokwanïkwa, omwowokwa tïkwïl lö, owesyo ngo nyi oghonan ngalechï. 25Kingwïna yïm kipatisanata Yoana nya, anta kingwïna pich?” Kïngölonchï kegh chane opïn lö, “Kiyokyini ne ye nyinte? Ato kiyokyicha lö, ‘Kingwïna yïm,’ kïlenchecha nyinte, ‘Kwompö ne tömaghanakwa Yoana.’ 26Kwoto kïlenchicha, ‘Kingwïna pich, kïmöngötunye chï nko söpïchï, ompöwölo kikughan pich löwïr lö werkoyon Yoana.’ ” 27Kuyokyï lö, “Mökinkïtöchanye.” Kuyokyï Yeso chane lö, “Kïmomwowokwanye tïkwïl wölo konyorchan owesyönï oghonan ngalechï.”
Körkeyïn pö wor odeny
28Kulet tagh Yeso kïtep chane lö, “Ononekwa lö ne nya, ompö chi nyo kitïng werkachi odeny nyo kiwö kïlenchï weri nyo wow, ‘Wïyö asisete werïnyu, igha kasï para sapipun.’ 29Kuyokyï lö, ‘Mowetanye!’ Wölo kunonsyö ato le soya akïwö paranay. 30Kïwö chichay wölo mi weri nyo pö odeny akïtep le nyaye, kuyokyï lö, ‘Owöy owetan papo,’ wölo melö kitökiwö. 31Ngo nyu nya werchï kwodeny nyo kigh machata kwanta?” Kuyokyï lö, “Nyay pö tagh.” Kïlenchï Yeso, “Omwowokwa nyoman lö nyoghöy kïlïtöy kwöghi surï nko cheporestin Pöyunöto Tororöt kïtïlekwa. 32#Luk 3:12; 7:29-30. Ompöwölo kingwïnchokwa Yoana Kipatisanintö akuporwokwa ara man, wölo melö kyaghanakwa nyinte, wölo kighan kwöghi surï nko cheporestin nyinte, melö kyawaghakakwa mïkulöwekwa kïrkegh kyasïwekwa ngalechini löwïr, kïmelö kyaghanakwa ngalechi.”
Körkeyïn pö para sapipun nyo kikimönokyï ngori
(Mrk 12:1-12; Luk 20:9-19)
33 #
Isa 5:1-2. Kïlenchï Yeso pïchay, “Atere körkeyïntö anka. Kimi chi nyo kitïng parenyi nyo kikatkat sapipun, kuwach kasar kuwit kïtek wölo kïpïro sapipun kïlïkwï dipay* kïtek kïtar atolapay kumönokyï pich kingor akïrutö kor nyo low. 34Kïkany kwitïta osiswo sapipun, kïyonta sekeykachi kïpa kura pïchay kimönokyï nyinte par atökïsïkö chane kareranpa akwa. 35Kïnam pïchay sekeyichay, kïmuny anka, kïpar anka, kïwira koghïn anka. 36Kuyoktö chichay sekeykö walaka cho chang ngat kïtïl chay pö tagh, kwighchï pïchay mi par chane le nyaye. 37Ato mi lötï kïyonta werïnyi kïwö wölo mi pïchay, ompöwölo kilentöy, ‘Konyïtöy nyu werïnyan nyo mötïny!’ 38Wölo otini kisïwa pïchay werïnyi kïmwochinchö lö, ‘Anyï werto chito par apkana kepara atökemïla tïkuchi!’ 39Kïlenyona kïnam monïngay akuchut kïlït paranay pö sapipun sany akïpar.”
40Kïtep nyu Yeso pïchini lö, “Ekwato itï chi pö par ido ne nya pïchay kimonokyï par?” 41Kuyokyï lö, “Pöröy chi pö par pïchini ghach ompö parat nyo gha akumönokyï paranoni pö sapipun pikö walaka cho töni nyinte kareranto akweko parenyi otini ketïta asispa ilö.”
42 #
Tum 118:22-23. Kïlenchï Yeso, “Tomönye so osomönökwa Kikirut atay lentöy,
‘Kiwaghaka koghay kitagh tekï
kïlïkwï pchöri kö.
Echotyon nyo kigh ngölyontononi,
akï pö töngönchin ato kïsïwecha?’ ”
43Kïtas Yeso kïlenchï, “Kïlenyona, omwowokwa ye lö, kïchengenokwa Pöyunöto Tororöt aketö punton walaka cho yinöy akwechi. [ 44Akwanka tïkwïl nyo pïtïni koghoni, keriyöy kïmïnchïrana akwoto chïnchï koghoni chi anka tïkwïl, kuropöy nyinte kïlïkwï terïtyon.”]
45Otini kiter tïsï cho echön nko Parisaytin* körkeyïntinechi, kunkïtï lö kingölono nyinte chane. 46Kïmach kïnam nyinte wölo kiwagh chane söpïchis, ompöwölo kikikuyit chane Yeso lö werkoyon.
Körkeyïn pö ichon pö kensyö
(Luk 14:15-24)
Currently Selected:
MATAYO 21: PIPÏLIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
